Piedahoh prapanuje abviaścić navučalny hod zavieršanym i zaličvać sioleta va ŭniviersitety biez CT
Piedahoh z 40-hadovym stažam, kandydat fiłałahičnych navuk Lavon Barščeŭski sfarmulavaŭ 6 punktaŭ, jakija treba nieadkładna vykanać u sistemie adukacyi z ulikam pandemii karanavirusa.
Fota Siarhieja Hudzilina
Zdaroŭje i žyćcio našych najmaładziejšych pakaleńniaŭ pavinna być abjektam asablivaj pilnaści dziaržavy. Uparcicca i nie ŭvodzić karancin u škołach i VNU ciapier — heta ryzyka ich žyćciam, jakaja pavialičvajecca štodnia! Što nieabchodna zrabić va ŭmovach, jakija skłalisia na hety dzień? Pasprabuju vykłaści heta pa punktach.
- Pryniać časovy zakon «Ab zaviaršeńni 2019/20 i pačatku 2020/21 navučalnaha hoda ŭ suviazi z abstavinami, jakija skłalisia ŭ suviazi z abvieščanaj Suśvietnaj arhanizacyjaj achovy zdaroŭja pandemijaj».
- 2019/20 hod abviaścić va ŭsich siarednich navučalnych ustanovach zavieršanym z 6 krasavika h. h., a va ŭsich VNU i SSNU — z 13 krasavika. Nieabchodnuju atestacyju ŭ siarednich škołach, himnazijach i licejach pravieści pa vynikach troch vučebnych čverciaŭ; u VNU i SSNU zaćvierdzić źmieny ŭ vučebnych płanach, pieranieści atestacyju za druhi siemiestr na pieršuju pałovu žniŭnia h. h.; skaracić navučalny hod taksama ŭ kaledžach, dzie prafiesija zasvojvajecca na asnovie siaredniaj adukacyi.
- Skasavać vypusknyja ekzamieny ŭ škołach (akramia ekzamienaŭ u paradku eksternata, jakija možna pravieści ŭ druhoj pałovie lipienia h. h.) i Centralizavanaje testavańnie.
- Zamiest Centralizavanaha testavańnia arhanizavać ustupnyja ekzamieny ŭ VNU i SSNU ŭ pieršaj pałovie žniŭnia h. h. na padstavie rašeńniaŭ rektarataŭ/administracyj; pry vyrašeńni pytańnia ab zaličeńni abituryjentaŭ uličvać taksama siaredni bał atestata; zaličeńnie ŭ VNU i SSNU pravieści ŭ terminy z 17 pa 21 žniŭnia h. h.
- Asnoŭny kantynhient nastaŭnikaŭ siarednich škoł, vykładčykaŭ VNU, SSNU i inšych kaledžaŭ/vučelniaŭ adpravić u apłatny adpačynak na praciahu nastupnaha tydnia; pry nieabchodnaści padoŭžyć hety adpačynak (z apłataj 75%) da siaredziny lipienia h. h.
- Pracu daškolnych vychavaŭčych ustanoŭ aptymizavać takim čynam, kab ich naviedvali tolki dzieci tych baćkoŭ, jakija nie majuć mahčymaści pakidać dzicia doma.
Kamientary