Paśla słoŭ Ordy pra padtrymku Łukašenki pracoŭnymi źjaviłasia zajava pra masavy vychad z prafsajuzaŭ
Dyrektar Hrodzienskaha centralnaha spartovaha kompleksu «Nioman» Viktar Šumiel napisaŭ adkryty list da kiraŭnika štaba Łukašenki Michaiła Ordy. Jon, jak i mnohija kalehi, aburyŭsia słovami Ordy pra ahulnuju padtrymku dziejnaha prezidenta prafsajuzami i źbirajecca vyjści z abjadnańnia.
Viktar u adkrytym liście źviartaje ŭvahu, što padčas łukašenkaŭskaha kiravańnia pravy pracoŭnych uščamlalisia. Heta i padatak na darmajedstva, i pavyšeńnie piensijnaha ŭzrostu, i niedachop srodkaŭ indyvidualnaj abarony ŭ daktaroŭ.
«Ja baču staŭleńnie da fiederacyi prafsajuzaŭ jak da krynicy finansavańnia, a nie adstojvańnia pravoŭ jaje členaŭ.
Nie vypadkova ž u pieryjad pieradvybarčaj ahitacyi aktyvizavalisia «ekskursijnyja» pajezdki pa krainie?» — piša dyrektar. I prosić fiederacyju zachoŭvać niejtralitet padčas vybarčaj kampanii.
Viktar raskazvaje, što ŭ ich arhanizacyi ŭ prafsajuzie było kala 150 čałaviek. Paśla słoŭ Ordy tracina napisała zajavy ab vychadzie.
«Niezadavolenaść była i raniej, ale heta stała iskraj, — kaža Šumiel. — Maju pazicyju vyšejšaje kiraŭnictva viedaje. I mierkavańni ludziej ja im taksama danosiŭ.
Ale pabačyŭ, što nas nie čujuć — prosta chočuć cichieńka viarnuć na svoj šlach».
Viktar ličyć, što sioleta šmat budzie zaležać ad mierkavańnia kožnaha, tamu varta vykazvacca adkryta.
Sam jon u hetaj kampanii padtrymlivaŭ Viktara Babaryku, pakul jaho nie źniali z honki.
Spartkompleks Viktar uznačalvaje z 2017 hoda. Pra toje, što paśla hučnaj zajavy moža stracić pasadu, vydatna razumieje.
«Pra novaje miesca na hety vypadak daŭno dumaŭ. Ja ž nie durny čałaviek, znajdu pracu», — spakojna stavicca jon.
Litoviec Vitalijus Mockus zaniaŭ pasadu Stryžaka ŭ «Bajsole». Chto heta taki?34
Kamientary