Suchoje małako — turkmienam, a kambajny — u Jeŭropu!

Na sustrečy z rastoŭskim hubiernataram Čubam Łukašenka farmalna prakruciŭ kružełku stratehičnaha partniorstva z Rasijaj. A de-fakta — matyvavaŭ zachodni trend.

Jon akuratna prajšoŭsia pa ŭsim rejestry kryŭdaŭ na Maskvu, zhadaŭ pra kaskad vojnaŭ — ad hazavaj da małočnaj. I reziumavaŭ: «Kožny hod my dyviersifikujem svoj handal, pastupova adychodzim ad Rasii. Čamu tak adbyvajecca? Tamu što nas dušać, sprabujuć vycisnuć z rasijskaha rynku».

Maŭlaŭ, sami vinavatyja, što ŭžo takaja ž dola našaha ekspartu prypadaje na ES. Chacia,

kali razabracca, to ŭ Jeŭropu my honim pieravažna naftapradukty z rasijskaj syraviny. I šalony skačok ekspartu tudy prypaŭ mienavita na pieryjad samych ščodrych datacyj, kali nam pampavali naftu pa «braterskich» cenach.

Uvohule ž zrazumieła, što praz hałavu Čuba Łukašenka apielavaŭ da Miadźviedzieva z Pucinym: hladzicie, chłopcy, možacie šmat stracić! Spadziavańnie najpierš na toje, što spracujuć viadomyja fobii rasijskich elit.

Uvieś čas skraziŭ padtekst: na vas śviet klinam nie syšoŭsia. Vyśvietliłasia, naprykład, što suchoje małako, ad jakoha viernuć nos rasijskija dziejačy, za miłuju dušu ŭziali turkmieny. I zamiežniki pa jaho ŭžo ŭ čarzie stajać. Nu a kali Rasija nie puskaje našy kambajny, to my budziem pradavać sielhastechniku ŭ ES, voś tolki siertyfikaty atrymajem. Fierera-Valdnier abiacała paspryjać.

Ciažka skazać, dzie tut fakt, a dzie blef. Naŭrad ci, naprykład, razbeščanyja jakaściu mašyn niamieckija baŭery nakinucca na pradukcyju «Homsielmaša» ci navat MTZ. Dy i ŭvohule

nie taja zaraz situacyja, kab ažyćciaŭlać ekanamičnuju ekspansiju ŭ Stary Śviet. Chutčej možna ličyć, što jamu dasłany SOS. Zvarot da Jeŭrasajuza pa hrošy (pra što siensacyjna raspavioŭ ministr Charkaviec) — heta znak biady, adčajnaha stanovišča ajčynnych finansaŭ.

U ES jość niejki zahašnik, ale ŭvohule heta nie bank. Inšaja reč, što słova ŭpłyvovych dziejačaŭ hetaj instytucyi, kaniečnie ž, maje vahu i dla bankiraŭ.

Zaciahany ŭžo prykład pra miljad dołaraŭ ad MVF «nazło Rasii» śviedčyć, što Zachad nie curajecca i mietadu pierakupki. Darečy, zaraz dla ES vielmi zručny momant, kab miakka prasoŭvać niekatoryja svaje ŭmovy što da demakratyi i pravoŭ čałavieka.

Kali finansy śpiavajuć ramansy, to ŭ peŭnaj stupieni Minsk moža i «achviaravać pryncypami». Ekśpierty prahnazujuć, što mahčymy sastupki (viadoma ž, nadta dazavanyja) ŭ halinie vybarčaha zakanadaŭstva i svabody presy.

Tym časam rasijskija palitołahi družna pałochajuć Łukašenku, što Jeŭropa jaho zžare i nie padavicca. Namiakajuć na los Miłošaviča i ŭsio takoje.

Ale paśla apošnich «najezdaŭ» krutych maskoŭskich bratanoŭ minskaje načalstva, nie vyklučana, zrabiła vysnovu, što jeŭrapiejskaje «zło», ŭvasoblenaje u dalikatnych prośbach vytančanaj Fierera-Valdnier, moža akazacca mienšym.

ZY. Biełaruskaje načalstva ŭpadabała navat «varožyja hałasy» :) Łukašenka pryvioŭ Čubu prykład: pavodle apytańnia «Recha Maskvy», 80% rasijcaŭ lubiać naša małako!

• 0
• 0
• 0
• 0
• 0
• 0
• 0
• 0