Doktar: Mianiajcie pižamy štodzień, hatujcie sami — i nie budziecie bajacca nijakich taksinaŭ
Časam nam davodzicca čuć, što naš arhanizm atakavali taksiny i što treba terminova ich vyvodzić. My pahutaryli z doktaram-terapieŭtam miedycynskaha centra «Łade» Taćcianaj Jerafiejevaj i vyśvietlili, što takoje taksiny, jak jany da nas traplajuć i jak ad ich pazbavicca.
«Taksiny — niebiaśpiečnyja rečyvy, jakija traplajuć u arhanizm zvonku. Najčaściej — praz pavietra, jakim my dychajem, i praź ježu, jakuju my ŭžyvajem», — raspaviadaje Taćciana Jerafiejeva.
Pavietra i ježa — samaje pieršaje, na čym doktar prosić zasiarodzicca kožnaha.
«U horadzie ŭ naš arhanizm taksiny traplajuć razam z vychłapnymi hazami, u jakich utrymlivajucca soli ciažkich mietałaŭ. Tamu na vychadnych treba abaviazkova vyjazdžać za horad, dychać čystym pavietram».
I kali vyjechać na pryrodu jość mahčymaść tolki na vychadnych, to štodzień nieabchodna dumać prynamsi pra toje, čym charčavacca, bo razam ź ježaj u arhanizm traplaje bieźlič nie samych karysnych rečyvaŭ.
Taćciana Jerafiejeva raić admovicca ad troch praduktaŭ, jakija prynosiać najbolš škody arhanizmu: fast-fudu, kandytarskich vyrabaŭ i kaŭbas.
«Pa mahčymaści paźbiahajcie nabyvać hatovuju ježu. Stravy pavinny być pryhatavanyja vami, a nie niedzie ŭ kulinaryjach», — adznačaje śpiecyjalist.
A voś kab dapamahčy arhanizmu ačyścicca ad roznych taksinaŭ, varta pić bolš vady i ŭžyvać bolš praduktaŭ, bahatych na klatčatku. Heta piektyny, jakija ŭtrymlivajucca ŭ jabłykach, votrubje, sucelnazbožžavyja kašy (taja ž aŭsianka, naprykład).
Jak dapamahčy arhanizmu zaścierahčysia ad taksinaŭ?
Vada. Siaredniaj normaj ličycca ŭžyvańnie 30 mililitraŭ vady ŭ sutki na kiłahram vahi. Vychodzić, u dzień nieabchodna vypivać 1,5-2 litry vady.
«A voś čaj ci kava dla ačystki arhanizma karyści nie majuć. Naadvarot, jany błakujuć šlachi dla karysnych rečyvaŭ. Niezdarma ž tabletki nielha zapivać čajem ci kavaj», — zaznačaje Taćciana Jerafiejeva.
Sport. Kab nie dać taksinam nivodnaha šancu, sportam zajmacca treba abaviazkova.
«Kab abmien rečyvaŭ byŭ aktyŭny, nieabchodna try razy na tydzień zajmacca aerobnymi nahruzkami: bieham, płavańniem, jazdoj na rovary. Kab pracavała serca i praz pot taksama išło ačyščeńnie arhanizma».
Łaźnia. Zaviadzicie sabie za praviła naviedvać łaźniu raz na tydzień (kali zdaroŭje dazvalaje).
«Chaču dadać važnuju remarku, što duš treba prymać dvojčy na dzień. Kupicie sabie taksama žorstkuju mačałku i jak śled dva razy na tydzień prachodźcie joj pa skury», — akcentuje doktarka.
Son. «U śnie taksama idzie ačyščeńnie arhanizmu. Taksiny, što vychodziać praz skuru, zastajucca na našaj načnoj bialiźnie. Tamu nieabchodna mianiać jaje štodzień. U ideale, i paścielnuju bializnu taksama, ale zrazumieła, što heta małarealna. Tamu pastarajciesia mianiać jaje chacia b raz na tydzień».
Sonca. «Nie sakret, što ad sonca ŭ arhaniźmie vypracoŭvajecca vitamin D. A heta i padtrymka imunitetu, i prafiłaktyka ankałohii, dy i prosta dobry nastroj. Tamu čaściej byvajcie na soniejku, nie siadzicie ŭsio leta ŭ ofisie. Ale pramych soniečnych promniaŭ ścieražyciesia».
Arhanizm, viadoma, sam padkazvaje, što ź im nie ŭsio ŭ normie, kali ŭźnikajuć prablemy. Ale jak zrazumieć, što tak pra siabie daje viedać zabrudžanaść taksinami, a nie bolš surjoznaje zachvorvańnie?
«Simptomy sapraŭdy mohuć być absalutna adnolkavymi ź simptomami kankretnaha zachvorvańnia. Kali čałaviek sanlivy, stomleny, kali ŭ jaho balić hałava, niama nastroju, kali jon adčuvaje mlavaść — heta prykmiety taho, što, mahčyma, u arhaniźmie znachodzicca niebiaśpiečnaja kolkaść taksinaŭ», — kaža Taćciana Jerafiejeva i adznačaje, što ŭ lubym razie varta prajści miedycynskaje abśledavańnie i pierakanacca ŭ hetym.
Tamu rajciesia z daktarami i bieražycie siabie!
Ciapier čytajuć
Deputatka, jakaja rychtuje pryhažuń dla Łukašenki, vyjšła zamuž23
Kamientary