Minčuk Ivan Cyrulnikaŭ trapiŭ za kraty paśla davoli niezvyčajnaj historyi. Jon razam z paplečnikami pa fryk-supołcy prychilnikaŭ SSSR pryjšoŭ u prakuraturu i pasprabavaŭ tam pravieści «hramadzianski aryšt» prakurorki. Ale ŭ vyniku aryštavali samoha Cyrulnikava.
Chto taki Cyrulnikaŭ?
Ivanu Cyrulnikavu 35 hadoŭ, jon žyvie ŭ Minsku. Nazyvaje siabie biznesmienam, ale jaho znajomyja kažuć, što jon «zvyčajny ipešnik».
Niadaŭna Ivan staŭ hierojem publikacyj šerahu vydańniaŭ. Pryčynaj staŭ jaho vizit u «Karonu» z maleńkim sabakam: pa viersii Cyrulnikava, achoŭniki žorstka zatrymali jaho na pustym miescy, a paśla milicyja zabrała ŭ adździaleńnie i pakinuła na noč za kratami.
Achoŭniki kramy tłumačać: uvachod z sabakam u kramu zabaronieny. A hałoŭnaja pryčyna kanfliktu z Cyrulnikavym — jaho chamstva. Maŭlaŭ, na prośbu ŭziać sabaku na ruki Cyrulnikaŭ skazaŭ achoŭniku: «Ty sam taki ž, jak sabaka», — a paśla sprabavaŭ uciačy.
U vyniku Cyrulnikaŭ atrymaŭ štraf 45 bazavych (bolš za 1100 rubloŭ).
Ale cikava navat nie heta. Ciapier Ivan Cyrulnikaŭ znachodzicca ŭ SIZA. Na jaho zaviedziena kryminalnaja sprava. Z sabakam heta ŭžo nie źviazana, ale historyja jašče bolš zachaplalnaja: mužčyna pasprabavaŭ pravieści «hramadzianski aryšt» prakurora niepasredna ŭ budynku minskaj prakuratury.
Što Ivan rabiŭ u prakuratury? Pryjšoŭ paskardzicca, što jamu nie chočuć pamianiać hramadzianstva ŭ pašparcie. Cyrulnikaŭ prasiŭ, kab u biełaruskim pašparcie jamu pastavili hramadzianstva Savieckaha Sajuza, bo jon člen «Abščyny Biełaj Rusi».
«Žyvyja čałavieki» z Savieckaha Sajuza
Supołka, siabram jakoj źjaŭlajecca Cyrulnikaŭ, nazyvaje siabie «Abščynaj Biełaj Rusi» ci «Ziemstvami Biełaj Rusi». Padrabiaźniej pra ich dziejnaść čytajcie tut.
Kali ścisła, to aktyvisty «Ziemstvaŭ» admaŭlajuć biełaruskaje hramadzianstva i ličać siabie hramadzianami SSSR. Respublika Biełaruś, na ich dumku, nielehitymnaja dziaržava, usim kiruje Zachad, i hetak dalej. Karaciej, sumieś kanśpirałohii, kamunistyčnych idej i zvyčajnaha varjactva.
Cikava, što siabie jany nazyvajuć nie hramadzianami, a «žyvymi čałaviekami». U «Ziemstvach» navat vydajucca adpaviednyja paśviedčańni.
Heta nahadvaje dziciačuju hulniu ŭ darosłuju ŭstanovu: «ziemstvy» prydumvajuć sabie raznastajnyja dakumienty, paśviedčańni i damovy, jakija paśla z zadavalnieńniem «vydajuć» adno adnamu. Taksama aktyvisty «Ziemstvaŭ» vielmi lubiać pradjaŭlać hetyja samarobnyja dakumienty padčas vizitaŭ u dziaržaŭnyja ŭstanovy.
Apošni taki vizit — u prakuraturu — skončyŭsia dla adnaho z aktyvistaŭ zatrymańniem.
«Pracujem nad vyzvaleńniem Cyrulnikava pa linii MZS SSSR»
«3 sakavika Ivana Cyrulnikava skrali», — upeŭniena kaža Siarhiej Sozinaŭ, adzin z pradstaŭnikoŭ tych «Ziemstvaŭ». Jon byŭ z Cyrulnikavym padčas vizitu ŭ prakuraturu.
Pa słovach Sozinava, usio adbyłosia ŭ faje haradskoj prakuratury.
«Ivan chacieŭ trapić na pryjom da prakurora horada, padać zajavu, bo jamu ŭ pašpartnym stale admovili vypravić dadzienyja ŭ pašparcie. Jon chacieŭ źmianić biełaruskaje hramadzianstva na hramadzianstva Savieckaha Sajuza. RB ž kazała, što jana pravapierajemnik SSSR. Tamu MUS abaviazany vydavać dakumienty ŭ adpaviednaści z paśviedčańniem ab naradžeńni. A tam staić Saviecki Sajuz, — tłumačyć Sozinaŭ. — Darečy, usie biełaruskija pašparty — padroblenyja dakumienty, vy nie viedali?»
