Kreml rychtuje razmovu sa ślizkim chaŭruśnikam

Siońnia Łukašenka pavinšavaŭ kiraŭnika Abchazii Siarhieja Bahapša z 60-hodździem. Ale Suchumi — a hałoŭnaje, Maskva — čakaje inšaha. Intryha vakoł prablemy pryznańnia kaŭkazskich respublik zakručvajecca ŭsio tužej.

Napiaredadni, viarnuŭšysia z Łondana, rasijski prezident najpierš — nu zdahadajciesia! — kaniečnie ž, paśpiašaŭsia dakłaści pra kamandziroŭku staršyni Najvyšejšaj dziaržrady sajuznaj dziaržavy. “Miadźviedzieŭ painfarmavaŭ Łukašenku ab vynikach łondanskaha samitu dvaccatki” — vyniesła ŭ zahałovak BIEŁTA.

Praŭda, na sajcie rasijskaha prezidenta, dzie viadziecca pachvilinnaja chranałohija jaho dziejnaści, pra hety dakład ni słova. Za 3 sakavika zafiksavana tolki adna telefonnaja hutarka — ź Nietańjachu.

Tak što, mahčyma, razmova ź biełaruskim kaleham była karotkaja. U hetym kantekście navodzić na rozdum fraza BIEŁTA, što

baki “damovilisia pra asabistyja dvuchbakovyja kantakty nieŭzabavie”. Złyja na jazyk kamientatary ŭžo zrabili vysnovu: Łukašenku vyklikajuć na dyvan.

Napiaredadni rasijskaja presa pierajmałasia z taje nahody, što ŭ paradku dnia adkrytaj 2 krasavika siesii Pałaty nie akazałasia pytańnia pra Paŭdniovuju Asieciju dy Abchaziju. “Kommiersant” źliŭ infu, što nieŭzabavie sa ślizkim chaŭruśnikam budzie surjoznaja havorka.

Naturalna, Łukašenka zacikaŭleny ciahnuć ryzinu kolki možna. Prablema ŭ tym, što nadta chutka kančajucca hrošy.

Paspality lud nie zdahadvajecca, što staić za eŭfiemizmam “udakładnieńnie biudžetu”. Ekanamist Jarasłaŭ Ramančuk biez ekivokaŭ davodzić: nasamreč rychtujecca siekviestr, i vielmi značny.

Jon nahadvaje: pavodle pryniataha ŭ listapadzie zakona, dachody kansalidavanaha biudžetu musili skłaści Br73,9 trłn., abo $34,8 młrd. pa “starym” kursie (da oba-na-devalvacyi 2 studzienia). Z ulikam mierkavanaha siekviestru (aficyjna nazvanaha “prajektam udakładnienaha biudžetu”) dachody płanujucca ŭ abjomie Br62,8 trłn. Pry lohka prahnazavanaj dalejšaj devalvacyi — ekanamist prapanuje ŭziać sioletni siaredniehadavy kurs dołara na uzroŭni Br3.300 — dołaravy ekvivalent dachodnaj častki kansalidavanaha biudžetu składzie $19 młrd.

Takim čynam, robić vysnovu Ramančuk, de-fakta dachody skarociacca na $15,8 młrd. Ledźvie nie napałovu! “Z raschodami situacyja składvajecca jašče bolej dramatyčna: jany mohuć źmienšycca až na 17 miljardaŭ dołaraŭ” — dadaje ekśpiert.

Pakul što havorka ab prajekcie, jaki Sidorski prezientavaŭ 2 krasavika Łukašenku. Niejkija ličby mohuć źmianicca, ale naŭrad ci istotna. Bo padciskajuć realii.

Karaciej, rychtujecca najvialikšaje zaciahvańnie pajasoŭ za ŭsiu epochu Łukašenkavaha kiravańnia.

Krynicy padatkaŭ i valutnaj vyručki vysychajuć. Ekspart tavaraŭ sioleta ŭpadzie najchutčej što na 45-50%. Zastajecca prasić pazyki. Rasija nie admović sabie ŭ zadavalnieńni tužej zaciahnuć kredytnuju piatlu. A potym pačnie brać kavałkami ŭłasnaści, prahnazujuć niezaležnyja ekanamisty.

Situacyja dramatyzujecca tym, što Jeŭropa adšpilvać hrošy prosta tak — hruba kažučy, pierakuplać Łukašenku — nie źbirajecca. A jaje džentlmienski nabor umoŭ — jak siarpom pa mołacie. Ale ž i zdavać haspadarstva Maskvie nie chočacca.

Što ŭ suchoj astačy?

Łukašenka pradoŭžyć manieŭravać, starajučysia sastupać minimum jak Maskvie, tak i Jeŭraźviazu. Uzrovień žyćcia ŭ krainie budzie prykmietna prasiadać. Ułada robić staŭku na zvyčku narodu tryvać da apošniaha. Jamu buduć davodzić, što zastałosia pieratryvać nu samaje kaliva. Karaciej, u duchu “biełarusy buduć žyć kiepska, ale niadoŭha”.

Revalucyi, na jakuju katory hod iluzorna raźličvaje (ci robić vyhlad, što raźličvaje) tytulnaja apazicyja, na dalahladzie nie bačna. Niezaležnaja sacyjałohija heta jaskrava paćviardžaje. Paspality lud trymajecca paradyhmy vyžyvańnia chto jak moža.

• 0
• 0
• 0
• 0
• 0
• 0
• 0
• 0