KDB zaviaršyŭ rasśledavańnie pa spravie Uciuryna. Pa spravie prachodziać 16 čałaviek, kanfiskavana bolš za $1,7 miljona

Śledčaje ŭpraŭleńnie KDB zaviaršyła papiaredniaje rasśledavańnie kryminalnaj spravy pa šmatlikich faktach atrymańnia i dačy chabaraŭ u chodzie pastavak u Biełaruś telekamunikacyjnaha abstalavańnia, kampjuternaj techniki i prahramnaha zabieśpiačeńnia. Abvinavačanym pa hetaj spravie prachodzić i były namieśnik dziaržaŭnaha sakratara Rady biaśpieki Andrej Uciuryn. Pra heta paviedamlaje pres-słužba viedamstva.

Słužbovymi asobami prymalisia chabary za zaklučeńnie dahavoraŭ, jakija praduhledžvajuć u tym liku:

— madernizacyju telekamunikacyjnaha aparatna-prahramnaha kompleksu i pastaŭku abanienckich prystavak z ubudavanym modulem Wi-fi;

— zakupku licenzij dla telekamunikacyjnaha abstalavańnia, prahramnaha zabieśpiačeńnia i abarony infarmacyi;

— zakupku abstalavańnia maršrutyzacyi dla centralnych vuzłoŭ pieradačy danych abłasnych filijałaŭ RUP «Biełtelekam»;

— nabyćcio abstalavańnia biespravadnoj pieradačy danych na asnovie technałohii Wi-Fi, pašyreńnia hałaŭnoj stancyi IPTV;

— pastaŭku, mantaž, uvod u ekspłuatacyju prahramna-techničnych srodkaŭ (dalej — PTS) i navučańnie piersanału pakupnika;

— pastaŭku PTS dla pakupnika, raboty pa mantažy i ŭvodu ŭ ekspłuatacyju PTS aŭtamatyzavanaj bankaŭskaj sistemy «Ulikova-apieracyjnyja pracy» i navučańnie supracoŭnikaŭ;

— pradastaŭleńnie sublicenziatu vyklučnaha prava vykarystańnia abnaŭleńniaŭ prahramnaha zabieśpiačeńnia, techničnaj padtrymki.

Pradjaŭlenyja abvinavačvańni 8 słužbovym asobam dziaržaŭnych orhanaŭ i bankaŭskich ustanoŭ, 8 pradstaŭnikam kamiercyjnych struktur za ździajśnieńnie złačynstvaŭ, praduhledžanych artykułami 430 i 431 Kryminalnaha kodeksa.

Fihurantami kryminalnaj spravy źjaŭlajucca:

1. Kaśpiarovič Fieliks Eduardavič, staršynia praŭleńnia AAT «Biełaruski mižbankavy raźlikovy centr», abvinavačvajecca ŭ atrymańni sumiesna z A.A.Padhornym chabaraŭ nie mienš čym na za 868 750 dalaraŭ.

2. Padhorny Andrej Alaksandravič, namieśnik načalnika Hałoŭnaha ŭpraŭleńnia infarmacyjnych technałohij Nacyjanalnaha banka, abvinavačvajecca ŭ atrymańni sumiesna z Kaśpiarovičam F.E. chabaraŭ nie mienš čym na 868 750 dalaraŭ.

3. Kudasaŭ Ihar Dźmitryjevič, načalnik Hałoŭnaha ŭpraŭleńnia płaciežnaj sistemy i ličbavych technałohij Nacbanka, abvinavačvajecca ŭ atrymańni chabaraŭ nie mienš čym na 30 000 dalaraŭ.

4. Zdanievič Juryj Mikałajevič, dyrektar RUP «Infarmacyjna-vyličalny centr Ministerstva finansaŭ», abvinavačvajecca ŭ atrymańni chabaraŭ ŭ ahulnaj sumie 82 500 dalaraŭ.

