Deputaty Pałaty pradstaŭnikoŭ 18 śniežnia adrazu ŭ dvuch čytańniach pryniali zakonaprajekt «Pra źmianieńnie Padatkovaha kodeksu Respubliki Biełaruś». Radyjo Svaboda praanalizavała źmieny.
Jakija padatki vyrastuć
- Padatak na prybytak aperataraŭ mabilnaj suviazi — da 30% (było 18%).
- Padachodny padatak rezydentaŭ Parku vysokich technalohij — da 13% (było 9%).
- Adziny padatak ź indyvidualnych pradprymalnikaŭ u Miensku dazvolili pavialičvać u 4 razy, u abłaściach — u 2 razy (raniej miascovyja ŭłady mieli prava staŭki źmianšać).
- Akcyzy na cyharety — da 15%
- Płata za ramieśnictva i ahraturyzm — 2 bazavyja (była 1) — da 54 rubloŭ.
- Arenda i ziamielny padatak z handlovych centraŭ — 1,5% (było 0,7%).
Uvodziać płatu za pierasiačeńnie miažy na aŭtamabili.
Transpartny padatak buduć spahaniać biez pryviazki da techahladu.
Staŭki padatkaŭ taksama indeksujuć z papraŭkaj na inflacyju.
Taksama zakonam praduhledžvajecca pavyšeńnie padatkaŭ dla fizyčnych asobaŭ i IP. Za repetytarstva ŭ Minsku planujuć padniać płatu da 40 rubloŭ (ciapier 36 rubloŭ), u abłasnych haradach da 35 rubloŭ (ciapier hety zbor, naprykład, u Minskim rajonie — 27 rubloŭ). Adziny padatak za raspracoŭku sajtaŭ planujuć padniać da 116 rubloŭ (ciapier 97 rubloŭ).
Paśla padniaćcia akcyzaŭ da 15% surjozna mohuć padaražać cyharety i alkahol. U biudžecie na 2021 hod planujecca atrymać 19,5 miljarda dachodaŭ ad padatkaŭ. U biudžecie na 2020 hod dachod ad padatkaŭ byŭ bolšy — 19,8 miljarda.
«Dla biznesu važnaja pradkazalnaść, a ŭ Biełarusi z hetym prablemy»
U Biełarusi ŭvieś čas mianiajucca ŭmovy dla biznesu, što dla biznesu vielmi istotna. Na heta źviartaje ŭvahu dyrektar daśledčaha centru IPM Alaksandar Čubryk.
«U raźvitych krainach padatki vyšejšyja, ale tam pradkazalnaja sytuacyja: vykonvajucca zakony, investary abaronienyja. U nas uvieś čas mianiajecca zakanadaŭstva, ciapier voś mianiajecca padatkovaje. Heta stvaraje dadatkovyja składniki niepradkazalnaści, nie spryjaje tamu, kab biznes trymaŭsia za Biełaruś. Ułady pakazvajuć, što siońnia jany paabiacali adno, a zaŭtra pieradumali», — kaža Alaksandar Čubryk.
Pavyšeńnie padatkaŭ, na dumku eksperta, moža dapamahčy atrymać dadatkovyja pastupleńni ŭ biudžet. Ale heta moža spracavać «tolki ŭ karotkaj perspektyvie».
«U doŭhaterminovaj perspektyvie heta moža dać advarotny efekt. Kali ajcišnikam źmieniać umovy i dla ich budzie ahulny padatkavy režym, heta pryciśnie sferu na peŭny čas. Biznes moža pajści ŭ cień, moža źjechać z krainy», — havoryć ekanamist.
«Heta pakarańnie dla siaredniaj klasy ad uładaŭ»
Pavyšeńnie padatkaŭ nie ŭratuje ekanomiku, miarkuje kiraŭnik centru Mizesa Jarasłaŭ Ramančuk. Na jaho dumku, taki krok vyhladaje pakarańniem dla niezadavolenych.
«U sytuacyi, kali biznesu nie chapaje abarotu, dzirka ŭ biudžecie, u pałovy biełarusaŭ niama nijakich aščadžeńniaŭ, — i tut padvyšeńnie padatkaŭ, heta vyhladaje jak palityčna-karnaja miera. Pakarać siaredniuju klasu za revalucyju. Biełaruskaja ŭłada ŭsio robić, kab źniščyć siaredniuju klasu. Buduć źjaždžać ludzi, buduć pakidać aktyvy, ale ŭładzie heta nie balić, jany za heta hrošaj nia płaciać», — kaža Jarasłaŭ Ramančuk.
Pavyšeńnie padatku pryviadzie taksama da paharšeńnia stanu ekanomiki, ličyć jon.
«Apošnija 5 hadoŭ biznes kaža pra ciažar padatkaŭ, a ŭrad jašče pavyšaje ich», — dadaje Jarasłaŭ Ramančuk.
«Inšyja krainy źmianšajuć ciažar dla biznesu»
Padčas pandemii mnohija krainy vydzielili srodki, kab padtrymać biznes u ciažkich umovach. Navat u Kitai padatki pačali źmianšać, pryvodzić prykład Jarasłaŭ Ramančuk. U mnohich krainach na fonie pandemii ŭvodzili padatkovyja vakacyi. U Biełarusi takich zachadaŭ nie było.
-
«Heta byŭ pryton». Muž i žonka ŭziali «zabituju kvateru», ukłali ŭ jaje 35 tysiač i ciapier žyvuć biaspłatna
-
Kamary ŭ Biełarusi mohuć być niebiaśpiečniejšymi, čym zdajecca
-
Palavod kałhasa «Čyrvony bajec» z mahiloŭskaha Kiraŭska pierasieŭ ź siejałki na tank, a potym — na bajavy mapied. I pajechaŭ šturmavać Zaparožža
Kamientary