«Dumaju, biełarusy chočuć niezaležnaści». Što Džon Bołtan skazaŭ paśla sustrečy z Łukašenkam

Sustreča daradca prezydenta ZŠA pa nacyjanalnaj biaśpiecy Džona Bołtana z kiraŭnikom Biełarusi Alaksandram Łukašenkam praciahvałasia 2,5 hadziny — bolš jak udvaja daŭžej, čym było zaplanavana. Paśla sustrečy amerykanski ŭradoviec adkazaŭ na niekalki pytańniaŭ žurnalistaŭ, piša «Radyjo Svaboda».

Pavialičyć

Bołtan nazvaŭ sustreču «vielmi važnaj», choć jany z Łukašenkam «i nie pryjšli da niejkich kankretnych rašeńniaŭ».

Pa jahonych słovach, razmova prachodziła «na šyrokija temy — palityki, ekanomiki, pa pytańniach biaśpieki, jak u rehijonie, tak i va ŭsim śviecie».

«Isnujuć istotnyja składanaści ŭ dvuchbakovych adnosinach pamiž Biełaruśsiu i ZŠA, u tym liku ŭ pytańniach pravoŭ čałavieka, nieraspaŭsiudžvańnia zbroi, jakija treba abmierkavać. Druhaja tema — heta novaja hieapalityčnaja realnaść u rehijonie, ź jakoj my musim ličycca, pracavać razam, — skazaŭ Bołtan. — Vielmi rady, što ŭ nas była takaja mahčymaść dla razmovy. My pakul nia vyrašyli hetyja pytańni, ale biez takich razmovaŭ ich vyrašeńnie niemahčymaje».

Adkazvajučy na pytańnie pra pahrozy dla niezaležnaści Biełarusi ŭ śviatle intehracyi z Rasiejaj, Bołtan zajaviŭ, što samaje hałoŭnaje — «čaho chočuć ludzi Biełarusi»: «Ja dumaju, što jany ŭsio jašče chočuć niezaležnaści».

«Kali Saviecki Sajuz raspaŭsia, paŭstali novyja dziaržavy, i Złučanyja Štaty šmatrazova kazali, što my padtrymlivajem ich suverenitet i niezaležnaść. Narody mohuć pazbaŭlacca ad niezaležnaści i suverenitetu, krainy-čalcy Eŭraźviazu zrabili heta ŭ peŭnaj stupieni. Adnak časam niekatoryja narody prychodziać da vysnovy, što heta nie było mudrym rašeńniem, i jany vyrašajuć vyjści [z EZ], jak Vialikabrytanija. Luboje rašeńnie pa pytańniach hetkaha kštałtu tolki tady moža być całkam pradstaŭničym, kali adlustroŭvaje mierkavańnie ludziej. Suverenitet dla amerykancaŭ vielmi prosty. Heta pieršyja try słovy našaj kanstytucyi: «My narod». I z hledzišča zakonnaści jon [suverenitet] naležyć narodu».

Pavodle Džona Bołtana, pytańnie ŭznaŭleńnia dyplamatyčnych stasunkaŭ pamiž ZŠA i Biełaruśsiu na ŭzroŭni ambasadaraŭ nie abmiarkoŭvałasia padčas sustrečy z Alaksandram Łukašenkam.

«Jak ja ŭžo skazaŭ raniej, u nas jość niaprostyja pytańni ŭ dvuchbakovych dačynieńniach. Nam treba pabačyć prahres pa hetych pytańniach, i tady buduć vyrašacca inšyja. Zadačaj majho pryjezdu nie było adkazvać na asobnyja pytańni kštałtu hetaha. Dumaju, što razmova była cikavaja», — skazaŭ Džon Bołtan.

Na pačatku sustrečy z Alaksandram Łukašenkam Bołtan padkreśliŭ, što dla amerykanskaha boku važnyja «pytańni pravoŭ čałavieka, nieraspaŭsiudžvańnia zbroi». Kiraŭnik Biełarusi nazvaŭ vizyt histaryčnym i prapanavaŭ «ščyra i pa-siabroŭsku» abmierkavać usie pytańni dačynieńniaŭ pamiž Biełaruśsiu i ZŠA, «niachaj jany buduć niepryjemnyja dla Biełarusi».

Siońnia, na pytańnie žurnalistaŭ, chto byŭ inicyjataram vizytu Bołtana ŭ Miensk, pres-sakratar biełaruskaha MZS nie adkazaŭ, hetaksama jak i na pytańnie, ci buduć Bołtan i Łukašenka abmiarkoŭvać adnaŭleńnie dyplamatyčnych stasunkaŭ pamiž Biełaruśsiu i ZŠA na ŭzroŭni ambasadaraŭ. Na hety momant dyplamatyčnyja pradstaŭnictvy ŭ abiedźviuch dziaržavach ačolvajuć časovyja pavieranyja.

• 0
• 0
• 0
• 0
• 0
• 0
• 0
• 0