Jašče 23 kryminalnyja spravy pa zajavach ab katavańniach u Biełarusi mohuć być zaviedzienyja ŭ krainach ES
Daradca Śviatłany Cichanoŭskaj Alaksandr Dabravolski raspavioŭ ab padačy novych spraŭ pa ŭniviersalnaj jurysdykcyi ŭ Litvie, Polščy i Čechii.
«U śniežni ŭžo była zaviedzienaja adna sprava pa ŭniviersalnaj jurysdykcyi, u jakoj paciarpiełym pryznany biełarus Maksim Charošyn. U najbližejšy čas u Litvie my rychtujem da padačy try spravy. Pa adnoj paciarpiełaja — hramadzianka Litvy biełaruskaha pachodžańnia. Jašče dźvie spravy — pa zajavie biełarusaŭ, jakija padvierhnulisia katavańniam.
Usie, chto staŭ achviaraj padobnaha hvałtu, mohuć padavać dakumienty ŭ litoŭskuju palicyju — i spravy buduć rasśledavacca. Ciapier u Litvie i inšych krainach šmat biełarusaŭ, jakim daviałosia pakinuć radzimu paśla katavańniaŭ i pieraśledu. Jany pavinny viedać, što ŭ ich jość mahčymaść damahčysia pravasudździa.
U Polščy padrychtavana 10 spraŭ. Paralelna viaducca rasśledavańni pa katavańniach u dačynieńni da hramadzian Polščy, jakija apynulisia ŭ Biełarusi padčas pratestaŭ. Śviedkami prachodziać hramadzianie Biełarusi, ale jany mohuć być pryznanyja i paciarpiełymi.
U Čechii padrychtavanyja da padačy jašče 10 spraŭ. Paciarpiełymi vystupajuć biełarusy, jakija prachodzili ŭ Čechii reabilitacyju paśla žorstkich źbivańniaŭ i katavańniaŭ siłavikami ŭ Biełarusi.
Nad zboram i padrychtoŭkaj spraŭ pracuje inicyjatyva BYPol. Jaje supracoŭniki rychtujuć dakumienty, praviarajuć pakazańni i pravodziać papiaredniuju pravierku».
Kamientary