Što novaha ŭ Kapylskim rajonie? U Doktaravičach kažuć, što ŭnačy ŭ balnicy zabrali 26 čałaviek
Niaprostaja situacyja apošnija dni składvajecca ŭ Kapylskim rajonie.
«Naša Niva» pisała pra toje, što 29 sakavika miedrabotniki ŭ kaściumach śpiecabarony naviedvalisia ŭ chaty žycharoŭ Novych Doktaravičaŭ, Doktaravičaŭ i Vuhłoŭ. Padazreńnie na karanavirus vyjavili ŭ niekalkich čałaviek, jakich špitalizavali.
Što na siońnia adbyvajecca ŭ Kapylskim rajonie? Žychary Doktaravičaŭ paviedamili, što 30 sakavika dzieści a 21-j hadzinie na miascovym FAPie stali źbirać supracoŭnikaŭ kałhasa: kiroŭcaŭ, traktarystaŭ, miechanizataraŭ. Sprava ŭ tym, što padazreńnie na karanavirus źjaviłasia ŭ dyśpietčara Tamary B.
«Usio kiepska. Brali mazki ŭčora va ŭsich. U vyniku 26 čałaviek pahruzili i pavieźli ŭ Baraŭlany», — skazali nam miascovyja žychary.
Raniej my ahučvali viersiju žycharoŭ Doktaravičaŭ, što karanavirus moh źjavicca ad syna-dalnabojščyka Valanciny T., tym bolš, što žančyna lažyć ź pnieŭmanijaj u balnicy. Z «NN» źviazaŭsia toj samy dalnabojščyk, ciapier jon na pracy ŭ Litvie.
«Ja pryjechaŭ u viosku ŭ kancy studzienia, prasiadzieŭ paŭtara miesiacy. Ciapier viarnuŭsia na pracu, nijakaha karanavirusa ŭ mianie niama», — skazaŭ jon.
Valancinu rychtujuć da vypiski, jaje muž Siarhiej užo chodzić na pracu. Tak što ŭ hetym kankretnym vypadku chvaroba nie paćvierdziłasia.
U ciažkim stanie ŭ Kapylskaj balnicy ź pnieŭmanijaj znachodzicca nastaŭnica anhlijskaj movy Doktaravickaj škoły Natalla A. Jana padklučanaja da aparata ŠVŁ. Darečy, u Kapylskim rajonie ŭsiaho adzin taki aparat dla darosłych. Jašče adzin jość dla dziaciej.
Natalli A. 70 hadoŭ. Dziacinstva praviała ŭ Azierbajdžanie. Potym žyła ŭ Minsku, a na piensiju pierabrałasia ŭ Doktaravičy, dzie žyŭ jaje brat Hieorhij (jon taksama ŭ balnicy ź pnieŭmanijaj). Pa našych źviestkach, u reanimacyi Kapylskaj balnicy na siońnia znachodzicca minimum 9 čałaviek.
Daktary Kapylskaj «rajonki» na dvuchtydniovym karancinie. Jany buduć žyć i pracavać u samoj balnicy. Pra heta «NN» paviedamiŭ hałoŭny ŭrač miascovaj rajonnaj balnicy Siarhiej Paciajkovič. «U metach prafiłaktyki», — skazaŭ jon.
Na pytańnie, ci aznačaje heta, što ŭračy buduć 14 dzion žyć i pracavać u balnicy, jon skazaŭ: «Kaniečnie». Pry hetym Siarhiej Paciajkovič zaznačyŭ, što nie ŭsie daktary źmieščanyja na karancin.
«NN» źviazałasia z staršynioj Kapylskaha rajvykankama Siarhiejem Piliščykam, kab jon prajaśniŭ, što ŭsio ž adbyvajecca ŭ jahonym rehijonie.
«U nas jość sanstancyja, balnica, jany mohuć raskazać. Pytajciesia ŭ prafiesijanałaŭ, ja ž aparatny rabotnik, a nie miedyk. Jość aficyjnyja asoby, jakija dajuć aficyjnyja zaklučeńni, što ja budu kamientavać pra A., kali ja nie viedaju, jaki ŭ jaje stan, kali ja nie viedaju, što takoje ŠVŁ», — skazaŭ Siarhiej Piliščyk.
U Ministerstvie achovy zdaroŭja atrymać kamientar adnosna situacyi ŭ Kapylskim rajonie pakul niemahčyma. Pres-sakratar viedamstva Julija Baradun nie adkazvaje na telefanavańni.
Kamientary