Sudziać dziasiatak bieraściejcaŭ za błakavańnie čyhunki, pudziły i padpały aŭtapakryšak
U sudzie Leninskaha rajona Bresta idzie razhlad kryminalnaj spravy za naŭmysnaje pryviadzieńnie ŭ nieprydatnaść transpartnaha srodku abo šlachoŭ znosin (artykuł 309 KK), a taksama za raźviešvańnie pudził u abłasnym centry (č. 2 artykuła 339 — chulihanstva, ździejśnienaje hrupaj asob), paviedamlaje spring96.org.
Usiaho pa spravie prachodziać dziesiać čałaviek.
Im staviacca ŭ vinu niekalki epizodaŭ: vyviešvańnie pudził u roznych miescach horada, zakidvańnie jajkami i kamianiami apornaha punkta milicyi, padpał nočču na biaźludnaj vulicy aŭtamabilnych pakryšak, razmalavany kijosk «Tabakierka». Usio heta rasceniena jak «złosnaje chulihanstva» (č. 2 art. 339 KK), «asabliva złosnaje chulihanstva» (č. 3 art. 339 KK). Taksama stavicca ŭ vinu złačynstva pa č. 1 st. 309 KK (naŭmysnaje pryviadzieńnie ŭ niepryhodnaść transpartnaha srodku abo šlachoŭ znosin) za zamykańnie čyhunačnych rejek mietaličnaj drotam.
Spravu razhladaje sudździa Alaksandr Siemiančuk.
Častka abvinavačanych užo daŭno pad vartaj. Natalla Barynava była zatrymanaja 15 listapada 2020 hoda; Volha Prastakvaša, Siarhiej Silič, Siarhiej Krasoŭski, Jaŭhien Kambul 11 listapada, Maksim Siluk 26 listapada, Maksim Pyciel 26 listapada. Usie pieraličanyja ludzi pa hety dzień ŭtrymlivajucca ŭ SIZA-7.
Aproč hetaha na chatnim aryšcie z 25.01.2021 znachodzicca Uładzimir Kaciubka, a na Alinu Muratavu takuju ž mieru strymańnia nakłali dniom paźniej.
Sud raspačaŭsia jašče 29 sakavika, adnak tady stała viadoma, što ŭ lik abvinavačanych pa hetaj spravie dadałasia jašče i Maryna Silonak. Tamu byŭ abvieščany pierapynak.
U pracesie sudovych razhladaŭ dziaržabvinavaŭca adznačyła, što pakazańni abvinavačanych adroźnivajucca ad pieršapačatkovych (heta značyć ad taho, što hetyja ž ludzi kazali na etapie śledstva).
Na prośby rastłumačyć supiarečnaści abvinavačanaja Natalla Barynava 9 krasavika ŭ sudzie paprasiła nie ŭličvać svaje pieršapačatkovyja pakazańni, bo jany byli dadzieny joju pad ciskam.
Sa słoŭ žančyny, 17 listapada 2020 śledčyja pahražali joj vialikim turemnym terminam i orhanami apieki, jakija byccam užo afarmlajuć dakumienty na toje, kab adabrać jaje 4-hadovuju dačku. Naohuł u toj dzień jaje dapytvali dvojčy, i abodva razy nie pa tym epizodzie, jaki asabista joj staviać u vinu na sudzie. Pierad druhim dopytam, viačernim, paŭtarylisia pahrozy pra dzicia i surovaje pakarańnie, žančyna płakała. Skarhu na dziejańni śledčych Barynava vyrašyła nie pisać, bo bajałasia jašče bolšaha cisku na jaje i siamju.
Siarhiej Silič zajaviŭ, što prosić nie ŭličvać svaje pakazańni śledstvu, dadzienyja 12 listapada, tamu što ŭ toj momant jon adčuvaŭ mocnyja boli ŭ śpinie i chvalavaŭsia z nahody zatrymańnia svajoj žonki. Voś jak jon tłumačyŭ heta na sudzie 9 krasavika:
«Padčas zatrymańnia ja atrymaŭ traŭmu śpiny, mocna baleła śpina, mnie 2 razy ŭ IČU vyklikali chutkuju. Ja prosta nie chacieŭ havaryć. Hruba kažučy, usio, što ja skazaŭ na tym dopycie — tam praŭdy mała».
Kamientary