Žurnalistku Tut.by sudziać za toje, što jana stajała na «pikiecie». Ale nijakaj akcyi ŭžo nie było

20 listapada ŭ sudzie Centralnaha rajona pačaŭsia praces pa spravie žurnalistki Tut.by Julii Alhierčyk. Jana była zatrymanaja pozna ŭviečary 15 listapada ŭ rajonie vulicy Čarviakova, dzie siłaviki razahnali akcyju pratestu i patrulavali dvary i damy miascovych žycharoŭ. Julija prybyła na płošču Pieramien paśla 20 hadzin, nijakich mitynhaŭ u toj momant užo nie pravodziłasia. Jana pahutaryła z rabotnikami kramy «Hipa», dzie było brutalnaje zatrymańnie dniom, z supracoŭnikami milicyi ŭ ačapleńni, kamunalnymi słužbami. Prykładna ŭ 21:23 jaje zatrymali supracoŭniki AMAPa, u pratakole paznačany inšy čas. Milicyjant u mascy i sa źmienienym imiem kaža, što Alhierčyk stajała siarod mitynhoŭcaŭ, u jakich byli bieł-čyrvona-biełyja ściahi, piša Tut.by.

Pavialičyć

Julija Alhierčyk vinu nie pryznaje. Kaža, što prybyła ŭ rajon Čarviakova pa zadańni redakcyi, kab pahladzieć, što adbyvajecca ŭ rajonie paśla brutalnych zatrymańniaŭ. Spačatku Julija pahutaryła z rabotnikami kramy «Hipa», dzie siłaviki zatrymlivali ludziej dniom. Paśla hetaha nakiravałasia da płoščy Pieramien, dzie pracavali tolki siłaviki i kamunalnyja słužby. Razam ź Julijaj była jaje 15-hadovaja dačka.

— Ja była dziažurnym žurnalistam u toj dzień. I viedała, što ŭ toj čas užo nijakaha mitynhu tam niama, — tłumačyć Julija. — Tamu ja ŭziała z saboj dačku, paśla my pavinny byli zajechać razam u kramu.

Pa pratakole Julija ŭdzielničała ŭ pikiecie z 20:20 da 20:30, adnak u sud pradstaŭleny ček z kaviarni, dzie ŭ 20:46 Julija z dačkoj kupili dźvie kavy i desiert. Akramia taho, sudu pradstaŭlena videanazirańnie ź bližejšych damoŭ, dzie taksama vidać, što ŭ pakazany čas nijakich akcyj pratestaŭ, u tym liku sa ściahami, nie prachodziła. U pratakole jość adznaka ad Alhierčyk: «Chaču dadać ułasnaručna, što ja była zatrymanaja ŭ 20:30».

Julija patłumačyła ŭ sudzie, što ŭnieści takuju adznaku joj paraiŭ inśpiektar ISN, jaki apytvaŭ jaje, pakolki ŭ RUUS paśla zatrymańnia dastavili i jaje dačku.

— Hetaja adznaka nie adpaviadaje rečaisnaści, mianie ŭvioŭ u zman inśpiektar ISN. Kali znachodzišsia ŭ razhublenaści, nie daj boh pabyvać u takich umovach, — zajaviła žurnalist.

Tłumačeńni ŭ sudzie daje supracoŭnik RUUS Centralnaha rajona Ivanoŭ Ivan Ivanavič, heta vydumanaje imia. Adnak u sudzie prahučaŭ numar jaho nahrudnaha znaka — P 62167. Taksama milicyjant paviedamiŭ sudu svoj rost — 190 sm.

Tak zvany Ivanoŭ nastojvaje, što jon nie pamyliŭsia, mienavita Alhierčyk parušyła zakon u rajonie płoščy Pieramien. Nie ŭsie abstaviny milicyjant pamiataje, kaža, «kožny dzień niasiom słužbu, šmat padziej».

— Amapaŭcy, kali zatrymlivali nas, skazali, što aficer raźbiarecca ŭ RUUS, — źviartajecca Julija da śviedki. — Ja dzicia supakojvała. A potym my ŭ RUUS sfatahrafavali pratakoł, u jakim paznačana, što ja brała ŭdzieł u pikiecie, jakoha nasamreč nie było. I majo dzicia spytała: «Jak tak?» Jana ž usio bačyła. Dzicia, u jakoha ciapier farmujecca mierkavańnie ab siłavikach, sudach. I vy možacie kazać, što ja ŭdzielničała ŭ pikiecie? Jak vam nie soramna? Zakryvajecie tvar maskaj.

Sudździa ŭdakładniła, čamu Julija była biez žurnalisckaha bejdža pry zatrymańni.

— Apošnija dva miesiacy na žurnalistaŭ viadziecca palavańnie — patłumačyła Julija. — Heta ŭ mianie dzicia niepaŭnahadovaje, u horšym vypadku mnie mohuć dać štraf. A maje ciapier siadziać na Akreścina, u Mahilovie i Žodzinie. Paznačać siabie na akcyi — ryzykavać svaim zdaroŭjem. Amapaŭcam pustaja sprava niešta dakazvać, jašče pałkaj pa śpinie daduć.

U vyniku spravu adpravili na dapracoŭku.

• 0
• 0
• 0
• 0
• 0
• 0
• 0
• 0