Julija Łatynina: «Paŭnočny patok — 2» dapamoža Rasii anieksavać Biełaruś
Viadomaja rasijskaja publicystka Julija Łatynina apublikavała ŭ «Novaj haziecie» artykuł pra hazapravod «Paŭnočny patok — 2», jaki Rasija źbirajecca prakłaści na dnie Bałtyjskaha mora. Žurnalistka miarkuje, što novy rasijski hazapravod nie tolki jašče macniej pryviaža Hiermaniju da Rasii, ale i pryviadzie da anieksii Biełarusi. A voś Ukrainie možna nie bajacca — jana ad straty tranzitu ničoha nie zhubić.
Łatynina piša, što hałoŭnaja meta «Paŭnočnaha patoku — 2» hieapalityčnaja — pryviazać da siabie Niamieččynu. U vypadku budaŭnictva «Paŭnočnaha patoku — 2» Hiermanija stanovicca hałoŭnym raźmierkavalnikam rasijskaha hazu ŭ Jeŭropie. A rasijski haz, asabliva z ulikam vyčarpańnia radoviščaŭ Paŭnočnaha mora, sapraŭdy zastajecca kali nie adzinaj, to biezalternatyŭnaj krynicaj. «Paŭnočny patok — 2» harantuje, što Niamieččyna budzie vymušana praciahvać ličycca z Rasijaj, što b Kreml ni vykinuŭ.
A vykinuć Maskva moža dźvie rečy, ličyć žurnalistka «Novaj haziety». Pieršaje — pačać čarhovy raŭnd vajny na ŭschodzie Ukrainy. Druhoje — anieksavać Biełaruś.
Łatynina ličyć, što Biełaruś — łasy kavałak, jaki b dazvoliŭ Pucinu vyrašyć prablemu 2024 hoda i zastacca va ŭładzie.
«U hety hod skančajecca čarhovy prezidencki termin, i, kab jaho padoŭžyć, treba mianiać Kanstytucyju. A ŭ vypadku abjadnańnia Rasii i Biełarusi Kanstytucyju pryjdziecca mianiać samo saboj. Dziaržava ž źmienicca — i Kanstytucyja taksama»,
— piša Łatynina.
Prapusknaja zdolnaść «Paŭnočnaha patoku — 2» — 55 miljardaŭ kubamietraŭ na hod — prykładna adpaviadaje prapusknoj zdolnaści biełaruskaj truby, jakoj, darečy, na 100% vałodaje «Hazprom».
Ciapier «Hazprom» pierakryć hetuju trubu nie moža: heta paralizuje pastaŭki hazu ŭ Jeŭropu. Ale pierakryć jaje paśla budaŭnictva «Paŭnočnaha patoku — 2» budzie nieskładana, upeŭniena publicystka.
«Pry hetym biełaruskija hazavyja sietki majuć adno fundamientalnaje i patencyjna fatalnaje adroźnieńnie ad ukrainskich: a mienavita jany ŭsie — i mahistralnyja, i raźmierkavalnyja — na 100% naležać «Hazpromu». Tak što reviers budzie arhanizavać niemahčyma»,
— piša Łatynina.
A voś Ukraina ad «Paŭnočnaha patoku — 2» ničoha nie stracić, miarkuje žurnalistka «Novaj haziety». Tyja $2 miljardy ŭ hod, jakija atrymlivaje Ukraina ad tranzitu rasijskaha hazu, Ukrainie biez prablem kampiensujuć ES i ZŠA. A pastavić Ukrainu na kaleni, pierakryŭšy haz, nie atrymajecca: Ukraina voś užo čaćviorty hod atrymlivaje haz reviersam, a nie z Rasii.
Kamientary