U Hiermanii tysiačy ludziej zaprasili na treciuju dozu pryščepki: miedsiastra pryznałasia, što niekalki razoŭ zamianiła vakcynu ad kavidu na fizrastvor
Ciapier ułady Niamieččyny zaprasili 8557 čałaviek na dadatkovuju vakcynacyju.
Paśla taho jak 40-hadovaja miedsiastra ź Nižniaj Saksonii pryznałasia, što ŭvodziła ludziam fizrastvor zamiest vakcyny ad karanavirusa, tysiačy ludziej zaprasili na treciuju dozu ŭ jakaści dadatkovych mier, piša The New York Times. Na paŭtornuju vakcynacyju ŭžo zapisalisia 3600 čałaviek.
Miedsiastra pracavała ŭ nievialikim centry vakcynacyi Čyrvonaha Kryža ŭ horadzie Šortens. U krasaviku jana ŭviała šeść doz fizrastvoru zamiest vakcyny. Pieršy čas jana nikomu pra heta nie kazała, ale 24 krasavika pryznałasia kalezie ŭ padmienie.
Sama miedsiastra patłumačyła heta tym, što vypadkova raźbiła ampułu z vakcynaj, ale nie chacieła «vyhladać zdradnicaj», tamu vyrašyła nikomu pra heta nie kazać i ŭvieści ludziam biasškodny fizrastvor. Pa inšaj viersii — miedsiastra bajałasia zhubić pracu, bo niadaŭna ŭładkavałasia ŭ centr paśla doŭhaha pieryjadu biespracoŭja. Adnak paśla pryznańnia Čyrvony Kryž zvolniŭ miedsiastru.
Adnak palicyja miarkuje, što siastra mahła sistematyčna padmianiać vakcynu na fizrastvor. U sacyjalnych sietkach jana krytykavała antykavidnyja abmiežavalnyja miery ŭrada. Tamu palicyja dapuskaje, što miedsiastra mahła być suprać pryščepak i rabić heta naŭmysna.
Advakaty miedsiastry nastojvajuć, što jaje zapisy ŭ sacyjalnych sietkach nie datyčycca spravy, bo źjaŭlajucca prajaŭleńniem svabody słova. Pradstaŭnik žančyny śćviardžaje, što miedsiastra navat sprabavała vypravić situacyju: zamianić raźbituju ampułu reštkami vakcyny ź inšych doz.
Ułady Niamieččyny paklikali na dadatkovuju vakcynacyju ŭsich, chto naviedvaŭ centr z 5 sakavika da 20 krasavika. U asnoŭnym heta pažyłyja ludzi, sacyjalnyja rabotniki i piedahohi.
Na miedsiastru zaviali kryminalnuju spravu, ale ciapier, akramia manipulacyj z pryščepkami, žančynu padazrajuć u padrobcy dakumientaŭ.
Ciapier čytajuć
«Ženia pahadziŭsia na budoŭlu, a nie vajavać. I tolki kali vyjdzie z zapoju!»: jak pradali ŭ rasijskuju armiju žychara Lozna. Achviara nie adna1
Kamientary