Asoby-2005

Žyćcio pad lodam

Niekatoryja kažuć: u Biełarusi ničoha nie adbyvajecca. Histaryčna kraina sapraŭdy pieražyvaje palarnuju noč. Ale i pad lodam ciapierašniaha žyćcia, u jakim maral padmienienaja metazhodnaściu, a nacyja adčužanaja ad dziaržavy, brujać krynicy, prabivajučy darohu da «akijanu, jakomu imia Biełaruś», jak pisaŭ sioletni jubilar Uładzimier Karatkievič. Tam, pad hładkim lodam stabilnaści – žyvoje žyćcio, tam farmujecca reljef budučyni.

Tyja, chto šukaje hierojaŭ na hładkim lodzie stabilnaści, majuć kłopat. Jak vyznačyć uradoŭca hodu, kali tam nie zastałosia nivodnaha čałavieka z pazycyjaj? Chiba nazavieš asobaj hodu Ściapana Sucharenku za toje, što tavaryš praz 15 hadoŭ paśla padzieńnia turmy narodaŭ choča žyć pa savieckich zakonach?

Uklučycie televizar – im niama kaho pakazvać, aproč adnaho čałavieka. Systema, jakuju symbalizuje Kadebist-Ideolah, nie praduhledžvaje žyvych hierojaŭ. Joj nia treba asobaŭ, bo na ichnym fonie toj adzin čałaviek vyhladaje na svaju canu.

Vyklik hodu – Milinkievič

Vyklik hodu kinuŭ Alaksandar Milinkievič. Absalutna nieviadomy try miesiacy tamu, siońnia jon – uvasableńnie vykliku, jaki niezaležnaje hramadztva kinuła dyktatury. Milinkievič ryzykuje dziela pryncypaŭ, darahich kožnamu svabodnamu biełarusu. Jon dziejničaje ŭ sytuacyi, u jakoj inšyja atrasajuć ruki.

Jan Pavał II. Sychod hodu

Viasna hetaha hodu aśviaciłasia pamirańniem. Jan Pavał II byŭ pieršym u historyi papam, jaki pavitaŭ biełaruskich viernikaŭ pa-biełarusku. Jon byŭ taksama papam, jaki vymaviŭ słovy «Nia bojciesia». I jany źmianili Centralnuju Eŭropu. Škada, što jon tak i nie naviedaŭ Biełarusi.

Hość hodu – Tom Stopard

Hościem hodu ŭ Biełarusi staŭ Tom Stopard. Suśvietna viadomy dramaturh prylacieŭ u Miensk, kab paŭdzielničać u repetycyjach padpolnaha Svabodnaha teatru. Hienij umieje ź pieršaha pozirku bačyć istotnaje. Stopard znajšoŭ čas naviedać padpolny Biełaruski licej.

Spartoviec hodu – Ivan Cichan

Samym jaskravym spartoŭcam hodu byŭ słonimski małatabojec Ivan Cichan, dvuchrazovy čempijon śvietu. Jon uvasablaje biełaruskuju siłu – zyčlivuju i ciahavituju.

Novaja chvala biełaruskaha roku

«Tavaryš Maŭzer», «Hluki», «IQ-48», Rusia, «Tarpač»... Małady biełaruski rok zajmieŭ realnuju papularnaść. Ich paznajuć, ich dyski šukajuć, ich pieśni słuchajuć praź Internet. Dzieci «N.R.M.» vyjšli na viaršyni hit-paradaŭ, bo, jak i baćki, nie bajacca havaryć istotnyja rečy.

Hod mecenataŭ

Pakul dziaržava zaniataja zmahańniem z ułasnym narodam, kulturnyja prajekty ździajśniajucca ŭ Biełarusi ŭsio bolš za pryvatnyja hrošy. Valancina Dučyc arhanizavała vystavu tvoraŭ svajho baćki Mikałaja. Naščadki Jana Skryhana vydali ŭ «Załatoj seryi» «Biełaruskaha knihazboru» zbor tvoraŭ hetaha najtančejšaha ŭ našym piśmienstvie stylista. Michaś Skobła i «Limaryjus» vydali knihu hodu – epistalarny zbornik Łarysy Hienijuš. Adlity Zvon Svabody. A kolki ŭsiaho zafundavaŭ Piatro Kraŭčanka…

Mastak hodu – Artur Klinaŭ

Čałaviekam hodu ŭ halinie mastactva, na dumku «NN», staŭ Artur Klinaŭ. Biez dapamohi hulakaŭ ź Ministerstva kultury jon vydaŭ antalahičny albom «Horad SONca», jaki stvaraje «Vobraz Radzimy». Takoj pracy nie było z časoŭ Paźniakovaha fotaalbomu «Miensk», heta značyć, z 1967 hodu.

Režyser hodu – Mikałaj Pinihin

viarnuŭsia ŭ Miensk, kab pastavić niepastaŭnaje – Kołasavaha «Symona-muzyku». Jahonaja misteryja stała samaj jaskravaj teatralnaj padziejaj i ŭvojdzie ŭ klasyčny repertuar biełaruskaha teatru.

Filozaf hodu – Piotra Rudkoŭski

Hety manach-daminikaniec byŭ uhanaravany premijaj časopisu «ARCHE» «Za sumlennaje słova». Kryter byŭ stroha farmalny: artykuły P.Rudkoŭskaha samyja naviedvanyja z materyjałaŭ časopisu, jakija vystaŭlajucca na internet-sajcie. P.Rudkoŭskaha vyłučaje šyrynia zacikaŭleńniaŭ: filozaf, teolah, hramadaznaŭca, jon karektna viarnuŭ u biełaruskaje myśleńnie etyčny akcent. Jahonyja tvory kantrastujuć z kaktejlem z postmadernisckaha relatyvizmu i premadernisckaj metafizyčnaści, ułaścivych biełaruskaj intelektualnaj dumcy 1990-ch.

Navukoviec hodu – Mikoła Kacuk

Mikoła Kacuk – sacyjolah, jaki pačaŭ pisać jakasnuju analityku na biełaruskaj movie, adkinuŭšy karparatyŭnuju etyku, što heta zabaraniała. U hetym numary vychodzić hutarka ź im.

• 0
• 0
• 0
• 0
• 0
• 0
• 0
• 0