Na placoŭcy la Opiernaha skrali ź dziasiatak dronaŭ. Redaktar Tut.by: «Heta byli pravaachoŭnyja orhany, spadziajomsia viarnuć techniku»
Padčas śviatkavańnia stohodździa BNR kala Opiernaha teatra 25 sakavika ŭ nieviadomym kirunku źnikła kala 10 apieratarskich dronaŭ — heta takija pryłady, jakija padymajucca ŭ pavietra i zdymajuć źvierchu. Imi kirujuć pa radyjosuviazi ź ziamli.
«Jak tolki nad placoŭkaj stała piać dronaŭ, ich adrazu pačali «vyvodzić», — raskazaŭ «Našaj Nivie» adzin z arhanizataraŭ śviata Anton Matolka. — Krali nie tolki tyja drony, što naležać ŚMI, ale i techniku zvyčajnych ludziej. Kiraŭniki siłavych orhanaŭ, jakija arhanizoŭvali biaśpieku, rabili vyhlad, što nie ŭ kursie, chto heta robić. Nakolki ja viedaju, navat u telekanała STB spačatku skrali. Ja spadziajusia, što drony viernuć».
Pradstaŭnik «Biełsata» ŭ Biełarusi Alaksiej Minčonak raskazaŭ, jak vyhladaŭ kradziež.
«Milicyja viedała pra toje, što my budziem zapuskacca — jany pierapisvali numary techniki. Ale jak tolki dron padniaŭsia, my adrazu zhubili nad im kantrol — paśpieli pieradać tolki adzin kadr. Dron byŭ arendny, cacka heta nie tannaja — cana moža być da dźviuch tysiač jeŭra. A chto moh skraści? Toj, u kaho jość takija mahčymaści — jasna, što heta nie «prosta chulihany». Ludzi, jakija paśpieli pieradać bolš kadraŭ, kažuć, što na dachu Opiery stajała niejkaje niejasnaje abstalavańnie, jakoha zvyčajna tam niama, kali pahladzieć fota raniejšych dzion», — skazaŭ Minčonak.
Ciapier ułaśnik drona, ź jakim pracavaŭ «Biełsat», źviarnuŭsia z zajavaj u milicyju.
Dron straciŭ i partał Tut.by.
«My adpracavali chviliny try-čatyry. Troški videa zrabili, a potym stracili kantrol. Jon źlacieŭ, i znajści my jaho pakul nie možam. Heta byŭ asabisty dron apieratara, tamu my spadziajomsia, što zmožam jaho viarnuć», — skazała «Našaj Nivie» hałoŭnaja redaktarka Tut.by Maryna Zołatava.
Jana ŭpeŭnienaja, što viedaje, dzie šukać techniku.
«Heta byli pravaachoŭnyja orhany. Jakija tut jašče mohuć być varyjanty?» — padsumavała Zołatava.
Placoŭka kala Opiernaha teatra nie ŭvachodzić u śpis miescaŭ, dzie zdymańnie z dronaŭ zabaroniena.
Adnak, pavodle infarmacyi «Našaj Nivy», pasadkaj dronaŭ sapraŭdy zajmalisia siłavyja struktury.
«Adkaznyja za biaśpieku zvanili ŭ Hienštab. Tam skazali, što dazvołu na paloty nie vydavali. A hetaja aerafotazdymka — administratyŭnaja pracedura, dazvoł za jakuju treba brać za niekalki dzion. Dy jašče ŭ niepasrednaj blizkaści ad Hienieralnaha štaba. Tamu vyrašyli ich sadžać. Nie jasna było, čyje tam kankretna drony i što jany zdymajuć», — paviedamili «Našaj Nivie» krynicy.
Ciapier čytajuć
Hałoŭnym śpikieram Žanočaha forumu ŭ Minsku stanie rasijski kryndžovy psichołah, jaki raskazvaŭ pra «pamiać žanočych pałavych hub»14
Kamientary