U Kijevie prajšli adrazu dva asobnyja šeści na dzień naradžeńnia Bandery VIDEA

Nacyjanalisty raździalilisia. Arhanizacyi, zhurtavanyja vakoł abjadnańnia «Svaboda», prajšli šeściem ad parku Šaŭčenki da majdana Niezaležnaści. Adnačasova Nacyjanalny korpus, jaki hurtuje vieteranaŭ vajny ŭ Danbasie, sabraŭ svaich prychilnikaŭ kala Opiery. Jany taksama prajšli da centralnaha majdanu stalicy.

Videa z bolš tradycyjnaha dla ŭkrainskich nacyjanalistaŭ šeścia «Svabody», z pachodniami:

Videa z šeścia Nacyjanalnaha korpusa:

Šeście «Svabody» ŭznačaliŭ jaje kandydat u prezidenty Rusłan Kašulinski. U demanstracyi uziali ŭdzieł niekalki tysiač čałaviek — jak moładź, tak i ludzi starejšych hadoŭ.

Na šeście Nackorpusa vyjšła da tysiačy ŭdzielnikaŭ, pieravažna maładych.

Ściapan Bandera byŭ stvaralnikam Arhanizacyi ŭkrainskich nacyjanalistaŭ, što ŭ 1930—50-ja hady viała ŭzbrojenuju baraćbu za niezaležnaść Ukrainy. Banderu ŭdałosia zrabić niezaležnicki ruch papularnym.

Postać Bandery vyklikaje rezkaje nieprymańnie ŭ Rasii, bo jon arhanizavaŭ masavy i paśpiachovy ŭzbrojeny supraciŭ savietam. 

Ukrainskija ž historyki ŭ acency Bandery padzialilisia. Nacyjanalisty i dziaržaŭniki vysoka aceńvajuć jahonuju postać, libierały i levyja staviacca da jaho niehatyŭna.

Z adnaho boku, jon uznačaliŭ uzbrojenuju baraćbu za niezaležnaść Ukrainy spačatku suprać palakaŭ, paśla — proci nacystaŭ i savietaŭ. Z druhoha boku, jahonaja arhanizacyja vykarystoŭvała terarystyčnyja mietady. U vajnie suprać palakaŭ AUN raspaŭsiudziła teror na mirnaje nasielnictva.

U pieryjad da 1941 hoda AUN supracoŭničała ź niamieckimi nacystami. Adnak niemcy adpravili kiraŭnikoŭ AUN, u tym liku Banderu, u kancłahier, kali tyja 30 červienia 1941 hoda abviaścili Ukrainu niezaležnaj.

Raspaŭsiudžany fejk, što heta banderaŭcy palili vioski ŭ Biełarusi. Jon nie adpaviadaje histaryčnaj praŭdzie: Bandera na toj momant užo byŭ aryštavany nacystami. U źniščeńni Chatyni dy inšych zładziejstvach razam z esesaŭcami ŭdzielničali kałabaranckija padraździaleńni, składzienyja z pradstaŭnikoŭ roznych nacyjanalnaściej. U ich uvachodzili, pieravažna, byłyja savieckija vajennapałonnyja, pastaŭlenyja pierad vybaram: abo hałodnaja śmierć u łahiery, abo słužba nacystam.

Banderu ŭ 1959 zabiŭ ahient savieckaha KHB, jaki z časam raskajecca ŭ svaim učynku i pierabiažyć na Zachad.

Prezident Juščanka nadaŭ Banderu zvańnie Hieroja Ukrainy. Janukovič hety ŭkaz admianiŭ.

Ukrainskija nacyjanalisty ŭšanoŭvajuć čyrvona-čorny ściah AUN pobač ź dziaržaŭnym, žoŭta-błakitnym.

Pravanacyjanalistyčnyja partyi ciapier nabirajuć istotny pracent hałasoŭ nie tolki na zachadzie — kałyscy AUN, ale i ŭ centry krainy. Nacyjanalistyčnyja idei atrymali novaje raspaŭsiudžańnie va Ukrainie ŭ adkaz na zachop Rasijaj Kryma i častki Danbasa ŭ 2014-m.

Siońnia postać Bandery ŭšanoŭvajecca taksama va ŭkrainskich siłavych strukturach.

• 0
• 0
• 0
• 0
• 0
• 0
• 0
• 0