Kitaj vymušany prypynić prajekt pa zdabyčy redkich mietałaŭ u Hrenłandyi paśla miascovych vybaraŭ

Apošnim časam uzrasła cikavaść ZŠA, Kitaja i ES da Hrenłandyi, jakaja pieražyvaje transfarmacyju ŭ vyniku źmieny klimatu. Pavyšeńnie tempieratury i rastavańnie lodu stvaryli mahčymaści dla novych sudnachodnych maršrutaŭ u arktyčnych morach, a taksama dla zdabyčy karysnych vykapniaŭ, piša The Wall Street Journal.

Kitajski hihant pa zdabyčy redkaziamielnych mietałaŭ Shenghe Resources Holding i aŭstralijskaja firma ŭžo voś-voś musili pačać budavać šachtu na paŭdniovym uźbiarežžy vostrava, adnak urad Hrenłandyi abviaściŭ daterminovyja vybary na fonie sprečak nakont upłyvu kitajskaha prajekta na navakolnaje asiarodździe.

7 krasavika stała viadoma, što pieramohu atrymała levaja praekałahičnaja partyja Inuit Ataqatigiit, atrymaŭšy 37% hałasoŭ. Kiraŭničaja partyja Siumut nabrała ŭsiaho 29% hałasoŭ — a mienavita hetaja partyja padtrymlivała ideju zdabyčy karysnych vykapniaŭ kitajcami.

Pry realizacyi hrenłandskaha prajekta Piekin moh by ŭzmacnić svoj kantrol nad rynkam redkaziamielnych mietałaŭ — syravinaj, nieabchodnaj dla vytvorčaści batarej i mahnitaŭ. Hłabalny popyt na redkaziamielnyja mietały pavialičvajecca pa miery taho, jak krainy imknucca vykanać svaje abaviazacielstvy pa Paryžskim klimatyčnym pahadnieńni, da jakoha vyrašyli dałučycca i ZŠA.

Na siońnia bolš za 70% redkaziamielnych mietałaŭ śvietu zdabyvajecca ŭ Kitai, kitajskaja kampanija Shenghe Resources Holding źjaŭlajecca adnym z najbujniejšych vytvorcaŭ. U 2016 hodzie Shenghe Resources Holding stała najvialikšym akcyjanieram aŭstralijskaj kampanii Greenland Minerals. Pa źviestkach Greenland Minerals, kitajski prajekt u Hrenłandyi pakryŭ by 10% suśvietnaj patreby ŭ redkich mietałach.

U Hrenłandyi jość šmat radoviščaŭ uranu, zdabyča jakoha, niepakojacca miascovyja žychary, moža parušyć niekranuty pryrodny łandšaft i naškodzić fiermieram. 

Majłz Haj, finansavy dyrektar Greenland Minerals, adznačaje, što ŭ prajekt było inviestavana $99 miljonaŭ. Adnak pradstaŭniki partyi, jakaja pieramahła na vybarach, pierakananyja, što zdabyča karysnych vykapniaŭ stanie ekałahičnaj katastrofaj dla Hrenłandyi.

U toj ža čas realizacyja kitajskaha prajekta, paradaksalna, mahła b adkryć Hrenłandyi šlach da niezaležnaści. Vostraŭ maje status aŭtanomii ŭ składzie Danii, jakaja štohod subsiduje Hrenłandyju ŭ pamiery $623 miljony dla finansavańnia asnoŭnych pasłuh. Kab abviaścić niezaležnaść ad Danii, Hrenłandyi, jakuju nasialaje 56 tysiač žycharoŭ, nieabchodna znajści inšuju krynicu dachodu, kab kampiensavać stratu dackaha finansavańnia.

Majłz Haj śćviardžaje, što kitajska-aŭstralijski prajekt prynosiŭ by hrenłandcam $200 miljonaŭ štohod. Da taho ž, źjaviacca sotni pracoŭnych miescaŭ.

Tamu novaja partyja nie vyklučaje całkam mahčymaść zdabyvać karysnyja vykapni na terytoryi vostrava. Adnak kiraŭniki partyi vystupajuć za raspracoŭku inšaha prajekta — u punkcie, bolš addalenym ad zasielenaj terytoryi vostrava.

• 0
• 0
• 0
• 0
• 0
• 0
• 0
• 0