Śledčym kamitetam zakončana pravierka pa fakcie śmierci dvuchmiesiačnaha dziciaci paśla płanavaj vakcynacyi ŭ Hancavickim rajonie ŭ žniŭni 2018 hoda. Chod spravy byŭ na asabistym kantroli staršyni SK Ivana Naskieviča, paviedamlaje pres-słužba viedamstva.
U pryvatnaści, ustanoŭlena, što da trahičnaha zdareńnia dzicia prachodziła płanavyja ahlady doktaram. Niejkich pabočnych reakcyj vyjaŭlena nie było. Pa vynikach miedycynskaha ahladu mahčymaści pradbačyć raźvićcio alerhičnaj reakcyi pierad uviadzieńniem vakcyn nie było, a patałahičny praces, jaki pryvioŭ da krytyčnaha stanu, raźvivaŭsia chutka i niepradkazalna.
Razam z tym, śpiecyjalnaj kamisijaj Minzdaroŭja ŭstanoŭleny šerah parušeńniaŭ viedamasnych narmatyŭnych aktaŭ u častcy viadzieńnia supracoŭnikami dakumientacyi, a taksama vykanańnia pracedur vakcynacyi ŭ častcy infarmavańnia baćkoŭ ab mahčymych pabočnych efiektach paśla ŭviadzieńnia vakcyny. Da hetych supracoŭnikaŭ užytyja miery dyscyplinarnaha spahnańnia.
Adnak vyjaŭlenych niedachopaŭ u pryčynnaj suviazi sa śmierciu dziciaci niama. Parušeńniaŭ, źviazanych niepasredna z taktykaj i technikaj ŭviadzieńnia vakcyn, taksama nie ŭstanoŭlena.
Vakcyny «Imavaks Polia i «Eŭpienta», jakija ŭvodzilisia dziciaci, na momant vakcynacyi byli dazvolenyja Minzdaroŭjem.
Zhodna z zaklučeńniem kompleksnaj sudovaj miedycynskaj, farmakałahičnaj i chimičnaj ekśpiertyzy, pryčynaj śmierci stali paliorhannaja niedastatkovaść, abumoŭlenaja ciažkaj anafiłaktičieskaj reakcyjaj nieadkładnaha typu (anafiłaktyčnym šokam) na adekvatna pryznačanyja i pravilna ŭviedzienyja vakcyny «Imavaks Polia» i «Eŭpienta».
U vyniku śledstva pryjšło da vysnovy ab adsutnaści ŭ dziejańniach słužbovych asob i supracoŭnikaŭ miedycynskich ustanoŭ składaŭ złačynstvaŭ, praduhledžanych artykułami «Nienaležnaje vykanańnie prafiesijnych abaviazkaŭ miedycynskim rabotnikam» i «Słužbovaja chałatnaść».
Śledčymi vyvučana dakumientacyja, jakaja paćviardžaje jakaść vakcyny «Eŭpienty»: u tym liku, siertyfikaty zavodskaha analizu preparata z Paŭdniovaj Karei i siertyfikat, vydadzieny dla krainy-imparciora.
U ciapierašni čas imunizacyja vakcynaj «Eupienta» ŭ Biełarusi praciahvajecca, adznačaje SK.
Ciapier čytajuć
Byłoha supracoŭnika kontrraźviedki KDB aryštavali za zdradu dziaržavie10
Kamientary