Źjavilisia novyja padrabiaznaści kibierataki na Ukrainu. Microsoft kaža ab maštabnym paškodžańni siervieraŭ i źniščeńni źviestak
Centr raźviedki pahroz Microsoft (MSTIC) vyjaviŭ škodnasnaje prahramnaje zabieśpiačeńnie, zamaskiravanaje pad prahramy-vymahalniki. Jano, pavodle infarmacyi kampanii, vykarystoŭvałasia pry niadaŭniaj chakierskaj atacy na ŭradavyja sietki Ukrainy. Hetaje PZ umiašałasia ŭ pracu ćviordych dyskaŭ tych pryład, jakija byli im zaražanyja, piša «Ukrainskaja praŭda».
Upieršyniu hetaje PZ kampanija vyjaviła 13 studzienia 2022 hoda. Jano maskirujecca pad prahramu-vymahalnik, adnak pryznačana nie dla atrymańnia vyhady, a dla paškodžańnia pryład, na jakich zainstalavana.
Škodnasnaje PZ užo vyjaŭlena ŭ dziasiatkach paciarpiełych sistem, adnak ich kolkaść pa miery raźvićcia rasśledavańnia moža pavialičycca. Siarod zaražanych — sistemy ŭkrainskich dziaržaŭnych orhanaŭ, niekamiercyjnych arhanizacyj i infarmacyjna-technałahičnych kampanij.
U Microsoft dadali, što pakul nie znajšli značnaha padabienstva tych chakieraŭ, jakija atakavali Ukrainu, ź inšymi hrupami kibierzłačyncaŭ, jakich adsočvaje kampanija. Svaje vysnovy kampanija pieradała paciarpiełym arhanizacyjam, a taksama ŭradavym ustanovam u ZŠA i ŭ inšych krainach.
Vyjaŭlenaje škodnaśnie PZ znachodzicca ŭ roznych pracoŭnych katałohach pryład i časta maje nazvu stage1.exe. Jano pierazapisvaje asnoŭny zahruzačny zapis (Master Boot Record, MBR — častka ćviordaha dyska, jakaja poviedamlaje kampjutaru, jak zahruzić apieracyjnuju sistiemu) u sistemach-achviarach z zapisam ab vykupie.
Śpiecyjalisty adznačajuć i papiaredžvajuć:
«Uličvajučy maštaby ŭvarvańnia, MSTIC nie moža acanić namiery, ź jakimi rabilisia vyjaŭlenyja destruktyŭnyja dziejańni, ale ličyć, što hetyja dziejańni ŭjaŭlajuć pavyšanuju ryzyku dla luboha dziaržaŭnaha orhana, niekamiercyjnaj arhanizacyi abo pradpryjemstva, jakija znachodziacca abo majuć sistemy ŭ Ukrainie.
Pierazapis MBR — nietypovy dla kibierzłačynnaści prahram-vymahalnikaŭ. Na samaj spravie paviedamleńnie pra prahramu-vymahalnik źjaŭlajecca chitraściu, i škodnaje prahramnaje zabieśpiačeńnie źniščaje MBR dy źmieściva fajłaŭ, na jakija nacelena».
Nahadajem, što ŭ noč na 14 studzienia była ździejśnienaja najbujniejšaja za čatyry hady kibierataka na Ukrainu. Jana «pakłała» šerah uradavych sajtaŭ, a taksama partał dziaržaŭnych pasłuh «Dija».
Namieśnik sakratara Rady nacyjanalnaj biaśpieki i abarony Siarhiej Dziemiadziuk zajaviŭ, što za maštabnaj kibieratakaj na Ukrainu staić chakierskaja hrupa, źviazanaja ź biełaruskaj raźviedkaj. Pa jaho słovach, biełaruskija chakiery vykarystoŭvali škodnasnaje prahramnaje zabieśpiačeńnie, padobnaje da taho, jakoje vykarystoŭvała hrupa, źviazanaja z raźviedkaj Rasii.
Kamientary