31 kastryčnika ŭ 19.00 u prastory ZAL #2 adbudziecca adkryćcio fotavystavy «Źmiena», na jakoj buduć pradstaŭleny raboty adnaho z samych talenavitych i vydatnych fotažurnalistaŭ u historyi Biełarusi — Siarhieja Bruško. Fotavystava «Źmiena» — dakumientalnaje adlustravańnie epachalnaha pieryjadu ŭ historyi našaj krainy: kaniec 1980-ch — pačatak 1990-ch, čas Pierabudovy i pieršych hadoŭ niezaležnaści, čas svabody i pieramien, čas, kali ŭsio zdavałasia mahčymym. Adkryćcio fotavystavy prymierkavana da 30-hodździa padzieńnia Bierlinskaj ściany i prachodzić pry padtrymcy pasolstva ZŠA ŭ Respublicy Biełaruś.
Vypadak Siarhieja Bruško — heta redki źbieh abstavin, kali vialiki talent supaŭ z epochaj pieramienaŭ, što dazvoliła jamu, pracujučy fotakarespandentam, jarka i vyrazna adlustravać naradžeńnie novaj krainy. Jon naradziŭsia ŭ siamji prostych pracoŭnych, hadavaŭsia i vučyŭsia ŭ pasiołku Haradzieja, chacieŭ stać hieołaham, ale nie pastupiŭ va ŭniviersitet i adpraviŭsia ŭ vojska, a pa viartańni padaŭ dakumienty ŭ PTV na fatohrafa. Baćka Siarhieja skieptyčna pastaviŭsia da jaho vybaru, ale budučy fotamastak byŭ niepachisny, jon sapraŭdy viedaŭ, čym choča zajmacca. Raźmierkavańnie Siarhiej adpracoŭvaŭ u salihorskim fotaatelje, zatym pierajšoŭ u rajonnuju hazietu, a krychu paźniej pierajechaŭ u Minsk i pačaŭ pracavać fotakarespandentam u maładziožnaj haziecie «Čyrvonaja źmiena».
Dla haziety «Čyrvonaja źmiena», fatahrafii sa staronak jakoj buduć pradstaŭleny na vystavie, Siarhiej Bruško rabiŭ cudoŭnyja repartažy — u jaho zdymkach zadakumientavanyja histaryčnyja vykliki, ź jakimi sutyknułasia kraina: ekanamičny kryzis, mitynhi i strajki pracoŭnych, nastupstvy avaryi na Čarnobylskaj AES.
Pry ŭsim pry tym, što fatahrafii Siarhieja čaściakom sfakusavanyja na sacyjalnych prablemach i histaryčna pierałomnych momantach, pieršaradnaja ŭ jaho pracach ŭsio ž taki nie padziejnaść, ale štodzionnaść, hałoŭnyja hieroi jaho fatahrafij — zvyčajnyja ludzi, jakim prosta vypała žyć u niaprosty čas. U hetym sensie raboty Siarhieja Bruško možna adnieści da tradycyi humanistyčnaj dakumientalnaj fatahrafii, što dla biełaruskaha kulturnaha łandšaftu — źjava ŭnikalnaja.
Pryznańnie aŭtar atrymaŭ jašče pry žyćci: u 1998 hodzie Siarhiej staŭ udzielnikam biełaruska-šviejcarskaha vystavačna-vydavieckaha prajekta «U pošukach Biełarusi. Hod dvanaccaty paśla Čarnobyla» (sumiesna sa šviejcarskim fatohrafam Chuha Jiehi, Hugo Jaeggi) (1998 h.). Vystavy prachodzili ŭ Hiermanii, Šviejcaryi, Biełarusi, Irłandyi. Siarhiej Bruško pamior u 2000 hodzie, pakinuŭšy paśla siabie kalekcyju dakumientalnaj fatahrafii, kaštoŭnaść jakoj u poŭnaj miery nam jašče treba budzie ŭśviadomić.
Uviesnu hetaha hoda syn talenavitaha fotadakumientalista viadomy fotakarespandent i pradaŭžalnik dziejnaści baćki Dźmitryj Bruško pry dapamozie kraŭdfandynhavaj płatformy Ulej paśpiachova realizavaŭ prajekt «Źmiena» — fotaalbom Siarhieja Bruško, i kalekcyja ź jaho lehła ŭ asnovu vystavy. Albom, u jaki akramia zdymkaŭ Siarhieja ŭvajšli ŭspaminy 10 śviedak taho času (siarod jakich — Valancin Akudovič, Uładzimir Kołas, Mikałaj Chalezin, Anatol Hulajeŭ i inš.), sabraŭ nieabchodnuju sumu dla druku: jaho padtrymali amal 300 čałaviek.
Fotaknihi pradstaviać šyrokaj publicy na adkryćci fotavystavy 31 kastryčnika, ekspazicyja budzie pracavać da 19 listapada.
Uvachod na vystavu: volny
Adras: Pałac mastactvaŭ (vuł.Kazłova, 3), prastora ZAL #2.
Čas pracy: z 11.00 da 20.00 (paniadziełak - vychadny)
Kamientary