Łukašenka abviaściŭ 2022-hi Hodam histaryčnaj pamiaci. Za historykaŭ užo tryvožna
Va ŭładnaj traktoŭcy histaryčnaja pamiać — tolki toje, što zahadajuć pamiatać siłaviki i pryŭładnyja ideołahi. Lubaja inšaja pamiać — varožaja i padlahaje pieraśledu.
Łukašenka u apošnija chviliny 2021-ha abviaściŭ 2022 hod hodam histaryčnaj pamiaci. I za histaryčnuju pamiać dy ŭvohule historyju paśla hetaha robicca tryvožna.
U minułym «hodzie narodnaha adzinstva» ŭłady što tolki nie rabili dla taho, kab niščyć navat dumki pra hetaje adzinstva. Prytym rabiłasia tak nie vypadkova, a całkam metanakiravana i demanstratyŭna. Niama sumnievu, što va ŭjaŭleńni pradstaŭnikoŭ režymu narod, da adzinstva jakoha treba imknucca — tolki taja mienšaść, jakaja hety režym padtrymlivaje. A chto dla ich astatnija — dastatkova prahladzieć palityzavany kantent dziaržaŭnych ŚMI, zajści ŭ telehram-kanały zapisnych prapahandystaŭ i palitrukoŭ. Rytoryka, jakaja tam prymianiajecca, iluzij nie pakidaje.
Naŭrad ci inakš budzie — dy ŭžo i jość — z histaryčnaj pamiaćciu. Jana va ŭładnaj traktoŭcy — tolki toje, što zahadajuć nam pamiatać pryŭładnyja ideołahi i siłaviki. Lubaja inšaja pamiać — varožaja i padlahaje pieraśledu.
U 2021 hodzie pad budučy pieraśled za histaryčnaje dysidenctva zakładałasia zakanadaŭčaja baza. Niamała pasažaŭ pra abaviazkovy «pravilny» patryjatyzm u niadaŭna abnarodavanym prajekcie Kanstytucyi, tuju ž liniju viadzie i zaćvierdžanaja zusim «pad jalinku» prahrama patryjatyčnaha vychavańnia biełarusaŭ. Jość zusim nie tearetyčnaja niebiaśpieka, što ŭ novym hodzie prafiesija historyka, spałučanaja z asabistym sumleńniem, stanie ŭ Biełarusi adnoj z najbolš niebiaśpiečnych i ryzykoŭnych.
Tamu za historykaŭ i tryvožna. Choć šancaŭ pieramahčy na hetym poli ŭ histaryčnaj pierśpiektyvie ŭ režymu niama nijakich. Ale pałamać ludziam žyćci mahčymaściaŭ pakul chapaje.
Hł. taksama:
Ułady znoŭ uzialisia za nacyjanalnuju ideju. Abiacajuć sfarmulavać da 2023 hoda
Ciapier čytajuć
Fienomien miedycynskaha ŭniviersiteta: kabała z raźmierkavańniem, nievialikija zarobki, ale ad abituryjentaŭ adboju niama9
Kamientary