Za tajamničym «Fondam pieršaha» stajać Abielskaja i jaje niaviestka
«Fond Pieršaha», stvorany Alaksandram Łukašenkam u kastryčniku 2022 hoda, zastajecca adnoj z samych zakrytych arhanizacyj u Biełarusi. Jon nie publikuje finansavyja spravazdačy, a ŭ dakumientach nie paznačana navat imia dyrektara. Aficyjna fond mieŭsia zajmacca dabračynnaściu paśla tatalnaj začystki siektara NDA.
«Biuro» z «Kibierpartyzanami» vyśvietlili, što za hetaj strukturaj stajać ludzi ź blizkaha atačeńnia Iryny Abielskaj — hałoŭnaha doktara Respublikanskaj balnicy Kiraŭnictva spravami prezidenta i maci Mikałaja Łukašenki.
U kastryčniku 2022 hoda Alaksandr Łukašenka stvaryŭ «Fond Pieršaha». U kastryčniku 2023 hoda jon zajaviŭ, što fond pavinien «akumulavać hrošy tych, chto nieabyjakavy», i dapamahać tym, chto maje patrebu.
Aficyjnaj pryčynaj źjaŭleńnia fondu nazyvałasia začystka papiaredniaha siektara NKA i NDA. Łukašenka śćviardžaŭ, što jany sprabavali «razhajdać stanovišča» ŭ 2020 hodzie. Tamu, kazaŭ Łukašenka, fond vyrašyli stvaryć pad jahonaj ehidaj, kab ludzi mahli spakojna ŭdzielničać u dabračynnaści.
Jurydyčny adras «Fondu Pieršaha» — Minsk, vulica Čyrvonaarmiejskaja, 15. Pa hetym adrasie znachodzicca novaja rezidencyja Łukašenki ŭ centry stalicy, abstalavanaja pracoŭnym kabinietam, spalniaj, kanfierenc-załaj, basiejnam i spa-centram.
Siarod piersanału fondu značycca Dzina Fiejsał el-Dziefi. Jana sumiaščaje hetuju dziejnaść z pracaj u Respublikanskaj kliničnaj balnicy pad kiraŭnictvam samoj Abielskaj, jakuju rehularna supravadžaje na mierapryjemstvach.
Samaje admietnaje, što Dzina źjaŭlajecca spadarožnicaj i, vierahodna, žonkaj Dźmitryja Abielskaha, starejšaha syna Iryny Abielskaj.
U Dźmitryja i Dziny jość ahulny syn, a na fotazdymkach u Dźmitryja zaŭvažany masiŭny šlubny piarścionak na levaj ruce.
Jašče adna supracoŭnica fondu — Natalla Ivanova (Dudarava). Jaje imia fihuruje nie tolki ŭ dakumientach «Fondu Pieršaha», ale i ŭ strukturach, źviazanych z pryvatnaj Minskaj mižnarodnaj himnazijaj i jaje kiroŭnaj kampanijaj «Haryzonty viedaŭ».
Hetuju himnaziju pieršapačatkova zasnavała mienavita Iryna Abielskaja.
Natalla Ivanova taksama źjaŭlałasia suzasnavalnicaj firmy «Markietvižn», jakaja kiravała «Haryzontami viedaŭ». Zaraz usie źviestki pra sapraŭdnych uładalnikaŭ hetaj elitnaj škoły całkam zasakrečanyja.
Takim čynam, struktura, stvoranaja pad ehidaj Łukašenki dla «dapamohi tym, chto maje patrebu», akazałasia ščylna zaviazana na členaŭ siamji i blizkaje atačeńnie Iryny Abielskaj — mamy Koli Łukašenki.
Pamiatajecie Piatrušu, jaki vydziraŭ draty «dydžejam Pieramien»? Jaho pieraviali ŭ treciuju lihu čynoŭnikaŭ paśla miesiacaŭ biespracoŭja7
Pamiatajecie Piatrušu, jaki vydziraŭ draty «dydžejam Pieramien»? Jaho pieraviali ŭ treciuju lihu čynoŭnikaŭ paśla miesiacaŭ biespracoŭja
«Paśla pieršaha zabojstva ź im raźviałasia žonka». Što viadoma pra šmatdzietnaha Siarhieja sa Stolinskaha rajona, jaki paśla vyzvaleńnia z kałonii zabiŭ troch čałaviek44
Kamientary
Tak heta siamiejka maje takuju patrebu, taki apietyt, dy prahu da hrošaj, što ŭžo ŭsiu krainu pieratvaryli ŭ asabistuju ŭłasnaść. A narod zrabili parabkami, što batračyć na kłan Łukašenak.