18-hadovaja Alaksandra nabrała 100 bałaŭ na CT pa biełaruskaj movie i dzielicca historyjaj svajho pośpiechu
«Naša Niva» praciahvaje publikavać razmovy sa školnikami, jakija nabrali 100 bałaŭ na CT pa biełaruskaj movie.
Čytajcie taksama: Minčanka Nastaśsia ź idealnym atestatam i 100 bałami pa CT: «Doma ŭ nas hučyć tolki biełaruskaja mova»
Čytajcie taksama: «Chaču stać nastaŭnikam, a paśla pajści ŭ palityku»: chłopiec z Pružanaŭ nabraŭ 100 bałaŭ na CT pa biełaruskaj movie
Ciapier my pahavaryli z vypusknicaj Liceja BDU, minčankaj Alaksandraj Pilipovič-Suščyc.
Dziaŭčyna zdała biełaruskuju movu na 100 bałaŭ i źbirajecca pastupać na litaraturnuju rabotu fakulteta žurnalistyki BDU.
«Čamu ja zdavała biełaruskuju? Heta pryncyp: ja skončyła licej BDU, pravučyŭšysia tut, składana nie zdavać biełaruskuju movu. U mianie była cudoŭnaja nastaŭnica, jakaja natchniała. I chacia ja vučyłasia ŭ kłasie, dzie profilny pradmiet — ruskaja mova, biełaruskuju mnie ŭsio roŭna zdavać lahčej, bo jana svaja. I jana bolš papularnaja ŭ liceistaŭ», — tłumačyć Alaksandra svoj vybar.
«Pra samaidentyfikacyju ŭ maim uzroście kazać ciažka, miescy, dzie my samaidentyfikujemsia — heta vybar biełaruskaj movy ŭ bankamatach. Mnie taksama šmat daŭ baćka, jon z Paleśsia i ličyć siabie takim sapraŭdnym biełarusam. Ja žyvu z baćkami, baču heta i pahadžajusia».
Baćka Alaksandry — fatohraf, maci — tekstylny dyzajnier.
«Nie skažaš, što mova ŭ našaj krainie na pačesnym miescy, — praciahvaje Alaksandra. — Ale aptymizmu dadaje toje, što idzie niejki ruch. Mova stała častkaj sieciva — tam, dzie ludzi nie havorać, jany chacia b namahajucca pisać, sami i biez prymusaŭ. Natchniaje ŭzor Čechii, dzie ludzi sami adradzili movu. U nas situacyja inšaja, kaniečnie.
Naŭrad ci ŭ nas brakuje čałaviečaha žadańnia, chutčej — dapamohi dziaržavy. Usie viedajuć, što navat u biełaruskamoŭnych škołach nie ŭsie pradmiety vykładajucca pa-biełarusku».
Taksama Alaksandra narakaje na školnuju prahramu biełaruskaj litaratury — tam, kaža jana, cikavyja tvory niby prytojvajucca i źjaŭlajucca ŭ prahramie tolki ŭ apošnija dva hady vučoby.
Taksama vypusknica sfarmulavała niekalki parad dla ludziej, jakija chacieli b uzbahacić svaju paŭsiadzionnaść movaj.
«Najpierš, zavodźcie adpaviednyja znajomstvy. Mnie voś pašcaściła — u maim asiarodku jość biełaruskamoŭnyja ludzi. Takija sustrečy natchniajuć i vučać. Taksama čytajcie litaraturu, jana vielmi raznastajnaja, heta nie tolki vajna i vioska. Kali cikavicca i šukać, to možna znajści niešta, što spadabajecca mienavita vam i ŭzbahacić vas. Taksama treba pieraadolvać siabie — kali čałaviek choča być biełarusam, ale baicca, to treba vyjści z zony kamfortu i pasprabavać zahavaryć adzin raz, abo znajści siabra i zrabić heta razam. Nu i raju pačynać z sacyjalnych sietak — tak lahčej, bo jość čas dla pierakładu, pakul mały zapas słovaŭ i dumajecca jašče pa-rusku. Ja viedaju prykłady, kali ludzi pa try hady pisali, a kali nabralisia leksiki i znajšli ŭpeŭnienaść, to stali i ŭ žyćci havaryć», — padsumoŭvaje dziaŭčyna.
Ciapier čytajuć
Prateže łukašenkaŭskaha favaryta Baskava buduje akademiju ŭ Brazilii i Ńju-Vasiuki suśvietnaha maštabu10
Kamientary