Padziei, pa słovach Sozinava, razhortvalisia nastupnym čynam. U faje vyjšła žančyna, jakaja nazvałasia prakurorkaj. Jaje nibyta paprasili pakazać dakumienty, jana admoviłasia. Tady, kaža Sozinaŭ, Ivan Cyrulnikaŭ abvieściŭ, što «praviadzie hramadzianski aryšt» žančyny. Praściej kažučy, zatrymaje jaje, bo, moža, jana i nie prakurorka zusim.
Ale, śćviardžaje Sozinaŭ, Cyrulnikaŭ nibyta navat nie dakranaŭsia da «zatrymanaj».
Praŭda, skončyłasia ŭsio aryštam samoha Ivana Cyrulnikava, pryčym zusim nie hramadzianskim. Pryjechała milicyja, Ivana advieźli ŭ RAUS, zatym u sud. Paplečniki kažuć, što Ivanu dali 15 sutak, a dalejšy jaho los jany nie viedajuć.
Žonka Cyrulnikava taksama padrabiaznaściaŭ historyi nie viedaje. Jak nie viedaje dakładna, ci była zaviedzienaja na Ivana kryminalnaja sprava.
«Ja nie viedaju, što adbyvajecca. Kali Ivana zatrymali, mianie ŭ Minsku nie było. Viedaju tolki, što spačatku jamu dali 15 sutak, a paśla praciahnuli znachodžańnie pad vartaj jašče na 10 dzion, — kaža Natalla, žonka Cyrulnikava. — Ivanu prapanavali biaspłatnaha advakata, jon admoviŭsia. Nie viedaju čamu. A na płatnaha ŭ mianie hrošaj niama».
Pa jaje słovach, jana nie viedaje padrabiaznaściaŭ pra «siabroŭstva» muža z «hramadzianami SSSR». Sama Natalla kaža, što nie płanuje mianiać hramadzianstva na savieckaje. A pa vychadzie na svabodu Ivana Cyrulnikava čakaje razmova. «Ja chaču pahavaryć ź im pra jaho pohlady i staŭleńnie da siamiejnych kaštoŭnaściaŭ», — kaža žančyna.
Cyrulnikava znajšoŭ u SIZA anarchist Mikoła Dziadok. Dziadka zatrymali na niekalki dzion, i jon apynuŭsia z Cyrulnikavym u adnoj kamiery. Ivan nibyta raspavioŭ sukamierniku, što na jaho zaviali jašče i kryminalnuju spravu.
Pakul Cyrulnikaŭ pad vartaj, jaho paplečniki abmiažoŭvajucca łozunhami. U pryncypie, heta ŭsio, što jany robiać dla jaho vyzvaleńnia.
«My jak pradstaŭniki Ministerstva zamiežnych spraŭ SSSR patrabujem sustrečy z Cyrulnikavym. Vykradzieny zamiežny hramadzianin! Pryčym heta źviazana ź jaho hramadzianskaj pazicyjaj!» — kaža Siarhiej Sozinaŭ.
Samoha siabie Sozinaŭ nazyvaje «konsułam MZS Savieckaha Sajuza». Kaža, što MZS i konsulstva raźbirajucca sa spravaj zatrymanaha paplečnika.
«My ŭžo abjavili Cyrulnikava ŭ mižnarodny vyšuk. Padklučanyja Interpoł i Sud pa pravach čałavieka AAN. Taksama pracujem nad vyzvaleńniem Cyrulnikava pa linii MZS SSSR — usio ž skradzieny hramadzianin Savieckaha Sajuza!» — rapartuje Sozinaŭ.
Pytańnie, ci naniali jany advakata svajmu «hramadzianinu», vyklikaje ŭ «konsuła» ščyraje ździŭleńnie.
«Navošta jamu advakat? Cyrulnikaŭ znachodzicca pad achovaj Ministerstva zamiežnych spraŭ Savieckaha Sajuza», — adkazvaje Siarhiej Sozinaŭ.
Tym časam Śledčy kamitet paćvierdziŭ, što na Cyrulnikava zaviali kryminalnuju spravu. Jaho padazrajuć u hvałcie ŭ dačynieńni da prakurorskaha rabotnika. Ale miera strymańnia nie prymianiałasia — pakul što Cyrulnikaŭ pad vartaj, bo adbyvaje pakarańnie pa administratyŭnym artykule.
Pa kryminalnaj spravie pravodzicca raśledavańnie, Cyrulnikavu pahražaje da 5 hadoŭ pazbaŭleńnia voli.
Ciapier čytajuć
Biaspałaŭ namalavaŭ ludziej sa ściahami ŭ centry Minska i adpraviŭ fota ŭ milicyju. Źjechalisia try mašyny ź mihałkami53
Kamientary