5. Miłavanaŭ Alaksiej Uładzimiravič, načalnik upraŭleńnia infarmacyjnaj biaśpieki Departamienta biaśpieki AAT «ASB «Biełarusbank», abvinavačvajecca ŭ atrymańni chabaru ŭ sumie za 27 000 dalaraŭ.

6. Uciuryn Andrej Alaksandravič, namieśnik dziaržaŭnaha sakratara Rady Biaśpieki Respubliki Biełaruś, abvinavačvajecca ŭ atrymańni chabaraŭ u sumie nie mienš 190 000 dalaraŭ i padbuchtorvańni da dačy chabaru.

7. Sivadziedaŭ Siarhiej Ivanavič, hienieralny dyrektar RUP «Biełtelekam», abvinavačvajecca ŭ atrymańni chabaraŭ u sumie nie mienš za 470 000 dalaraŭ i 15 000 jeŭra.

8. Panamaroŭ Juryj Leanidavič, vykanaŭčy dyrektar AAT «Bank BiełVEB», abvinavačvajecca ŭ atrymańni chabaraŭ ŭ ahulnaj sumie 13 000 dalaraŭ ZŠA, a taksama vyhady majomasnaha charaktaru na sumu za 1 000 funtaŭ sterlinhaŭ.

9. Žylin Uładzimir Viačasłavavič, faktyčny kiraŭnik TAA «Mabilny servis» (Minsk), abvinavačvajecca ŭ dačy chabaraŭ u ahulnaj sumie nie mienš jak 900 250 dalaraŭ.

10. Pakryška Siarhiej Valerjevič, saŭładalnik i adzin z faktyčnych kiraŭnikoŭ TAA «Solideks PI» i TAA «Salideks» (h. Minsk), abvinavačvajecca ŭ dačy chabaraŭ u ahulnaj sumie nie mienš 195 000 dalaraŭ.

11. Pryhara Michaił Valerjevič, pradstaŭnik ZIUP «AMT-Hrup Internešnł» (h. Minsk), abvinavačvajecca ŭ dačy chabaraŭ u ahulnaj sumie 285 000 dalaraŭ.

12. Šarkoŭ Siarhiej Anatoljevič, hramadzianin Łatvii, saŭładalnik STAA «DPA» (h. Minsk), abvinavačvajecca ŭ dačy chabaraŭ u ahulnaj sumie nie mienš 53 000 dalaraŭ.

13. Broŭka Alaksandr Michajłavič, pradstaŭnik TAA «Mabilny servis» (h. Minsk), abvinavačvajecca ŭ dačy chabaraŭ na 13 000 dalaraŭ, a taksama pradastaŭleńnie vyhady majomasnaha charaktaru na sumu 1000 funtaŭ sterlinhaŭ.

14. Harbačoŭ Vital Anatoljevič, pradstaŭnik kampanij «Smartłabs» i «UHMK-Telekam», hramadzianin Rasii, abvinavačvajecca ŭ dačy chabaraŭ na 190 000 dalaraŭ.

15. Kazancaŭ Uładzimir Alaksandravič, pradstaŭnik kampanij «Smartłabs» i «UHMK-Telekam», hramadzianin Rasii, abvinavačvajecca ŭ dačy chabaraŭ u sumie nie mienš 190 000 dołaraŭ.

16. Tomčanka Uładzimir Piatrovič, dyrektar TAA «TT-Śviaźkom» (h. Minsk), abvinavačvajecca ŭ dačy chabaru ŭ sumie nie mienš za 9 000 dalaraŭ.

Usiaho pa kryminalnaj spravie tolki ŭ chabarnikaŭ kanfiskavana bolš za 1 650 000 dalaraŭ (u tym liku ŭ ablihacyjach), 62 000 jeŭra, bolš za 1 kh zołata.

• 0
• 0
• 0
• 0
• 0
• 0
• 0
• 0