«Šviedski šlach» dyskredytuje siabie. U razy bolš pamierłych, čym u susiednich krainach
Nichto nie moža pradkazać kancavy punkt pandemii. Nie vidavočna, jaki padychod baraćby ź joj najlepšy. Mnohija vysnovy robiacca na chadu, krainy ŭdakładniajuć svaje stratehii.
Usio bolš niezadavolenych hałasoŭ hučać u Šviecyi, jakaja adzinaj siarod krain Jeŭrasajuza vybrała šlach minimalnych karancinnych mier. Tak, u krainie byli zakrytyja ŭniviersitety, ale praciahvajuć pracavać škoły. Nie zakryli ŭłady Stakholma i miescy hramadskaha charčavańnia, spartkompleksy.
Pa stanie na 22 krasavika, to-bok za pieršy ź nievialikim miesiac pandemii, — u Skandynaviju, jak i ŭ Biełaruś, jana pryjšła paźniej za vialikija krainy Zachodniaj Jeŭropy, — u Šviecyi pamierła, jak minimum, 1937 čałaviek.
Heta 192 śmiarotnyja vypadki na miljon nasielnictva, abo ŭ 3 razy bolš, čym u susiedniaj Danii, u 6 razoŭ bolš, čym u susiedniaj Narviehii i ŭ 7 razoŭ bolš, čym u susiedniaj Finlandyi, jakaja pryniała najbolš rašučyja abmiežavalnyja miery, u tym liku pierakryła niehruzavy ruch z Chielsinki i ŭ Chielsinki, dzie nazirałasia najbolšaja ličba zaražeńniaŭ na pačatkovym etapie.
Usie hetyja krainy z adnolkavym klimatam, bolš-mienš vysokim patencyjałam sistem achovy zdaroŭja i z vysakaraźvitaj ekanomikaj. Pandemija dajšła da ich adnačasova. Jak i ŭ vypadku Biełarusi, virus pieršymi pryvieźli turysty, jakija viarnulisia z alpijskich kurortaŭ, ludzi, što viartalisia z kamandzirovak u Italiju, Ispaniju, Niamieččynu, i zamiežnyja studenty.
Danija stała pieršaj skandynaŭskaj krainaj, jakaja raspracavała płan źmianšeńnia abmiežavańniaŭ — paśla taho jak zaražeńni vyrazna pajšli na spad.
Šviedskija epidemijołahi miarkujuć, što taki balučy padychod na pieršym etapie pryviadzie da vypracoŭki «hrupavoha imunitetu» i što kolkaść śmiarotnych vypadkaŭ u inšych krainach u vyniku budzie suvymiernaj — tolki raściahnutaj u časie. U inšych krainach ličać, što abmiežavalnyja miery dazvolać im vyjhrać čas, pakul nie źjaviacca vakcyna i leki.
Za apošni dzień u Šviecyi pamierli 172 chvoryja na karanavirus.
Ciapier čytajuć
Pamiatajecie kadeta, jaki na sustrečy z Łukašenkam śmieła vystupiŭ pa-biełarusku? Jon vyjechaŭ z krainy21
Kamientary