Cichanoŭskaja vs Łukašenka. Paraŭnoŭvajem ź minułym hodam prahlady telezvarotaŭ i navahodnich šou

Za pieršyja 24 hadziny videazvarot Śviatłany Cichanoŭskaj sabraŭ 711 tysiač prahladaŭ na čatyroch asnoŭnych jutub-kanałach, jakija jaho tranślavali.

418 tysiač čałaviek pahladzieli jaho ŭ jutub-kanale samoj Cichanoŭskaj. U minułym hodzie za tyja ž 24 hadziny tam było 263 tysiačy prahladaŭ.U hetym hodzie pad zvarotam za sutki tam pastavili 31 tysiaču łajkaŭ.

Zvarot nabraŭ 127 tysiač prahladaŭ na kanale «Biełsata», 123 tysiačy razoŭ na kanale «Kraina dla žyćcia» i 43 tysiačy na kanale radyjo «Svaboda».

«Za sutki navahodni zvarot pahladzieli minimum 1,26 młn razoŭ na Fejsbuku, YouTube, Odnoklassniki, Telegram i Instagram», — pryvodzić ŭ siabie ŭ fejsbuku statystyku daradca Cichanoŭskaj Franak Viačorka. 

Akramia taho, videazvarot demanstravaŭsia na šerahu «doŭhich» navahodnich jutub-šou. 

Ich vybar byŭ trochi mienšy, čym hod tamu. Kolki ludziej addali im pieravahu pierad tradycyjnym telebačańniem i čyje šou stali samymi papularnymi? 

Šou kanała Ściapana Puciły, jak i hod tamu, — biezumoŭny lidar. Jaho analityčna-zabaŭlalny navahodni strym sabraŭ 220 tysiač prahladaŭ. Ale heta radykalna mienš, čym u minułym hodzie, kali prahladaŭ za sutki było 406 tysiač.

U amal 7-hadzinnaj prahramie davali słova jak palitykam, tak i zorkam interneta, u pierabiŭkach śpiavaŭ NaviBand i ŭspaminali padziei hoda.

Navahodni viečar-2022 z «Biełsatam» nabraŭ 114 tysiač prahladaŭ (u minułym hodzie było 88 tysiač), a ich čaroŭny navahodni miuzikł «Viartańnie dadomu» — jašče 113 tysiač.

Razmoŭna-muzyčnaje šou «Novohodnij efir // Malanka.live» sabrała 43 tysiačy prahladaŭ (hod tamu było 66 tysiač).

Navahodna. Śviatočny special: Takindanh, Bašłykievič, Iva Sativa, «Baču ŭpieršyniu» na kanale «Hodna» — 5 tysiač prahladaŭ. U minułym hodzie ŭ aryjentavanaj na moładź prahramy «Hodna» było 53 tysiačy prahladaŭ. 

Stolki ž, kala 5000, u humarystyčnaj «Novohodnie-analitičieskoj pieriedači «ČinČinČas».

«Sumlennyja ludzi» i «Kraina dla žyćcia», u adroźnieńnie ad minułaha hoda, navahodnich prahram nie stvaryli.

Razam navahodnija jutub-šou sabrali kala 500 tysiač prahladaŭ. Našmat mienš, čym u minułym hodzie, kali ich za toj ža čas prahladaŭ było 915 tysiač. 

Kolki hladzieli «Biełsat» praz spadarožnik, źviestak niama.

Paraŭnoŭvać kolkaść prahladaŭ zvarotaŭ Alaksandra Łukašenki i Cichanoŭskaj u Jutubie (u Łukašenki ŭ try razy mienš prahladaŭ i ŭ dziasiatki razoŭ mienš łajkaŭ) — napeŭna, nie karektna, bo Łukašenku hladziać pieravažna na telebačańni, dzie jon, u adroźnieńnie ad Cichanoŭskaj, tatalna dastupny. Ale ličby Jutuba pakazvajuć, što hramadstva choča mieć zdarovuju alternatyvu anitrochi nie mienš, čym hod tamu.

• 0
• 0
• 0
• 0
• 0
• 0
• 0
• 0