Dudzinski i Rajeckaja nie buduć vieści «Słavianski bazar». Viadučy stajaŭ u čarzie ŭ Symbal.by
Dzianis Dudzinski i Kaciaryna Rajeckaja sioleta nie buduć vieści «Słavianski bazar». Pra toje, što fest projdzie bieź ich, para daviedałasia ŭ piatnicu. Pryčyna situacyi — chutčej za ŭsio dopis Dzianisa pra zatrymańni kala kramy Symbal.by, piša Tut.by.
Dla Dzianisa Dudzinskaha ciapierašni «Słavianski bazar» pavinien byŭ stać 15-m, dla Kaciaryny Rajeckaj — piatym.
— Pa-mojmu, u piatnicu nam patelefanavała naš vydatny režysior, jakuju my vielmi lubim, i ź jakoj nieadnarazova supracoŭničali. U hetym hodzie jana adkazvaje za darosły konkurs, — kaža Dzianis Dudzinski. — Skazała, što jana była vielmi zasmučanaja, ale sioleta my nie ŭdzielničajem [u «Słavianskim bazary»].
Na pytańnie, ci patłumačyli, što zdaryłasia, Dzianis adkazvaje pytańniem: «Navošta?»
— My darosłyja ludzi. My razumieli, raz nas źniali ź inšych mierapryjemstvaŭ, to značyć, na padychodzie budzie i «Słavianski bazar», — razvažaje surazmoŭca.
Chutčej za ŭsio pryčyna situacyi, jakaja skłałasia — dopis Dzianisa pra zatrymańni kala kramy Symbal.by. Paśla taho, jak viadučy vykazaŭsia ŭ sacsietkach, prychilniki pierastali bačyć jaho ŭ efiry «Dobraj ranicy Biełaruś». Šoŭmien kaža, što ŭ prahramie ŭ jaho biesterminovy adpačynak. Jak doŭha ŭsio heta budzie doŭžycca, nie viadoma.
— Dzianis, a jak vy razumiejecie, čamu Kaciarynie nielha vieści «Słavianski bazar», jana ž nie vykazvałasia ŭ sacsietkach?
— Jana jak žonka dziekabrysta pajšła śledam, padtrymaŭšy muža, — adkazvaje surazmoŭca. — Jana da hetaha pastaviłasia z razumieńniem. Jana mianie lubić i zaŭsiody va ŭsim padtrymlivaje. Budziem spadziavacca na nastupny hod.
— Nie paškadavali, što napisali hety dopis?
— Ni ŭ jakim razie. Ja darosły 46-hadovy mužčyna, jaki adkazvaje i za svaje słovy, i za svaje ŭčynki. Toje, što było skazana, było skazana. Kali treba, ja mahu heta paŭtaryć. Bić ludziej upiacioch — nielha. Bić žančyn — nielha. Haniacca z dubinkaj za babulaj pa dvarach — nielha. Usio roŭna, ty chulihan sa dvara abo amapaviec. Nielha. Ja hatovy adkazvać za toje, što ja baču na svaje vočy. Nie treba sprabavać mnie rastłumačyć, što ja ŭciahnuty ŭ niejkuju palityčnuju hulniu. Nie. Ja [skazaŭ] pra toje, što ja baču.
Ciapier čytajuć
Na Minskim paŭmarafonie pamior 50‑hadovy biahun. Voś što viadoma pra Alaksieja Dašynieviča3
Kamientary