Viciablanina asudzili bolš čym na 9 hadoŭ pavodle pratesnych artykułaŭ. Sud byŭ zakrytym

Viciablanina Siarhieja Dumavu abvinavačvali adrazu pa niekalkich artykułach Kryminalnaha kodeksu: č.1 art.293 KK, č.3 art. 293 KK, art. 341 KK.

Pa ŭsich abvinavačvańniach sudździa Michaił Jurčanka pryznaŭ Dumavu vinavatym. Najbolšaje pakarańnie — 9 hadoŭ kałonii, pryznačyŭ pa artykule ab arhanizacyi masavych biesparadkaŭ. Aproč hetaha, 2 hady — za «navučańnie i padrychtoŭku da ŭdziełu ŭ masavych biesparadkaŭ». I 1 miesiac aryštu — za «apahańvańnie budynkaŭ».

Pa sukupnaści pakarańniaŭ i «šlacham pahłynańnia mienš strohaha pakarańnia bolš strohim» ahulny termin źniavoleńnia skłaŭ 9 hadoŭ i 15 sutak kałonii va ŭmovach uzmocnienaha režymu.

Siarhiej Dumava byŭ zatrymany 22 sakavika 2021 hodu, kali rasklejvaŭ u horadzie nalepki. Paśla zatrymańnia jon pryznaŭsia ŭ tym, što nanios jašče čyrvonaj farbaj niekalki nadpisaŭ «Žyvie Biełaruś». U abvinavačvańni taksama fihurujuć nadpisy «3%», «Čyrvony partyzan», «Sychodź».

23 sakavika, na nastupny dzień paśla zatrymańnia, u jahonaj chacie adbyŭsia pieratrus. U haražy byŭ znojdzieny žalezny trafaret hierbu Pahonia, a taksama pietardy, strajkbolnyja hranaty, dymavyja šaški dy inšyja nie zabaronienyja dla zachoŭvańnia pradmiety.

Pieršaje sudovaje pasiadžeńnie adbyłosia 13 žniŭnia. Na im Siarhiej admoviŭsia davać jakija-niebudź pakazańni. Jak vynikała ź piśmovych pakazańniaŭ, svaju vinu ŭ vystaŭlenych abvinavačańniach jon całkam admaŭlaŭ. Nastupnaje pasiadžeńnie, 16 žniŭnia, zrabili ŭžo zakrytym. Pryčynaj nibyta pasłužyŭ fotazdymak, zrobleny na pracesie i raźmieščany ŭ internecie. Padčas vyniasieńnia prysudu sudździa Michaił Jurčanka zabaraniŭ nie tolki fatahrafavać, ale navat vieści zapis na dyktafon.

Advakaty Siarhieja Dumavy źbirajucca abskardžvać dadzienaje rašeńnie ŭ abłasnym sudzie.

«Ni za što! Nijakich dokazaŭ nie było padadziena», — zajaviła adrazu paśla abviaščeńnia prysudu maci Siarhieja Dumavy Alena. Praces prachodziŭ u zakrytym režymie, ale maci dazvolili paprysutničać na pasiadžeńniach.

Jak raspaviali znajomyja abvinavačanaha, Siarhiej Dumava — były kanstruktar pramysłovych i hramadskich budynkaŭ. Zajmaŭsia prajektavańniem haradskoj zabudovy Viciebsku, ale dva hady tamu jahony talent akazaŭsia niezapatrabavany. Dobry śpiecyjalist zastaŭsia biez pracy, doŭha nie moh nidzie ŭładkavacca i vymušany byŭ pajści pracavać vartaŭnikom.

Siarhiej vychoŭvaje dvuch niepaŭnaletnich dzietak.

• 0
• 0
• 0
• 0
• 0
• 1
• 1
• 0