Paśla pratestaŭ u Hruzii zatrymali piać čałaviek. Premjer abviaściŭ ab pravale piataj sproby majdanu

Jak paviedamiŭ namieśnik ministra ŭnutranych spraŭ Hruzii Alaksandr Darachvielidze, zatrymany člen partyi «Adziny nacyjanalny ruch», były hienprakuror Hruzii Murtaz Zadziełava, člen hetaj ža partyi Iraklij Nadziradze, hienieralny sakratar partyi «Stratehija Ahmašeniebieli» Paata Mandžhaładze, były namieśnik kiraŭnika Hienštaba US Hruzii Łaša Bierydze i opierny śpiavak, zasnavalnik pratestavaha ruchu «Praśpiekt Rustavieli» Paata Burčuładze, piša «Nastojaŝieje Vriemia».

Im vystaŭlenyja abvinavačvańni ŭ zaklikach da nasilnaha źmianieńnia kanstytucyjnaha ładu, a taksama ŭ arhanizacyi, kiraŭnictvie i ŭdziele ŭ hrupavym hvałcie. Pavodle hetych artykułaŭ im pahražaje da dzieviaci hadoŭ pazbaŭleńnia voli.

Kiraŭnik MUS Hieła Hieładze zajaviŭ žurnalistam, što zatrymańni buduć praciahnutyja.

Raniej pres-słužba Ministerstva achovy zdaroŭja Hruzii paviedamiła, što ŭ chodzie pratestaŭ paciarpieli šeść demanstrantaŭ i 21 palicejski.

Na hetym fonie premjer-ministr Hruzii i lidar kirujučaj partyi «Hruzinskaja mara» Iraklij Kabachidze zajaviŭ ab pravale «sproby źviaržeńnia ŭłady» i nahadaŭ pra płany «Hruzinskaj mary» zabaranić partyju byłoha prezidenta Michaiła Saakašvili «Adziny nacyjanalny ruch» i šerah inšych apazicyjnych abjadnańniaŭ.

Pa słovach premjera, za apošnija čatyry hady «Nacruch» piać razoŭ rabiŭ sproby źviaržeńnia ŭłady, arhanizacyi «majdanu» i ŭniasieńnia biesparadkaŭ u krainu, na što ŭłady «dali adekvatny adkaz». Kabachidze padkreśliŭ, što nieabchodna kančatkova «niejtralizavać» tak zvany «kalektyŭny Nacruch», kab u Hruzii ŭstalavałasia «zdarovaja demakratyčnaja palityčnaja sistema».

Kamientujučy municypalnyja vybary, premjer adznačyŭ «biesprecedentnuju padtrymku» kiraŭničaj partyi. 

4 kastryčnika ŭ Hruzii prajšli vybary ŭ orhany miascovaha samakiravańnia; ich bajkatavaŭ šerah bujnych apazicyjnych sił, u tym liku «Adziny nacyjanalny ruch». Častka apazicyi anansavała schod u centry Tbilisi z metaj «mirnaha źviaržeńnia ŭłady».

Uviečary ŭdzielniki akcyi pasprabavali zachapić prezidencki pałac u Tbilisi. Častcy demanstrantaŭ udałosia praniknuć u dvor — jaho płot byŭ razburany. Śpiecnaz vykarystaŭ pieračny sprej, ślezaciečny haz i vadamiot dla abarony pałaca.

Va ŭmovach bajkotu z boku najbujniejšych apazicyjnych partyj na vybarach upeŭnienuju pieramohu atrymała kirujučaja partyja «Hruzinskaja mara».

U maštabach usioj krainy za «Hruzinskuju maru», zhodna z danymi CVK, prahałasavali 81,7% vybarščykaŭ. U Tbilisi dziejučy mer Kacha Kaładze nabraŭ 71,5% hałasoŭ.

• 1
• 0
• 0
• 0
• 0
• 0
• 2
• 0