Być hodnym nastupnikam Smułkovaj. Novy ambasadar Polščy vystupiŭ ź pieršaj publičnaj pramovaj pa-biełarusku
«Mnie nadzvyčaj pryjemna być siarod ludziej, jakija lubiać i šanujuć svaju movu, kulturu, jakija pamiatajuć naša ahulnaje minułaje. Być siarod tych, chto choča, kab palaki i biełarusy žyli ŭ atmasfery siabroŭstva i dobrasusiedztva», — skazaŭ niadaŭna pryznačany ambasadar Polščy ŭ Biełarusi Artur Michalski ŭ svaim pieršym publičnym vystupie na novaj pasadzie. Piša Radyjo Svaboda.
Polskija navukoŭcy pryjechali, čakajuć prezydenta Dudu
Artur Michalski vystupiŭ ź vitalnym słovam na tradycyjnaj mižnarodnaj navukovaj kanferencyi «Biełaruska-polskija moŭnyja, litaraturnyja, histaryčnyja i kulturnyja suviazi», jakaja pačałasia ŭ Miensku.
U apošnija hady Michalski byŭ dyrektaram Uschodniaha departamentu MZS Polščy, a da hetaha pracavaŭ polskim ambasadaram u Małdovie. Papiaredni ambasadar Polščy ŭ Biełarusi Konrad Paŭlik zaviaršyŭ svaju misiju sioleta 31 studzienia.
Ambasadar Michalski jašče nie ŭručyŭ davierčuju hramatu Alaksandru Łukašenku, hetaja cyrymonija maje adbycca na pačatku nastupnaha tydnia. Adpaviedna, biez aficyjnaj akredytacyi maje peŭnyja abmiežavańni ŭ dyplamatyčnaj dziejnaści, tamu ŭstrymlivajecca ad interviju.
Tym nia mienš, skarystaŭšysia momantam, karespandent Svabody pacikaviŭsia ŭ ambasadara, nakolki realny pryjezd nieŭzabavie ŭ Biełaruś prezydenta Polščy Andžeja Dudy. Jak pisała Svaboda, na 29 červienia zaplanavanaje adkryćcio memaryjału achviaram nacyzmu ŭ vioscy Traścianiec pad Mienskam. Zaprašeńni naviedać žałobnuju cyrymoniju nakiravanyja prezydentam Aŭstryi, Niamieččyny, Izrailu, Polščy, Čechii.
Pavodle ambasadara, peŭnaści ŭ hetym pytańni pakul niama — u dyplamatyčnym pradstaŭnictvie čakajuć kančatkovaha rašeńnia z Varšavy. Pry stanoŭčym varyjancie kiraŭnik Polščy moža pryjechać u Biełaruś upieršyniu za 23 hady. Apošni raz u Biełarusi (u rezydencyi Viskuli ŭ Biełavieskaj puščy) z pracoŭnym vizytam znachodziŭsia Alaksandar Kvaśnieŭski, u 1993 hodzie z aficyjnym vizytam u Miensku byŭ Lech Vałensa.
Novy ambasadar choča być hodnym nastupnikam Smułkovaj
Artur Michalski pryznaŭsia, što tolki pačynaje ŭnikać u biełaruskija spravy, ale vykazaŭ spadziavańnie, što stanie hodnym nastupnikam pieršaj ambasadarki Polščy ŭ niezaležnaj Biełarusi Elžbiety Smułkovaj (jana adna z udzielnic navukovaj kanferencyi, jakaja adkryłasia ŭ Miensku). I pieršaj spravaj Michalski choča vyvučyć biełaruskuju movu. Častku svajoj pramovy jon skazaŭ pa-biełarusku.
«Čym bolš my viedajem kulturu, historyju, tradycyi susiedniaha narodu, tym bolš pavažajem siabie», — zajaviŭ ambasadar Michalski.
Jaho padtrymaŭ staršynia Mižnarodnaj asacyjacyi biełarusistaŭ Aleś Suša. Pavodle jaho, biełaruska-polskija dačynieńni ŭ navukovaj sfery mohuć być uzoram dla ŭsich inšych — palityčnaj, ekanamičnaj, kamercyjnaj.
Movaznaŭca, akademik NAN Alaksandar Łukašaniec vykazaŭ zadavolenaść dvuchbakovymi dačynieńniami: «Nas jadnaje praciahły i hłyboki płast ahulnaj historyi, jaki nia moža ihnaravacca».
Trochdzionnaja kanferencyja ŭračysta raspačałasia 21 červienia na filalahičnym fakultecie Biełdziaržuniversytetu i praciahniecca ŭ sekcyjach. U jaje pracy biaruć udzieł aŭtarytetnyja navukoŭcy-biełarusisty z Polščy i ichnyja biełaruskija kalehi.
U ramkach kanferencyi 21 červienia ŭ Instytucie movaznaŭstva NAN projdzie kruhły stoł, na jakim upieršyniu ŭ Miensku ŭšanujuć polskich daśledčykaŭ Biełarusi Antaninu Abrembsku-Jabłonsku (1901— 1904), jakaja była faktyčna stvaralnicaj polskaj biełarusistyki ŭ Akademii navuk Polščy i Varšaŭskim universytecie, a taksama jaje brata etnasacyjolaha Juzafa Abrembskaha (1905—1967), jaki vyvučaŭ biełaruskaje Paleśsie ŭ mižvajenny peryjad i napisaŭ šerah knih pa vynikach svaich ekspedycyj.
Namieśnik dekana ŭ navukovaj pracy fiłfaku BDU Pavał Navojčyk jak haspadar dyskusijnaj placoŭki skazaŭ, što dla fiłfaku vialiki honar prymać padobny forum, i vykazaŭ spadziavańnie na praciahłyja i plonnyja dačynieńni z polskimi kalehami.
«Patron» kanferencyi — paet Adam Mickievič. Jak nichto inšy jon abjadnoŭvaje dva braterskija narody, adznačyli arhanizatary: narodžany na biełaruskaj ziamli, zachopleny biełaruska-litoŭskaj historyjaj i vychavany ŭ rečyščy polskaj kultury.
Pakolki nieŭzabavie budzie adznačacca 220-hodździe z dnia jaho naradžeńnia, 22 červienia ŭdzielniki kanferencyi vypraviacca na radzimu Mickieviča ŭ falvarak Zavośsie, što ŭ Baranavickim rajonie.
Piać dzion, 60 udzielnikaŭ, saŭna, biljard i kryki adzin na adnaho. Raskazvajem, jak prajšła zakrytaja «hulnia Mackieviča»42
Piać dzion, 60 udzielnikaŭ, saŭna, biljard i kryki adzin na adnaho. Raskazvajem, jak prajšła zakrytaja «hulnia Mackieviča»
Pamiatajecie Daniiła z Ofisa Cichanoŭskaj, jakomu za dva dni sabrali hrošy na ankałahičnuju apieracyju? Jamu napisaŭ toj samy adnakłaśnik, jaki jaho ŭdaryŭ — z čaho ŭsio i pačałosia44
Kamientary