Kvitok na matč finału Lihi Jeŭropy pa futbole, avijabilety da Baku i nazad, dastatkovaja kolkaść hrošaj na bankaŭskaj karcie — usiaho hetaha akazałasia žycharu Brytanii Rafi Uzunianu niedastatkova dla taho, kab atrymać ujaznuju vizu ŭ Azierbajdžan, piša BBC.
Uzunian źbiraŭsia pajechać na finał futbolnaj Lihi Jeŭropy pamiž «Arsienałam» i «Čełsi», jaki pavinien adbycca 29 maja ŭ Baku. Ale aficyjnaja sistema vydačy elektronnych viz Azierbajdžana ASAN Viz vydała jamu admovu.
Uzunian miarkuje, što ŭ vizie jamu admovili, pakolki jaho proźvišča padobnaje na armianskaje.
«Łahistyka, prablema z cenami i časam — heta ŭsio moža pryvodzić u šalenstva, ale my i praŭda budziem maŭčać pra armianafobiju?» — napisaŭ Uzunian na svajoj staroncy ŭ «Fejsbuku».
U sacsietkach i na forumach zaŭziataraŭ «Arsienała» i «Čełsi» — dziasiatki padobnych historyj.
Ludzi z proźviščami, padobnymi na armianskija, i armianie, jakija žyvuć u Jeŭropie, pišuć, što nie zmahli atrymać vizy ŭ Azierbajdžan dla pajezdki na finał Lihi Jeŭropy, navat kali jany majuć hramadzianstva jeŭrapiejskich krain.
U MZS Azierbajdžana zajavili, što ŭłady nie abmiažoŭvajuć ujezd u krainu pa rasavaj abo nacyjanalnaj prykmiecie i što ŭ Baku ŭžo šmat razoŭ pryjazdžali armianskija spartsmieny.
«Abmiežavańni dostupu zamiežnych hramadzian na terytoryju Azierbajdžana nakładajucca tolki na zamiežnych hramadzian, jakija naviedvajuć akupavany Nahorny Karabach i prylehłyja rajony Azierbajdžana biez dazvołu ŭrada Azierbajdžana», — paviedamiła Bi-bi-si pres-sakratarka MZS Azierbajdžana Łejła Abdułajeva.
Imia Rafi Uzuniana nie paznačana ŭ śpisie niepažadanych asob na sajcie dypłamatyčnaha viedamstva Azierbajdžana, ale vizu jon tak i nie atrymaŭ.
Zastajecca niezrazumiełym, ci zmoža pryjechać u Baku adzin z klučavych hulcoŭ «Arsienała», hramadzianin Armienii Hienrych Mchitaran. U 2018-m jon nie pryjazdžaŭ na hulniu hrupavoha etapu «Arsienała» z «Karabacham», choć farmalnaj zabarony z boku azierbajdžanskich uładaŭ nie było.
I ŭ hety raz aficyjny Baku zajaviŭ, što Mchitaranu ničoha nie pahražaje, navat niahledziačy na toje, što jon naviedvaŭ Nahorna-Karabachskuju respubliku, nie pryznanuju Azierbajdžanam, biez dazvołu azierbajdžanskich uładaŭ.
Ale «Arsienał» zajaviŭ, što nie adpravić na finał armianskaha chaŭbieka, pakul nie atrymaje ad UEFA harantyj jaho biaśpieki. Niahledziačy na zapeŭnivańni azierbajdžanskaha boku, «kananiry» pakul što nie pryniali kančatkovaha rašeńnia, ci pajedzie futbalist u Baku. Pieramovy bakoŭ praciahvajucca.
Kamientary