Palitźniavolenaha aktyvista z Homiela asudzili da 1,5 hoda kałonii za šeść kamientaryjaŭ u telehram-čatach
U sudzie Savieckaha rajona Homiela 22 listapada da 1,5 hoda kałonii ahulnaha režymu pa č. 1 art. 342 (arhanizacyja dziejańniaŭ, jakija hruba parušajuć hramadski paradak) i art. 369 (publičnaja abraza pradstaŭnika ŭłady) Kryminalnaha kodeksa asudzili palitźniavolenaha homielskaha aktyvista Jaŭhiena Markaŭca, paviedamlajuć pravaabaroncy.
Sud za šeść kamientaryjeŭ hamielčuka ŭ telehram-čatach doŭžyŭsia amal dva miesiacy. Pad vartaj Jaŭhien utrymlivajecca ŭžo paŭhoda. Spravu razhladaŭ sudździa Vital Kaŭbienia, dziaržabvinavačvańnie padtrymlivaŭ Alaksandr Šynkaroŭ.
Pa viersii abvinavačvańnia, u žniŭni i vieraśni minułaha hoda Markaviec u telehram-čatach raźmiaściŭ zakliki da supraćpraŭnych dziejańniaŭ. Taksama ŭ «Telehramie» jon pakinuŭ abraźlivy kamientaryj u adnosinach da supracoŭnika AMAPa Varuščanki. Usiaho ŭ materyjałach spravy fihuruje šeść kamientaryjeŭ.
Jaŭhien Markaviec pryznaŭ vinu častkova — abraźlivy kamientaryj jon nasamreč źmiaściŭ, a voś zaklikaŭ da dziejańniaŭ, jakija hruba parušajuć hramadski paradak, nie rabiŭ.
Jaŭhien Markaviec patłumačyŭ u sudzie, što byŭ vielmi ŭzrušany źbićciom pratestoŭcaŭ, navat užo zatrymanych u pastarunkach, tamu na emocyjach pisaŭ hetyja kamientaryi, u jakich vykazvaŭ svajo mierkavańnie, a nie zaklikaŭ da kankretnych supraćpraŭnych dziejańniaŭ.
Padčas sudovych sprečak prakuror Alaksandr Šynkaroŭ zajaviŭ, što vina Jaŭhiena Markaŭca pa dvuch artykułach Kryminalnaha kodeksa całkam dakazanaja i zapatrabavaŭ pakarać jaho dvuma hadami kałonii. Taksama prakuror nastojvaŭ, kab hamielčuk vypłaciŭ paciarpiełamu amapaŭcu 2000 rubloŭ.
U vyniku, sudździa Vital Kaŭbienia asudziŭ Jaŭhiena Markaŭca na paŭtara hoda kałonii va ŭmovach ahulnaha režymu. Taksama sud pastanaviŭ spahnać z palitviaźnia na karyść paciarpiełaha amapaŭca tysiaču rubloŭ, što na pałovu mieniej, što patrabavaŭ prakuror.
Kamientary