Быть достойным преемником Смулковой. Новый посол Польши выступил с первой публичной речью по-белорусски
«Мне надзвычай прыемна быць сярод людзей, якія любяць і шануюць сваю мову, культуру, якія памятаюць наша агульнае мінулае. Быць сярод тых, хто хоча, каб палякі і беларусы жылі ў атмасфэры сяброўства і добрасуседзтва», — сказаў нядаўна прызначаны амбасадар Польшчы ў Беларусі Артур Міхальскі ў сваім першым публічным выступе на новай пасадзе. Піша Радыё Свабода.
Польскія навукоўцы прыехалі, чакаюць прэзыдэнта Дуду
Артур Міхальскі выступіў зь вітальным словам на традыцыйнай міжнароднай навуковай канфэрэнцыі «Беларуска-польскія моўныя, літаратурныя, гістарычныя і культурныя сувязі», якая пачалася ў Менску.
У апошнія гады Міхальскі быў дырэктарам Усходняга дэпартамэнту МЗС Польшчы, а да гэтага працаваў польскім амбасадарам у Малдове. Папярэдні амбасадар Польшчы ў Беларусі Конрад Паўлік завяршыў сваю місію сёлета 31 студзеня.
Амбасадар Міхальскі яшчэ не ўручыў даверчую грамату Аляксандру Лукашэнку, гэтая цырымонія мае адбыцца на пачатку наступнага тыдня. Адпаведна, без афіцыйнай акрэдытацыі мае пэўныя абмежаваньні ў дыпляматычнай дзейнасьці, таму ўстрымліваецца ад інтэрвію.
Тым ня менш, скарыстаўшыся момантам, карэспандэнт Свабоды пацікавіўся ў амбасадара, наколькі рэальны прыезд неўзабаве ў Беларусь прэзыдэнта Польшчы Анджэя Дуды. Як пісала Свабода, на 29 чэрвеня заплянаванае адкрыцьцё мэмарыялу ахвярам нацызму ў вёсцы Трасьцянец пад Менскам. Запрашэньні наведаць жалобную цырымонію накіраваныя прэзыдэнтам Аўстрыі, Нямеччыны, Ізраілю, Польшчы, Чэхіі.
Паводле амбасадара, пэўнасьці ў гэтым пытаньні пакуль няма — у дыпляматычным прадстаўніцтве чакаюць канчатковага рашэньня з Варшавы. Пры станоўчым варыянце кіраўнік Польшчы можа прыехаць у Беларусь упершыню за 23 гады. Апошні раз у Беларусі (у рэзыдэнцыі Віскулі ў Белавескай пушчы) з працоўным візытам знаходзіўся Аляксандар Квасьнеўскі, у 1993 годзе з афіцыйным візытам у Менску быў Лех Валэнса.
Новы амбасадар хоча быць годным наступнікам Смулковай
Артур Міхальскі прызнаўся, што толькі пачынае ўнікаць у беларускія справы, але выказаў спадзяваньне, што стане годным наступнікам першай амбасадаркі Польшчы ў незалежнай Беларусі Эльжбеты Смулковай (яна адна з удзельніц навуковай канфэрэнцыі, якая адкрылася ў Менску). І першай справай Міхальскі хоча вывучыць беларускую мову. Частку сваёй прамовы ён сказаў па-беларуску.
«Чым больш мы ведаем культуру, гісторыю, традыцыі суседняга народу, тым больш паважаем сябе», — заявіў амбасадар Міхальскі.
Яго падтрымаў старшыня Міжнароднай асацыяцыі беларусістаў Алесь Суша. Паводле яго, беларуска-польскія дачыненьні ў навуковай сфэры могуць быць узорам для ўсіх іншых — палітычнай, эканамічнай, камэрцыйнай.
Мовазнаўца, акадэмік НАН Аляксандар Лукашанец выказаў задаволенасьць двухбаковымі дачыненьнямі: «Нас яднае працяглы і глыбокі пласт агульнай гісторыі, які ня можа ігнаравацца».
Трохдзённая канфэрэнцыя ўрачыста распачалася 21 чэрвеня на філялягічным факультэце Белдзяржунівэрсытэту і працягнецца ў сэкцыях. У яе працы бяруць удзел аўтарытэтныя навукоўцы-беларусісты з Польшчы і іхныя беларускія калегі.
У рамках канфэрэнцыі 21 чэрвеня ў Інстытуце мовазнаўства НАН пройдзе круглы стол, на якім упершыню ў Менску ўшануюць польскіх дасьледчыкаў Беларусі Антаніну Абрэмбску-Яблонску (1901— 1904), якая была фактычна стваральніцай польскай беларусістыкі ў Акадэміі навук Польшчы і Варшаўскім унівэрсытэце, а таксама яе брата этнасацыёляга Юзафа Абрэмбскага (1905—1967), які вывучаў беларускае Палесьсе ў міжваенны пэрыяд і напісаў шэраг кніг па выніках сваіх экспэдыцый.
Намесьнік дэкана ў навуковай працы філфаку БДУ Павал Навойчык як гаспадар дыскусійнай пляцоўкі сказаў, што для філфаку вялікі гонар прымаць падобны форум, і выказаў спадзяваньне на працяглыя і плённыя дачыненьні з польскімі калегамі.
«Патрон» канфэрэнцыі — паэт Адам Міцкевіч. Як ніхто іншы ён аб’ядноўвае два братэрскія народы, адзначылі арганізатары: народжаны на беларускай зямлі, захоплены беларуска-літоўскай гісторыяй і выхаваны ў рэчышчы польскай культуры.
Паколькі неўзабаве будзе адзначацца 220-годзьдзе з дня яго нараджэньня, 22 чэрвеня ўдзельнікі канфэрэнцыі выправяцца на радзіму Міцкевіча ў фальварак Завосьсе, што ў Баранавіцкім раёне.
Комментарии