Dziarždepartamient ZŠA pra rasijska-biełaruskija vučeńni: Heta nadzvyčaj niebiaśpiečna
Na bryfinhu ŭ Dziarždepartamiencie ZŠA ŭ aŭtorak 18 studzienia abmiarkoŭvaŭsia fakt prybyćcia rasijskich vojskaŭ u Biełaruś u minułyja vychodnyja. U Dziarždepie nazvali budučuju sumiesnuju pravierku siłaŭ reahavańnia Biełarusi i Rasii demanstracyjaj siły.
«Heta nie vučeńni i nie zvyčajnaje pieramiaščeńnie vojskaŭ. Heta demanstracyja siły, zaklikanaja stvaryć iłžyvyja padstavy dla kryzisu, pakolki Rasija płanuje mahčymaje ŭvarvańnie. I davajcie prajaśnim: heta nadzvyčaj niebiaśpiečna. Ciapier my znachodzimsia na etapie, kali Rasija moža ŭ luby momant pačać ataku na Ukrainu»,
— havorycca ŭ pres-relizie.
Paviedamlajecca taksama, što ranicaj 18 studzienia adbyłasia razmova dziaržsakratara ZŠA Entani Blinkiena i kiraŭnika MZS Rasii Siarhieja Łaŭrova. Jany damovilisia ab sustrečy ŭ Ženievie paśla taho, jak Blinkien praviadzie pieramovy ŭ Kijevie i Bierlinie.
Vizit Blinkiena ŭ Kijeŭ zapłanavany na sieradu 19 studzienia. A ŭ čaćvier amierykanski dziaržsakratar sustreniecca ŭ Bierlinie z pradstaŭnikami ŭrada Hiermanii.
Rasijskija vojski pačali prybyvać u Biełaruś u minułyja vychodnyja ŭ ramkach maštabnaj pravierki siłaŭ reahavańnia. 17 studzienia Łukašenka anansavaŭ praviadzieńnie vučeńniaŭ «Sajuznaja rašučaść», u ramkach jakich rasijskija i biełaruskija vojski sumiesna adpracujuć supraćstajańnie Polščy, Ukrainie i krainam Bałtyi.
Aryštavany dyrektar Pałaca Respubliki, adzin z arhanizataraŭ Marafona adzinstva9
Kamientary