Paźniak prapanavaŭ admianić sankcyi i ŭstupić u pieramovy. A što jon kazaŭ ciaham minułaha hoda

Ci jość vychad z hetaj situacyi? Pavodle Paźniaka, «u intaresach biełaruskaha naroda — admianić avijapasažyrskuju i naziemna-transpartnuju błakadu Biełarusi, adnavić mižludskija suviazi i kantakty pamiž narodami, kamunikacyi z hramadstvam. Taksama staršynia KCHP BNF prapanuje zamarozić ekanamičnyja sankcyi i ŭstupić u pieramovy z procilehłym bokam ab spynieńni represijaŭ, katavańniaŭ, pieraśledu hramadzianskaj supolnaści.

«U samym pačatku hibrydnaj vajny, kab spynić eskałacyju, treba patušyć vohniščy z abodvuch bakoŭ, heta značyć pačać razmaŭlać», bo «palityka zahnać Łukašenku ŭ pastku (u Rasiju) koštam žyćcia biełaruskaha naroda — heta jość ehaistyčnaja palityka varvarstva», — piša jon.

Na dumku lidara KCHP-BNF, u situacyi «tatalnaj ekanamičnaj błakady vyžyvajuć tolki dyktatary, a ciarpić narod». A ŭ biełaruskaj situacyi ekanamičnyja sankcyi i błakada, «heta jość zahon da anieksii, da straty suvierenitetu, da intehracyi Biełarusi ŭ Rasiju».

Artykuł Paźniaka vyklikaŭ na niekalki dzion abmierkavańnie ŭ internecie. Byli tyja, chto pahadžaŭsia, što Biełaruś traplaje ŭ jašče bolšuju zaležnaść ad Rasii i sapraŭdy sankcyi jašče bolš izalujuć biełaruski narod.

Apanienty zaŭvažyli, što sam aficyjny Minsk davioŭ da takoj situacyi, a lubyja prapanovy pieramovaŭ rašuča adkidalisia ŭładaj. Z kim vieści dyjałoh? Chto jaho budzie pradstaŭlać ź inšaha boku, kali ŭ krainie bolš za 600 palitviaźniaŭ?

U hetaj situacyi varta zhadać zajavy Zianona Paźniaka, jakija jon rabiŭ apošni hod i jakija vyklikali rozhałas u internecie, a potym zabyvalisia.

Nazvaŭ Babaryku novym virusam

U pačatku vybarčaj kampanii, u červieni 2020 hoda, kali Babaryka ŭžo byŭ zatrymany, Paźniak zajaviŭ, što «toj patencyjna bolš škodny vorah biełaruskaj nacyi, čym Łukašenka, bo virus Łukašenki ŭžo na 97% vychavaŭ u biełarusaŭ imunitet, antycieły abarony narodnaha arhanizmu». A Babaryka — heta novy virus, jaki nie spatykaje imunitetu i «davieršyć maskoŭskuju spravu razbureńnia biełaruskaj dziaržavy i biełaruskaj nacyi».

Potym jon stanoŭča vykazaŭsia pra nierehistracyju kandydatami Babaryki i Capkały. «Hazpramaŭskaja afiora zabuksavała. Bankira nie zarehistravali. Capkału adkinuli raniej», — pisaŭ jon i rabiŭ prahnozy, što «bankir siadzie minimum na šeść hadoŭ razam z kampanijaj, a jahonyja klerki pabiahuć, jak i raniej, lizać uzurpatara». Viktara Babaryku ŭ vyniku asudzili da 14 hadoŭ kałonii.

Krytykavaŭ Cichanoŭskuju za toje, što jaje «ŭziali ŭ abarot»

Paźniak aktyŭna kamientavaŭ vybarčuju kampaniju. Spačatku pachvaliŭšy Śviatłanu Cichanoŭskuju, jon potym abjadnańnie štaboŭ nazvaŭ idyjatyčnym nonsensam, a taksama skazaŭ, što Cichanoŭskuju «režym i kantora ŭziali ŭ abarot».

«Ščyra kažučy, mnie až škada miłych dam (choć adna ź ich nosić vyraznyja prykmiety słužbistki), što ŭlapalisia ŭ hetaje vadevilnaje šou i ŭ niadobruju spravu», — pisaŭ jon pra žančyn.

Abvinavaciŭ Łatušku ŭ razbureńni Kupałaŭskaha teatra

Kamientavaŭ lidar KCHP-BNF navat situacyju z Kupałaŭskim teatram, abvinavaciŭšy Paŭła Łatušku ŭ jaho razbureńni. «Režym zvolniŭ [Łatušku] za niedahlad nastrojaŭ u teatry. Heta aburyła aktoraŭ. Tut ža ŭźnik absurdny poklič zvalniacca z teatra ŭ znak pratestu. Na heta nałažyłasia jašče abureńnie za zabojstvy mirnych demanstrantaŭ režymnymi karnikami, za chapun i katavańni ludziej. Aktory časta ludzi impulsiŭnyja. Łatuška nie paŭstrymaŭ kupałaŭcaŭ, nie patłumačyŭ, nie praduchiliŭ pamyłkovych razburalnych dziejańniaŭ. Praŭda, moža, jon nie razumieŭ, što robicca i što budzie. Ale heta nie mianiaje spravy», — pisaŭ jon u lutym 2021 hoda.

Mahčyma, varta razhladać novyja vysnovy Zianona Paźniaka jak pryvatnuju dumku. A budučyja padziei pakažuć, chto mieŭ racyju.

• 0
• 0
• 0
• 0
• 0
• 0
• 0
• 0