Były ambasadar Vialikabrytanii ŭ Biełarusi: Režym patracić hrošy MVF na represii, a nie na vyratavańnie žyćciaŭ

9 žniŭnia ZŠA, Vialikabrytanija i Kanada ŭviali novy pakiet sankcyj suprać režymu Łukašenki. Praz dva dni MVF zhadziŭsia dać Biełarusi 910 miljonaŭ dalaraŭ u miežach hłabalnaha raźmierkavańnia śpiecyjalnych pravoŭ zapazyčańnia. Pakul zachodnija krainy ŭzmacniajuć sankcyi suprać biełaruskaha ŭrada ŭ adkaz na surjoznyja parušeńni pravoŭ čałavieka i mižnarodnaha prava, MVF finansuje režym. I hetuju supiarečnaść treba vypravić, piša vydańnie Bloomberg.

Takoje adbyvajecca nie ŭpieršyniu. U 2008 hodzie, sutyknuŭšysia ź finansavym kryzisam, Biełaruś źviarnułasia da MVF pa terminovuju dapamohu. Jak piša Hud-Dejvis, kali pačalisia pieramovy nakont vyłučeńnia srodkaŭ Biełarusi, jon, razam z pradstaŭnikom MVF, sprabavali znajści rašeńnie, jakoje b adnačasova mahło dapamahčy Biełarusi, ale taksama padtrymała b zachoŭvańnie pravoŭ čałavieka.

Adnak u vyniku Minsk atrymaŭ 2,5 miljarda dalaraŭ bieź nijakich damoŭ u halinie pravoŭ čałavieka. I ŭ toj ža čas ES i ZŠA ŭvodzili sankcyi suprać Biełarusi. Ale miery byli abmiežavanymi, a kantekst mocna adroźnivaŭsia ad siońniašniaha. Tady ŭ imknieńni palepšyć adnosiny z Zachadam režym Łukašenki byŭ bolš strymany ŭ represijach suprać hramadzianskaj supolnaści. Na toj momant padavałasia, što situacyja z pravami čałavieka ŭ Biełarusi choć i pavolna, ale palapšajecca.

Represii, raspačatyja padčas apošniaj pieradvybarčaj kampanii, majuć biesprecedentny charaktar i tolki ŭzmacniajucca. Mižnarodnyja skandały, dziejnaść biełaruskich śpiecsłužbaŭ za miažoj, arhanizacyja mihracyjnaha kryzisu na miažy ź Litvoj izalujuć Biełaruś ad usiaho śvietu. Adnosiny Łukašenki z Zachadam užo nie zmohuć narmalizavacca, ličyć Hud-Dejvis. Tym nie mienš, dziejańni MVF robiać usie sankcyi zachodnich krain marnymi.

MVF taksama dapamahaje i Rasii padtrymlivać režym. Z pačatku palityčnaha kryzisu ŭ Biełarusi Rasija vydała Łukašenku novyja kredyty. Pucin razumieje, što finansavy kryzis u Biełarusi moža paskoryć patencyjny pierachod da demakratyi, jak heta było ŭ niekatorych inšych aŭtarytarnych sistemach. Rasija praciahvaje padtrymlivać režym, maštab represij jakoha Jeŭropa nie bačyła dziesiacihodździami. Pucin taksama nastojvaje na intehracyi Biełarusi i Rasii. Heta pytańnie moža ŭklučać u siabie raźmiaščeńnie rasijskich vajennych baz na terytoryi Biełarusi, što vyklikaje zaniepakojenaść zachadu, bo try dziaržavy-siabry ES i NATA majuć ahulnuju miažu ź Biełaruśsiu.

Na fonie hetaha vyłučeńnie srodkaŭ MVF nie tolki padarunak dla Biełarusi, ale i padtrymka mety Rasii zachavać uładu Łukašenki.

U 2008 hodzie spałučeńnie kredytaŭ i sankcyj nie kidałasia ŭ vočy. Ale z ulikam siońniašniaj situacyi ŭ Biełarusi, takija dziejańni MVF nieprymalnyja. Pry hetym jość precedenty, jakija paćviardžajuć, što nie finansavać režym mahčyma. Naprykład, Vieniesueła, dzie zakonnym lidaram bolšaść pryznaje Madura.

Ale ŭ hetaj situacyi ironija ŭ tym, što srodki vyłučajucca na baraćbu z pandemijaj karanavirusa, jakoha, na dumku Łukašenki, nie isnuje. Jon asudziŭ dziejańni inšych krain u dačynieńni da pandemii, takija jak karancin i izalacyja. Ale niadaŭnija źviestki, apublikavanyja «kibierpartyzanami», ukazvajuć na toje, što sapraŭdnaja kolkaść zahinułych ad kavidu ŭ Biełarusi dasiahaje 32 tysiač, što ŭ 14 razoŭ bolš za aficyjnyja ličby, padkreślivaje były ambasadar. Režym ź vialikaj vierahodnaść patracić hrošy MVF na represii, a nie na vyratavańnie žyćciaŭ, ličyć aŭtar kałonki. Tamu dziejańni MVF vyklikajuć pytańni marali i metazhodnaści.

• 0
• 0
• 0
• 0
• 0
• 0
• 0
• 0