Fiederacyja futboła Čyli maje namier padać pratest na vynik matču Pieru — Kałumbija. Matč zaviaršyŭsia ŭničyju, i zbornaja Čyli nie zmahła vyjści na čempijanat śvietu 2018 hoda, piša RBK.
Čylijcy spasyłajucca na parahraf 6.3.2 rehłamientu FIFA, u jakim havorycca pra «niezakonny ŭpłyŭ na chod ci vynik matčaŭ». Nacyjanalnaja fiederacyja futboła maje namier zapatrabavać pierahladu vyniku matču pamiž Pieru i Kałumbijaj.
Matč Pieru i Kałumbijaj zaviaršyŭsia ź likam 1:1. Hety vynik vyvieŭ kałumbijcaŭ na čempijanat śvietu ŭ Rasii napramuju, pieruancam daviadziecca zhulać u stykavych matčach suprać Novaj Ziełandyi. Zbornaja Čyli zaniała šostaje miesca ŭ hrupie i prapuścić čempijanat śvietu.
U kancy matču Pieru — Kałumbija trenier haściej Chase Piekierman paviedamiŭ forvardu Radamielu Falkaa, jak razhortvajucca padziei ŭ matčach Brazilija — Čyli i Vieniesueła — Parahvaj.
Forvard, u svaju čarhu, padyšoŭ da niekalkich pieruanskich hulcoŭ i prapanavaŭ im dahulać da kanca matča, zachavaŭšy lik 1:1. Pa słovach Falkaa, hety vynik vyvieŭ by abiedźvie kamandy na čempijanat śvietu napramuju. Pieruancy pahadzilisia, i apošnija chviliny matču prajšli biez baraćby. Paśla zakančeńnia matču vyśvietliłasia, što taki vynik vyvodziŭ na čempijanat śvietu naŭprost tolki kałumbijcaŭ, pieruancy zmahli prabicca tolki ŭ stykavyja matčy.
«My byli sfakusavanyja na hulni, ale za piać chvilin da kanca da nas padyšli kałumbijcy. Jany viedali, jaki lik u inšych matčach, i skazali, što nam lepš dajhrać z takim likam. Ja razmaŭlaŭ z Falkaa, i jon skazaŭ, što taki vynik usich zadavolić», - raspavioŭ paśla matču paŭabaronca zbornaj Pieru Renata Tapia.
Čylijcy ŭ apošnim matčy adboračnaha turniru ŭ Paŭdniovaj Amierycy sastupili Brazilii ź likam 0:3 i zastalisia na šostym miescy ŭ tablicy. Jany, jak i pieruancy, nabrali 26 bałaŭ, ale sastupili kankurentam za košt dadatkovych pakazčykaŭ.
Akramia Kałumbii, naŭprost na čempijanat śvietu z paŭdniovaamierykanskaj hrupy vyjšli Arhiencina, Uruhvaj i Brazilija.
Ciapier čytajuć
Łukašenka zajaviŭ pra hatoŭnaść pryjechać u Kijeŭ48
Kamientary