Z 10 pa 17 maja ŭ biełaruskaj stalicy projdzie fiestyval kino Paŭnočnych i Bałtyjskich krain «Paŭnočnaje źziańnie». My vybrali piać filmaŭ, jakija varta pahladzieć, kab zrazumieć mientalitet i prablemy žančyn hetaj častki Jeŭropy. Usie pakazy projduć u kinateatry «Mir».
«Refarmistka»
Danija
Razam z hrupaj musulman Šeryn Chankan adkryvaje pieršuju ŭ Jeŭropie miačeć, u jakoj duchoŭnyja lidary — žančyny. Členy miačeci imknucca supraćstajać žachu ŭ adnosinach da isłama i kidajuć vyklik, zaklikajučy da talerantnaj dy hiendarnaj interpretacyi Karana. Šeryn nieciarplivaja. Jana choča pieramienaŭ i roŭnaści tut i ciapier. Ale jak vy razburycie za adnu noč tradycyi, ułaścivyja relihii z historyjaj, daŭžynioj u stahodździ?
Kali Šeryn adkryta pačynaje ździajśniać isłamskija razvody pa prośbie žančyn, niaščasnych u šlubie, i zaklučaje mižkanfiesijnyja šluby pamiž žančynami-musulmankami i mužčynami-niemusulmanami, jaje paśpiešnaść padvodzić arhanizacyju da miažy krachu. Film vyklikaŭ aktyŭnyja dyskusii ŭ dackich miedyja i hramadstvie.
Kali: 11 maja, subota, 21.45.
«Biary ci biažy»
Estonija
Adnojčy ŭ łahodnuju subotu 30-hadovy budaŭnik Eryk čuje ašałamlalnuju navinu. Vyśviatlajecca, što jaho byłaja dziaŭčyna Maonika, ź jakoj jon nie bačyŭsia ŭžo šeść miesiacaŭ, chutka narodzić dzicia. Maonika nie hatovaja stać maci, tamu, kali Eryk nie zachoča ŭziać adkaznaść na siabie, maleńkaja dziaŭčynka budzie addadzienaja na ŭdačareńnie. Biary ci biažy!
Kali: 11 maja, subota, 19.00.
«Žančyna abviaščaje vajnu»
Isłandyja, Ukraina
Chatła, piacidziesiacihadovaja abaronca navakolnaha asiarodździa, abjaŭlaje vajnu miascovaj aluminijevaj pramysłovaści Isłandyi. Jaje dziejańni stanoviacca ŭsio bolš rašučymi. Žyćcio Chatły całkam pieravaročvajecca paśla taho, jak jana atrymlivaje dazvoł na ŭdačareńnie maleńkaj dziaŭčynki z Ukrainy.
Kali: 12 maja, niadziela, 19.00.
«Aŭrora»
Finlandyja
Adnojčy poźnim viečaram u finskaj Łapłandyi la kijoska z chot-dohami zaŭziataja tusoŭščyca Aŭrora, jakaja patałahična baicca adkaznaści, sustrakaje iranca Daryjana. Chłopiec źnianacku prosić jaje vyjści za jaho zamuž. Jamu treba ažanicca ź finskaj žančynaj, kab atrymać prytułak dla siabie i svajoj dački. Aŭrora admaŭlaje jamu. Jana pracuje majstram pa manikiury i płanuje pierajechać u Narviehiju, kab pierajnačyć svajo žyćcio. Adnak paśla sustrečy ź miłaj dačkoj Daryjana Aŭrora zhadžajecca dapamahčy jamu.
Padčas toho, jak Aŭrora znajomić Daryjana sa šmatlikimi žančynami, jany zbližajucca. Kali źjaŭlajecca idealnaja kandydatka na rolu žonki, Daryjan i Aŭrora sutykajucca ź ciažkim vybaram: rabić vyhlad, što jany ščaślivyja, ci narešcie pierastać uciakać ad siabie.
Kali: 17 maja, piatnica, 21.45.
«Pieražyć leta»
Litva
Indre — maładaja daśledčyca-psichołah, jakaja nieachvotna zhadžajecca pieravieźci dvuch pacyjentaŭ z adnoj psichijatryčnaj kliniki ŭ druhuju ŭ abmien na mahčymaść zajmacca daśledavańniami. Niečakana jana akazvajecca zavadatarkaj u davoli raznašersnaj hrupie ŭ doŭhim padarožžy da mora.
Havarki Paŭlus — małady čałaviek u manijakalnaj stadyi bipalarnaha razładu, jaki mocna kantrastuje ź intraviertnaj dziaŭčynaj Juste, čyje rany schavanyja ad čužych vačej. Ale abodva viaduć unutranuju baraćbu. Jany razam šukajuć vyratavańnie. Toje, što vyhladaje jak bieskłapotnaje letniaje padarožža ź siabrami, moža stać pačatkam adradžeńnia ŭ hetaj čullivaj historyi, napoŭnienaj nadziejami, niečakanaściami i ŭpeŭnienaściu, što ŭ śviecie niama ničoha niemahčymaha.
Kali: 16 maja, čaćvier, 19.00.
Ciapier čytajuć
DFR kašmaryć transpartnikaŭ: u vialikich łahistyčnych apierataraŭ kryminalnyja spravy, vobšuki i aryšty11
DFR kašmaryć transpartnikaŭ: u vialikich łahistyčnych apierataraŭ kryminalnyja spravy, vobšuki i aryšty
«A 4‑j hadzinie nočy my zrazumieli, što sierviery prosta vyčyščanyja». Jarasłaŭ Ivaniuk raskazaŭ padrabiaznaści pra ataku na anłajn-biblijateku «Kamunikat»1111
Kamientary