«Mnie vielmi treba adpomścić katu» — tysiača biełarusaŭ zmahajecca za toje, kab praspać dzień i atrymać za heta hrošy
Biełaruski vytvorca tavaraŭ dla snu prapanavaŭ minčukam cikavy ekśpierymient. Jon zapłacić pa 70 rubloŭ kožnamu ź piaci dobraachvotnikaŭ, hatovych uvieś dzień pravalacca ŭ sałonie na łožku prosta tak abo z knižkaj ci za prahladam lubimaha sieryjału.
Adzinaje — paśla ščaśliŭčykam treba budzie raspavieści, jak im lažałasia-spałasia na matracach, bo heta nasamreč test-drajv. Na nietypovuju adnadzionnuju vakansiju ŭžo pryjšło bolš za tysiaču zajavaŭ ad tych, chto maryć narešcie praspać ceły dzień.
Kožnamu ŭ ankiecie treba było patłumačyć, čamu jamu nieabchodna vyspacca i čamu jon idealny kandydat. My pačytali, što pišuć sonnyja haradžanie, i adabrali samyja śloznyja prośby ŭziać mienavita ich.
* * *
Budzilnik zvonić u 6:00, a ja sonny i niezadavoleny. Chaču sustrakać dzień z radaściu! A dla hetaha mnie treba vyspacca. Žaba dušyć mianie zialonymi łapkami, kali ja baču, jak maja kachanaja viartajecca ŭ ciopły łožak. Jana ciapier nie pracuje i śpić kolki choča. Jak ža ja joj zajzdrošču!
* * *
Ja zajzdrošču čornaj zajzdraściu svajoj kotcy i śpiecyjalna jaje budžu. Jana śpić nočču, jana śpić z ranicy, kali ja sychodžu na pracu, jana śpić uvieś dzień, pakul ja pracuju, jana śpić uviečary, kali ja prychodžu z pracy i zajmajusia chatnimi spravami… Ja taksama tak chaču!
* * *
U 6:00! Zvonić moj duracki budzilnik! Niama słoŭ, kab apisać usio žadańnie paspać! Ja, kaniečnie, pakul jašče nie maci traich dziaciej! Ale ŭžo ŭ svaje 25 hatova kaho-niebudź ukusić pry kancy pracoŭnaha dnia, i pry hetym usim na vulicy tolki paniadziełak!!! Chaču spać!
* * *
Ja amatar pahladzieć futboł da samaj poźniaj nočy. Budzilnik zvonić u 8:00, na pracy treba być u 9:00. Dziela snu ja hatovy vypić kroŭ usich, chto apyniecca na maim šlachu da pracy. U maich siniakach pad vačami možna ŭbačyć pandu. Dajcie, kali łasačka, adsypny. Chočacca z pracy praz darohu pryjści i imhnienna zasnuć.
* * *
Z adnaho boku, miaški pad vačami dapamohuć bolš efiektyŭna sadžać/źbirać bulbu, a ź inšaha — zima ŭsio ž taki.
* * *
Prychodžu na pracu da 11 hadzin. Adsypny nie patrabuju. Prosta chvalusia.
* * *
Mnie ŭsie siabry raili hladzieć «Hulniu tronaŭ». Ja vielmi doŭha adciahvała hetuju spravu, a ciapier nie mahu spynicca. Kožny viečar abiacaju sabie pahladzieć tolki adnu sieryju, a ŭ vyniku siadžu da 3-4 nočy. Chaču adsypny, kab narešcie dahladzieć sieryjał i spać spakojna.
* * *
Ja jak pryncesa na harošynie: vielmi pryhožaja i drenna splu (z drobiaziaŭ: dvoje dziaciej, kredyt i kot).
* * *
Mnie nie prosta nieabchodna vyspacca, hetaha ŭžo patrabuje moj arhanizm. Ja zrazumieła heta tady, kali zasnuła ŭ razhar pracoŭnaha dnia pierad klijentam.
* * *
Mnie vielmi treba adpomścić katu! Hetaj nachabnaj pušystaj miłaj mordzie, jakaja raściahvajecca na ŭsiu daŭžyniu matraca, jak tolki vyzvalajecca jašče ciopłaja, ale ŭžo svabodnaja płošča!
* * *
Mnie patrebnyja hrošy, ja ž biespracoŭnaja, u mianie miesiačny dośvied lažańnia na łožku.
* * *
Tamu što ja staŭ majstram łamańnia zapałak paviekami! Tak žyć dalej nielha!
* * *
Niaŭžo jość čas paspać u studenta? Da taho ž hiejmiera-mańjaka? Dy jašče šmathadovaha fanata «Barsy», jaki nie prapuskaje nivodzin jeŭrakubak. A tranślacyi ŭ nas nu vielmi poźnija, bo nam niezrazumieła navošta naviazali žyćcio nie ŭ svaim časavym pojasie. A kali jašče ŭličyć nievylečny dyjahnaz «sava»… «Sovy» ŭ nas zaŭsiody padviarhalisia dyskryminacyi, pakolki ŭvieś režym u nas raźličany na «žavarankaŭ». Da taho ž, u apošnija hady jaho pahoršyli, kali štučna pieraviali strełki ŭ nienaturalny dla nas maskoŭski časavy pojas. Adpaviedna, davodzicca ŭstavać na hadzinu raniej za naturalnyja astranamičnyja bijarytmy. Nu i voś kali vysypacca studentu pry takoj hrymučaj sumiesi niespryjalnych faktaraŭ? Chiba što na lekcyjach… Abo ŭ vyklučna redkija vychadnyja, kali i paśla 14 hadzin snu ź ciažkaściu ŭdajecca dabudzicca. Karaciej, paškadujcie biednaha studenta, dajcie ad dušy paspać u kamfortnych umovach!
* * *
Tamu što ja burunduk! I kocik moj taksama burunduk, jamu vielmi sumna zasynać bieź mianie. My lubim sapci va ŭnison!
Atrakcyjon niejmaviernaj ščodraści zapłanavany na 28 listapada, tamu jašče prymajucca zajaŭki na vakansiju. Darečy, hety dzień siabry kłuba ananimnych amataraŭ paspać patrabujuć zrabić usiebiełaruskim adsypnym.
Kamientary