Pravaabaroncy: Pryznačeńnie parłamienckich vybaraŭ na listapad 2019 hoda hruba supiarečyć Kanstytucyi

19 krasavika padčas vystupu z pasłańniem da narodu i parłamienta Alaksandr Łukašenka nazvaŭ daty prezidenckich i parłamienckich vybaraŭ u Biełarusi.

Na listapad 2019 hoda pryznačanyja parłamienckaja vybary, a ŭ 2020 hodzie projduć užo prezidenckija vybary.

U bližejšy čas źjaviacca adpaviednyja rašeńni, adznačyŭ Łukašenka.

Kaardynatar kampanii «Pravaabaroncy za svabodnyja vybary» Uładzimir Łabkovič ličyć, što pryznačeńnie daty vybaraŭ deputataŭ Pałaty pradstaŭnikoŭ na listapad 2019 hoda hruba supiarečyć Kanstytucyi Biełarusi.

Uładzimir Łabkovič

«Pakul Kanstytucyja ŭ nas jašče dziejučaja, nijakaj novaj niama, značyć my pavinny kiravacca joju.

Narod Biełarusi jak asnoŭny zakanadaŭca daŭ paŭnamoctvy deputatam parłamienta na čatyry hady. Heta prapisana ŭ 93 artykule Kanstytucyi.

Minułyja parłamienckija vybary byli ŭ vieraśni 2016 hoda. Značycca, vybary deputataŭ Pałaty pradstaŭnikoŭ pavinny adbycca nie paźniej za vierasień 2020 hoda.

Dla taho, kab pravieści vybary za hod da skančeńnia terminu paŭnamoctvaŭ parłamienta, pavinny być praduhledžanyja abaviazkovyja abstaviny, jakija paznačanyja ŭ artykule 94 Kanstytucyi. I takija padstavy majuć vyčarpalnaść, nie tamu što prezidentu zachaciełasia, a tamu što ŭ krainie zdarylisia peŭnyja momanty», — adznačyŭ Uładzimir Łabkovič.

Tak, paŭnamoctvy Pałaty pradstaŭnikoŭ mohuć być daterminova skaročanyja pry admovie ŭ daviery ŭradu, vykazvańni votumu niedavieru ŭradu abo dvuchrazovaj admovie ŭ dačy zhody na pryznačeńnie premjer-ministra.

Paŭnamoctvy Pałaty pradstaŭnikoŭ mohuć być taksama daterminova spynienyja na padstavie zaklučeńnia Kanstytucyjnaha suda ŭ vypadku sistematyčnaha abo hrubaha parušeńnia pałatami parłamienta Kanstytucyi.

«I tolki ŭ hetych vypadkach prezident musić pryznačyć daterminovyja vybary ŭ Pałatu pradstaŭnikoŭ. Zaraz ža my bačym, što albo budzie stvorana takaja štučnaja nahoda, jakaja praduhledžana Kanstytucyjaj, što budzie vielmi śmiešna, albo my majem spravu ź situacyjaj, kali normy Kanstytucyi naŭprost ihnarujucca i parušajucca.

Adnaznačna, vybary ŭ Pałatu pradstaŭnikoŭ nie mohuć adbyvacca ŭ hetym hodzie, kali jany nie daterminovyja», — zajaviŭ pravaabronca.

Uładzimir Łabkovič padkreśliŭ, što ciažka kazać pra palityčnyja matyvy takoha rašeńnia, bo sistema ŭłady absalutna zamknutaja:

«Uvohule nie zrazumieła, navošta pravodzić vybary ŭ 2019 hodzie, bo ŭ zakanadaŭstvie praduhledžanyja kankretnyja terminy paŭnamoctvaŭ, i abiedźvie kampanii možno było pravodzić u 2020 hodzie. Tłumačeńnie CVK, što heta ciažka, nieabhruntavanaje, bo lubaja demakratyja — reč ciažkaja. Lepš było ŭładam nie zajmacca manipulacyjami i hulniami, a prosta vykonvać Kanstytucyju i zakon — pravodzić u 2020 hodzie dźvie kampanii».

• 0
• 0
• 0
• 0
• 0
• 0
• 0
• 0