Chutka ŭ prakacie biełaruskamoŭny film «Voziera radaści» pavodle knihi Marcinoviča — kvitki na premjeru jašče jość
13 listapada ŭ kinateatry «Maskva» z nahody vychadu ŭ staličny prakat adbudziecca prezientacyja filma režysiora Alaksieja Pałujana «Voziera radaści», stvoranaha pa matyvach adnajmiennaha ramana Viktara Marcinoviča. Heta całkam biełaruskamoŭny film, suśvietnaja premjera jakoha adbyłasia ŭ Klermon-Fieranie — na hałoŭnym suśvietnym kinafiestyvali karotkamietražnych filmaŭ.
VOZIERA RADAŚCI trejler from Aliaksei Paluyan on Vimeo.
Paśla hučnaj fiestyvalnaj premjery «Voziera radaści» atrymała šerah pryzoŭ na inšych prestyžnych jeŭrapiejskich kinafestyvalach, siarod jakich try ŭznaharody ispanskaha FICBUEU, pryz «Za najlepšuju režysuru» na kinafiestyvali ŭ hreckaj Dramie, dźvie ŭznaharody kinafiestyvalu ŭ Nievadzie, a taksama pieramoha ŭ naminacyi «Najlepšy karotkamietražny film» niamieckaj kinapremii Hessen Film Awards. Minskamu hledaču film pradstavić zdymačnaja hrupa z udziełam režysiora Alaksieja Pałujana i piśmieńnika Viktara Marcinoviča. Častka srodkaŭ ad pradadzienych biletaŭ pojdzie na karyść płatformy «Imiony» (prajekt-nastaŭnictva dla dziaciej-sirotaŭ).
U asnovie apoviedu lažyć žyćcio dzieviacihadovaj Jasi ŭ cichaj vioscy, dzie čas nibyta spyniŭsia. Dziaŭčynka ciažka pieražyvaje śmierć maci, niahledziačy na heta, baćka advozić jaje ŭ internat. Adnojčy Jasia vyrašaje źbiehčy i viarnucca dadomu.
Alaksiej Pałujan — biełaruski režysior, jaki zaraz žyvie i pracuje ŭ Hiermanii. Za jaho plačyma navučańnie ŭ Kaselskaj mastackaj akademii i šerah dakumientalnych i mastackich filmaŭ. Režysior pačaŭ pracu nad scenarom «Voziera radaści» ŭ 2016 hodzie, natchniŭšysia ramanam biełaruskaha piśmieńnika. Akramia volnaj adaptacyi epizoda z ramana ŭ asnovu filma lehła asabistaja historyja baćki Alaksieja, jaki taksama, jak i hierainia filma, ros u internacie.
«Voziera radaści» — mižnarodny prajekt, u zdymačnuju kamandu ŭvajšli kinaprafiesijanały z Hiermanii, Iranu, Hruzii, Ukrainy, Šatłandyi i Bałharyi. U filmie zdymalisia viadomyja biełaruskija akciory: Ihar Sihaŭ, Śviatłana Anikiej, Aleś Maŭčanaŭ, Dzianis Tarasienka, Alena Zuj-Vajciachoŭskaja i Taćciana Marchiel. Hałoŭnuju rolu vykanała dzieviacihadovaja vychavanka mahiloŭskaj SOS-vioski Anastasija Plac, čyju hulniu
vysoka acaniła mižnarodnaje žury ispanskaha kinafiestyvalu FICBUEU, prysudziŭšy dziaŭčyncy ŭznaharodu ŭ naminacyi «Lepšaja aktrysa». Za muzyčnaje afarmleńnie filma adkazny znakamity biełaruski etna-hurt VURAJ. Kampazicyja z alboma Lito stała jaho saundtrekam, taksama hurt źniaŭsia ŭ epizodzie. U ramkach prezientacyi ŭ kinateatry «Maskva» «Vuraj» vykanaje kampazicyju pierad hledačami. Jašče na scenu vyjduć «Lubanskija muzyki» Vasil Siemaškievič i Mikałaj Junicki, jakija taksama ŭziali ŭdzieł u filmie.
«Voziera radaści» ŭ Minsku pakažuć sumiesna z dakumientalnym filmam «Kraj žančyn», papiaredniaj pracaj Alaksieja Pałujana, jaki staličnyja hledačy mahli ŭbačyć u minułym hodzie. Karcina pakazvaje budni apošnich žycharak vioski Lubiejki Lachavickaha rajona: niekatoryja ź ich užo pravodzili na toj śviet nie tolki svaich mužčyn, ale i dziaciej, pry hetym nie zhubili žyćciovyja siły i žadańnie žyć. «Kraj žančyn» byŭ adznačany admysłovym pryzam «Za viernaść maralnym ideałam u kinamastactvie» ŭ Nacyjanalnym konkursie 24-ha Minskaha mižnarodnaha kinafiestyvalu «Listapad».
U Minsku filmy možna budzie ŭbačyć z 14 pa 28 listapada ŭ kinateatrach «Biełaruś», «Pijanier», Silver Screen i Falcon Club Butyk Kino, a z 14 po 20 listapada u Silver Screen. Pakazy adbuducca i ŭ inšych haradach Biełarusi: płanujecca, što karcinu pakažuć u Mahilovie, Breście, Baranavičach i Lachavičach. Premjera ŭ kinateatry «Maskva» adbudziecca 13 listapada a 19 hadzinie. Kvitki užo ŭ prodažy.
Ciapier čytajuć
Cichanoŭski ŭ Jelskim univiersitecie prapanavaŭ try elemienty stratehii ZŠA nakont Biełarusi26
Kamientary