U interniet trapiła VIDEA znutry aŭtazaka i pahonia, źniataja ad asoby siłavika

U telehram-kanale By_Pol źjaviłasia spasyłka na rolik, zmantavany z zapisaŭ nacielnych kamier siłavikoŭ, zroblenych hetaj vosieńniu: tam možna nazirać abychodžańnie z zatrymanymi ŭ aŭtazaku, razhon natoŭpu pratestoŭcaŭ kala Centralnaha RUUS Minska i zatrymańni na praśpiekcie Niezaležnaści. Jakim čynam hetyja zapisy trapili ŭ šyroki dostup, nieviadoma, piša Tut.by.

Pieršaje videa źniata ŭ aŭtazaku. Datu zdymki składana vyznačyć, ale ŭsio adbyvajecca nie raniej za kastryčnik — usie zatrymanyja ludzi ŭ ciopłaj vopratcy. U sałonie znachodziacca 7-10 siłavikoŭ. U aŭtazak pryvodziać usie novych i novych zatrymanych mužčyn, u vyniku ich tam akazvajecca bolš za dziasiatak. Bolšaść stajać na kaleniach na padłozie. Pamiž saboj pra adnaho z zatrymanych siłaviki kažuć, što ŭ jaho binty na rukach i jon chadziŭ z fłahštokam-vudaj.

Zatym pryvodziać mužčynu, jaki, miarkujučy pa hołasie, užo paciarpieŭ. Jon emacyjna pytajecca: «Navošta mianie łamać, ja ž ničoha nie rablu?» Jaho bjuć dubinkaj dvoje siłavikoŭ — toj stohnie i kaža, što jamu baluča. U nastupnym uryŭku aŭtazak užo jedzie, a adzin z supracoŭnikaŭ pačynaje razmaŭlać sa źbitym zatrymanym. Kali toj apuskaje vočy, supracoŭnik z dapamohaj dubinki padymaje jaho hałavu, kažučy pry hetym niekalki razoŭ: «Narmalna było skakać?» Kali toj udakładniaje, kudy skakać, amapaviec zadaje pytańnie: «Kudy ty skakaŭ? A čaho zaviazanyja ruki i farbaj palityja?» Dalej na praciahu pajezdki siłavik praciahvaje «razmaŭlać» z zatrymanym, niekalki razoŭ bje jaho pa hałavie i tvary, a jaho kalehi vyvučajuć źmieściva telefonaŭ inšych mužčyn, jakija trapili ŭ aŭtazak.

Druhoje videa, miarkujučy pa rakursie, źniata nahrudnaj kamieraj adnaho z supracoŭnikaŭ milicyi ŭ rajonie staličnaha Centralnaha RUUS. Na im jość data — 25 kastryčnika. Tady, miarkujučy pa zajavach pradstaŭnikoŭ MUS, na budynak byŭ ździejśnieny napad z boku pratestoŭcaŭ.

Možna nazirać, jak z kałony pratestoŭcaŭ u bok milicyi śvieciać mahutnyja łaziernyja ŭkazki, adnak adkrytaha supraćstajańnia nie nazirajecca. Uryŭki z hetaha ci padobnych videa vykarystoŭvali pravaachoŭnyja orhany ŭ siužetach pra padziei taho dnia: siłaviki kidajuć śviatłošumavyja hranaty i pačynajuć ruchacca ŭ bok pratestoŭcaŭ, taksama čutnyja huki, padobnyja na streły. Kali jany nabližajucca da ludziej, čutnyja patrabavańni lehčy.

Treciaje videa źniata 1 listapada paśla 14 hadzin (heta možna zrazumieć pa płašcy z dataj i časam u nižnim pravym kucie). Zapis zrobleny pamiž stancyjami mietro «Maskoŭskaja» i «Uschod», u kadr traplaje budynak Nacyjanalnaj biblijateki. Mienavita ŭ hetym rajonie ŭ hety dzień paviedamlałasia ab zatrymańniach. U niadzielu pratestoŭcy sprabavali dajści maršam da Kurapataŭ. Supracoŭniki AMAPa znachodziacca ŭ mašynie milicyi (u rukach u adnaho možna ŭbačyć pradmiet, padobny na piarcovy bałončyk), za rulom čałaviek u formie DPS.

Mašyna sprabuje dahnać pratestoŭcaŭ, ludzi ŭzhadniajuć svaje dziejańni pa racyi. Zatym mašyna spyniajecca, siłaviki vybiahajuć ź jaje i dapamahajuć złavić ludziej. Jany žorstka zatrymlivajuć chłopca, sadžajuć jaho ŭ sałon mašyny, absypajučy pry hetym łajankaj — toj stohnie ad bolu. Telefon u chłopca zabrali, hruba pytajucca, što ŭ zaplečniku. Charakterna, što zatrymany vietliva prosić u supracoŭnika milicyi: «Dazvolcie, ja zdymu».

• 0
• 0
• 0
• 0
• 0
• 0
• 0
• 0