Alaksandr Łukašenka raźličvaje na vyrašeńnie da kanca hoda pytańniaŭ, što stajać na biełaruska-rasijskim paradku dnia. Pra heta jon zajaviŭ siońnia ŭ Sočy na pieramovach z Uładzimiram Pucinym z udziełam kiraŭnictva ŭradaŭ dźviuch krain, piša BiełTA
«My dakładna vykonvajem svaje damoŭlenaści, abaviazacielstvy, jak biełarusy, tak i rasijanie, my z vami, naturalna. Vy pravilna skazali: my damovilisia sustrecca tut u bolš šyrokim kole. Mienavita ŭ hetym kole. Pavinien skazać vam, što jak biełarusy, tak i rasijanie (urady) vielmi surjozna papracavali paśla hetaha. Mnie premjer dakładvaŭ paśla sustrečy z premjer-ministram Rasii — vielmi cikavyja jość vychady na rašeńnie mnohich pytańniaŭ. I kali my budziem ruchacca ŭ hetym kirunku, ja ŭpeŭnieny, što my da kanca hoda praktyčna ŭsie pytańni raźviažam», — skazaŭ kiraŭnik biełaruskaj dziaržavy.
«Jany (pytańni) nie takija składanyja, choć ź finansavaha punktu hledžańnia niekatoryja ciažkija, bo ŭviazanyja vialikija finansavyja patoki. Tym nie mienš ich treba vyrašać. I mnohaje zroblena dla taho, kab vyrašyć i ŭ sielskaj haspadarcy prablemy, i ŭ naftahazavaj śfiery. Prablem asablivych z rašeńniem pytańniaŭ ja nie baču», - dadaŭ Alaksandr Łukašenka.
U svaju čarhu Uładzimir Pucin adznačyŭ, što na minułaj sustrečy z Alaksandram Łukašenkam u Sočy havorka išła ab biahučych spravach, pierśpiektyvach raźvićcia jak dvuchbakovych adnosin, tak i intehracyjnych abjadnańniaŭ, u jakija ŭvachodziać Biełaruś i Rasija. «Damovilisia ab tym, što my sustreniemsia ŭ bolš šyrokim składzie. Tym bolš va ŭradzie Biełarusi adbylisia istotnyja źmieny. Nam treba źvieryć hadzińniki pa niekatorych pytańniach. Niekatoryja pytańni daŭrehulavavać», — skazaŭ rasijski lidar.
Jon adznačyŭ, što zusim niadaŭna ŭźnikała šmat sprečak pa šerahu kirunkaŭ. «Skažam, u halinie sielskaj haspadarki, pa enierhietyčnych pytańniach nam treba niekatoryja kropki nad «i» rasstavić. Tamu damovilisia, što sustreniemsia ŭ šyrokim składzie», - skazaŭ prezident Rasii.
U pieramovach z rasijskaha boku biaruć udzieł premjer-ministr Dźmitryj Miadźviedzieŭ, pieršy vice-premjer — ministr finansaŭ Anton Siłuanaŭ, vice-premjery Alaksiej Hardziejeŭ i Dźmitryj Kozak, a taksama pasoł RF u Biełarusi, śpiecpradstaŭnik prezidenta Michaił Babič. Ź biełaruskaha boku zaprošanyja kiraŭnik biełaruskaha ŭrada Siarhiej Rumas, vice-premjery Ihar Lašenka, Ihar Pietryšenka, Michaił Rusy, kiraŭnik MZS Uładzimir Makiej.
Kamientary