Zatrymali ŭ sałonie pryhažości, usiu kamieru adpravili ŭ karcar. Žurnalistka Hłafira Žuk raspaviała pra 30 sutak na Akreścina
Žurnalistka «Narodnaj voli» Hłafira Žuk vyjšła z Akreścina paśla 30 sutak. Za hety miesiac jaje ni razu nie zvadzili ŭ duš, tolki raz na špacyr i dva dni pratrymali ŭ karcary. Pra svajo znachodžańnie ŭ izalatary dziaŭčyna raspaviała «Našaj Nivie».
Paśla vychadu z Akreścina
Hłafiru zatrymali 29 maja ŭ sałonie pryhažości.
«Ja pryjšła rabić manikiur. Mnie papšykali ruki antysieptykam, majstar uziała instrumient, i tut zachodziać try mužčyny, pakazvajuć administrataru paśviedčańni. I ja ŭžo razumieju, što heta, napeŭna, pa mianie. Padychodziać da mianie: «Hłafira Dźmitryjeŭna? Vy zatrymany, padazrajaciesia va ŭdziele ŭ masavym mierapryjemstvie». Ja spytała, čamu nie zatrymali doma (ja ceły dzień była tam), kab mnie adzieńnie ŭziać z saboj, bo ja ŭ adnoj kašuli. Jany kažuć: tak niecikava».
Za dva tydni dahetul dziaŭčyna aśviatlała sud pa spravie studentaŭ i ŭ sacyjalnych sietkach apublikavała fota natoŭpu pad budynkam suda i svaich kiedaŭ, paśla taho jak uciakała padčas razhonu. Sud paličyŭ heta dokazam pikietu i pryznačyŭ sutki.
Na Akreścina Hłafira sustreła svajo 20-hodździe.
«U nas była butelka minierałki, dziaŭčaty zachavali ź niejkaha pieryjadu, i ŭ dzień narodzinaŭ jany adkryli jaje mnie, jak šampanskaje, i raźlili ŭ žaleznyja kubački. U abied čokalisia kampotam», — apisvaje jana, jak adznačała śviata.
Za miesiac žurnalistku ni razu nie vadzili ŭ duš i tolki adnojčy zvadzili na špacyr. U toj dzień tempieratura była bolš za 30 hradusaŭ i dziaŭčatam dazvolili na 20-30 chvilin pachadzić u dvoryku.
Hłafira raskazvaje, jak jany ratavalisia ad śpioki:
«Tam kamiera nazirańnia, ale nam było ŭsio roŭna, my raspranulisia da bializny, bo było niemahčyma tryvać, i chałodnaj vadoj ablivalisia. Nabirali jaje ŭ butelki i da siabie prystaŭlali. Pili šmat vady z-pad krana».
Pieradačy dziaŭčynie addali na vychadzie. Kamiery, dzie jana znachodziłasia, uvieś čas byli pierapoŭnienyja.
«Ja pryjšła spačatku ŭ dvuchmiesnuju kamieru, tam było čałaviek 13 prykładna. Paśla nas pieraviali ŭ čatyrochmiesnuju, bo nas stała bolš — čałaviek 15. Potym častku etapavali na Baranavičy, i nas — 7 čałaviek — znoŭ zasunuli ŭ dvuchmiesnuju. Kali ludzi stali prychodzić i nas stała 14, pieraviali ŭ čatyrochmiesnuju».
Dvoje sutak Hłafira praviała ŭ karcary. Padčas abiedu da ich pryjšli z pravierkaj, adzin z supracoŭnikaŭ pačaŭ ahladać posud. Na talercy i kubačku jon znajšoŭ nadrapanyja nadpisy i skazaŭ, što ich zrabili dziaŭčaty i adkažuć za heta. Za paŭhadziny da adboju ŭsiu kamieru (7 čałaviek) adpravili ŭ karcar.
Siarod susiedak Hłafiry za hety čas byli pradstaŭnicy roznych prafiesij — hałoŭnyja buchhałtary, archieołah, studentki, kantralor, vychavacielka dziciačaha sadka.
Sama dziaŭčyna paralelna z pracaj vučycca ŭ Instytucie žurnalistyki BDU na 3 kursie.
«Siońnia ŭžo budu adpačyvać, a zaŭtra płanuju pajści daviedacca, ci adličyli mianie albo nie. Usiu siesiju ja adsiedzieła, ni na jaki ekzamien nie patrapiła», — kaža žurnalistka.
-
Šlacham Cichanoŭskaha: redaktarka rajonki i łukašenkaŭski błohier tak zachapilisia prablemami Barysava, što pryjšli da kramolnych vysnovaŭ
-
Dzie ciapier Kirył Kazakoŭ — były kiraŭnik STB, «chrosny baćka» Azaronka i inšych prapahandystaŭ?
-
Biełaruskamoŭny dziciačy časopis «Matulina soniejka» prypyniŭ svoj vychad
Ciapier čytajuć
Koŭł Łukašenku: Tabie treba być bolš aściarožnym, za stałom kiepskich pacanoŭ zastaŭsia adzin ty27
Koŭł Łukašenku: Tabie treba być bolš aściarožnym, za stałom kiepskich pacanoŭ zastaŭsia adzin ty
Časam niečakanaja historyja biełaruskich himnaŭ: «My vyjdziem ščylnymi radami», «Pahonia», «Žyvie Biełaruś», «Radzima maja darahaja», «Mahutny Boža» (ź VIDEA)77
Kamientary