U Hrodnie sparalizavanaha piensijaniera aštrafavali za bieźbiletny prajezd

U Hrodnie za bieźbiletny prajezd u hramadskim transparcie aštrafavali sparalizavanaha piensijaniera, jaki ŭžo dva hady prykuty da łožka, pieradaje haradzienski partał s13.ru. Praduhledžanuju zakonam sumu ŭ mužčyny-invalida śpisali ź piensijnaha rachunka. Mienavita tady hetaja historyja i atrymała svajo raźvićcio. Vyśvietliłasia, što nieviadomy bieźbiletnik vydaŭ siabie za paciarpiełaha, i mienavita pa hetych dadzienych, jakija byli paviedamlenyja kantraloram, invalid i zapłaciŭ štraf za parušeńnie, jakoje navat fizična nie moh ździejśnić.

Anatol Malikaŭ bolš za dva hady prykuty da łožka paśla pieraniesienaha insultu. Na leki i tak sychodzić niamała srodkaŭ, a štraf za bieźbiletny prajezd i zusim staŭ šokam.

Pavialičyć

Žonka paciarpiełaha pry źviercy źviestak pa piensii znajšła razychodžańni i patelefanavała ŭ piensijny fond, kab atrymać tłumačeńni. Zahadčyca fonda patłumačyła, što srodki z rachunku byli śpisanyja ŭ košt pahašeńnia štrafu. Dalej pa łancužku adbyłasia hutarka z buchhałtaram i jurystam arhanizacyi. Apošni i paćvierdziŭ, što ŭsio zroblena pa praviłach — byŭ aformleny pratakoł na dadzienyja piensijaniera.

Iryna Malikava tak i nie zrazumieła, adkul u kantraloraŭ mahli źjavicca dadzienyja muža. Joj paraili źviarnucca ŭ sud.

Piensijanierka ŭsio ž vyrašyła vyśvietlić pryčyny i spačatku padzialiłasia prablemaj z učastkovym inśpiektaram, jaki paćvierdziŭ mahčymaść uźniknieńnia takoj situacyi. Maŭlaŭ, u kantraloraŭ jość svaja słužba vyśviatleńnia dadzienych «zajcoŭ». Samaje cikavaje, što štraf vypisali na piensijaniera, ale zusim pa inšym adrasie — nie ŭkazanym u prapiscy, nie pa tym, dzie jon realna pražyvaje. Da taho ž piensijaniery tak i nie atrymali nijakich kvitancyj ab vypłacie štrafu.

U rajadździele milicyi nakiravali dakumienty ŭ aŭtobusny park Hrodna dla dalejšaj pravierki. Tam žurnalistam teleradyjokampanii «Hrodna» paćvierdzili, što zatrymańnie było, tolki voś kiemlivaha «zajca», jakomu ŭdałosia vydać siabie za inšaha čałavieka, transpartniki nie viedajuć. Mužčynu biez pašparta ŭ adpaviednaści z praviłami dastavili dla vyśviatleńnia asoby ŭ adździaleńnie milicyi na Folušy, dzie supracoŭniki pravaachoŭnych orhanaŭ vyśvietlili jaho imia i proźvišča.

Ciapier tearetyčna viarnuć 11 rubloŭ 50 kapiejek možna praz sud, adnak siamja Malikavych ustupać u sudovuju spravu namieraŭ nie maje. Ale ŭ piensijanieraŭ zastałasia kryŭda i pytańnie, jak pry najaŭnaści sučasnych baz dadzienych tak prosta možna pierabłytać dvuch čałaviek.

***

Na telehram-kanał «Našaj Nivy» možna padpisacca tut.

• 0
• 0
• 0
• 0
• 0
• 0
• 0
• 0