Fond spartyŭnaj salidarnaści apublikavaŭ dakład ab parušeńniach fundamientalnych pałažeńniaŭ Mižnarodnaj fiederacyi futboła (FIFA) i Sajuza jeŭrapiejskich futbolnych asacyjacyj z boku Biełaruskaj fiederacyi futboła (ABFF).
Aŭtary dakłada śćviardžajuć pra administracyjny cisk na sudziejski futbolny korpus z metaj atrymańnia nieabchodnych vynikaŭ u kankretnych matčach, pakryvalnictva ŭdzielnikaŭ dahavornych matčaŭ i niedastatkovaje pryniaćcie mier pa «dahavarniakach» i inšyja parušeńni Fiederacyi.
U dakładzie apisvajecca sustreča pradstaŭnika MUS, jakaja nibyta mieła miesca ŭ 2019 hodzie, z aficeram sumlennaści ABFF Andrejem Čepam, kiraŭnikom ABFF Uładzimiram Bazanavym, a taksama jaho namieśnikami Juryjem Viarhiejčykam i Michaiłam Botnikavym. Padčas razmovy było zajaŭlena, što jość dokazy ab datyčnaści da dahavornych matčaŭ futbalistaŭ Zachara Vołkava i Kiryła Piačenina (abodva tady vystupali za «Naftan»), a taksama sabrany materyjały dla zaviadzieńnia kryminalnaj spravy ŭ dačynieńni da hulca zbornaj Biełarusi pa plažnym futbole Vadzima Bakača. Adnak pakarany byŭ tolki Vołkaŭ (dvuchhadovaja dyskvalifikacyja).
Taksama ŭ dakładzie śćviardžajecca pra ŭpłyŭ top-funkcyjanieraŭ biełaruskaha futboła na pryznačeńnie sudździaŭ na matčy. U jakaści dokazu pryvodzicca vypadak z matčam «Dynama» (Brest) — «Nioman», kali vyrašana było pryznačyć hałoŭnym refiery Jaŭhiena Navumava. Pavodle aŭtaraŭ dakłada Bazanaŭ uchvaliŭ rašeńnie, ale potym nibyta jamu pryjšła sms ad uładalnika «Dynama» Alaksandra Zajcava: «Navumaŭ — nie, Łabacevič — tak».
Jak aŭtary dakłada atrymali dostup da pryvatnaj pierapiski — nieviadoma.
Taksama ŭ dakładzie raskazvajecca pra cisk na sudździaŭ. Aŭtary zaznačajuć, što 134 sudździ i futbolnych inśpiektaraŭ padpisali list suprać hvałtu. Inicyjataram lista byŭ asistent refiery FIFA Vital Malucin. Nieŭzabavie jaho pieraviali na absłuhoŭvańnie hulniaŭ pieršaj lihi.
A 7 maja 2021 hoda, napiaredadni Dnia Pieramohi, adbyŭsia matč «Homiel» — «Słuck», na jakoj pracavała sudziejskaja bryhada ŭ składzie Łašuka, Husieva i Arabieja, inśpiektaram matča byŭ Jaŭnievič (inśpiektar). Usia bryhada admoviłasia nadziavać čyrvona-zialonyja butańjerki jak znak padtrymki ŭłady. Delehat toj sustrečy patelefanavaŭ u ABFF i paskardziŭsia na pavodziny sudździaŭ. U vyniku z ABFF patelefanavali Jaŭnieviču, ale toj adkazaŭ, što sudździ majuć prava sami vyrašać, adziavać butańjerki ci nie.
Anałahičnyja vypadki zdarylisia na matčy «Słavija» — «Dynama» Brest i «Šachcior» — BATE. Pamočniki sudździaŭ Nizoŭcaŭ i Pranovič byli ŭ vyniku pakaranyja, jany nie atrymali pryznačeńniaŭ na nastupnyja matčy, a inśpiektar Jaŭnievič adchileny ad inśpiektavańnia matčaŭ vyšejšaj lihi na try miesiacy.
U vyniku zrobleny nastupnyja vysnovy:
— rašeńni kiraŭnictva ABFF u dačynieńni da sudziejstva ŭpłyvali na vyniki asobnych matčaŭ, što ciahnuła za saboj źmieny ŭ turnirnaj tablicy;
— fiederacyja futboła parušaje svoj ułasny statut, a taksama statuty FIFA i UEFA, sudziejskuju kanviencyju i inšyja dakumienty;
— dziejańni ABFF nanosiać škodu imidžu biełaruskaha futboła jak na ŭnutranaj, tak i na mižnarodnaj arenie.
Paviedamlajecca, što UEFA byŭ prainfarmavany pra parušeńni, adnak nijakaj reakcyi nie nastupiła.
«Naša niva» nie maje mahčymaści spraŭdzić infarmacyju apublikavanaha dakłada.
Kamientary