Vasil Jakavienka pra abvinavačvańni va ŭsłaŭleńni fašyzmu ad Čarhinca: «Heta nachabnaja chłuśnia, łuchta, paklop!»
Staršynia Sajuzu piśmieńnikaŭ Biełarusi Mikałaj Čarhiniec nazvaŭ siabraŭ Sajuzu biełaruskich piśmieńnikaŭ Uładzimiera Arłova i Vasila Jakavienku «chłopčykami ad piara» i zajaviŭ, što «jany adkryta ŭsłaŭlajuć fašyzm i patrabujuć nazvać u Miensku vulicu imiem Vilhielma Kube». Vasil Jakavienka nazvaŭ zajavy staršyni praŭładnaha SPB «chłuśnioj, łuchtoj, paklopam» i źbirajecca padać na Čarhinca ŭ sud.
11 lipienia na presavaj kanferencyi staršynia Sajuzu piśmieńnikaŭ Biełarusi Mikałaj Čarhiniec skazaŭ, što SPB kožny hod rekamenduje Ministerstvu adukacyi śpis knih dla vyvučeńnia ŭ škołach.
Spadar Čarhiniec pryvioŭ u prykład svaju knihu «Syny». «Tam pra 18-hadovych pacanoŭ, jakija vajujuć na froncie. Chiba heta nie pavinna być cikava staršakurśnikam, kab jany dumali, razvažali?» — skazaŭ Čarhiniec.
Sa słoŭ Čarhinca stała viadoma, što sajuz, na čale jakoha jon staić, nie ŭchvalaje niekatorych biełaruskich piśmieńnikaŭ i ich tvory.
«My suprać tvoraŭ taho ž Uładzimiera Arłova i taho ž Vasila Jakavienki, — skazaŭ jon. — Jany adkryta ŭsłaŭlajuć fašyzm i patrabujuć nazvać u Miensku vulicu imiem Vilhielma Kube, haŭlajtera Biełarusi ŭ hady nacysckaj akupacyi», — cytuje Čarhinca BiełaPAN.
Pavodle Čarhinca, hetyja «chłopčyki ad piara» patrabujuć zrabić heta ŭ Biełarusi, dzie zahinuŭ kožny treci hramadzianin.
«Hetyja piśmieńniki sprabujuć viarnuć časy fašyzmu ŭ Biełarusi. My, viadoma, suprać takich knih», — skazaŭ kiraŭnik SPB.
Piśmieńnik Vasil Jakavienka adreahavaŭ na zajavy Mikałaja Čarhinca takim čynam:
«Heta paklop. Nielha vytłumačyć, jakim čynam takaja łuchta Čarhincu pryjšła ŭ hałavu, što ja patrabavaŭ imiem Kube nazvać vulicu. Mnie ŭ strašnym śnie takoha nikoli nie prychodziła! Dyj naahuł, ja nikoli nia čuŭ, kab chto-niebudź inšy takoje prapanoŭvaŭ. Heta nachabnaja chłuśnia, łuchta, paklop!
Ja naahuł nidzie i nikoli nie prasłaŭlaŭ fašyzm. Inšaja sprava, što vobrazy, charaktary Kube dy inšych prachodziać u maim tvory «Pakutny viek». Ale ž jany nijakim čynam nie idealizujucca.
Čarhinca biantežyć, mabyć, toje, što Kube pryznavaŭ biełarusaŭ adnym z najcikaviejšych narodaŭ, narodam, jaki zasłuhoŭvaje pavahi, i jon admysłova vyvučaŭ historyju biełarusaŭ i viedaŭ jaje ci nia lepš, čym toj samy Čarhiniec.
Jon lapnuŭ jazykom biespadstaŭna, za takoje surjoznaje abvinavačańnie treba ŭ sud padavać — za adkrytuju, publičnuju źniavahu».
Kamentar piśmieńnika i historyka Ŭładzimiera Arłova Svabodzie atrymać pakul nie ŭdałosia.
Ciapier čytajuć
DFR kašmaryć transpartnikaŭ: u vialikich łahistyčnych apierataraŭ kryminalnyja spravy, vobšuki i aryšty9
DFR kašmaryć transpartnikaŭ: u vialikich łahistyčnych apierataraŭ kryminalnyja spravy, vobšuki i aryšty
«A 4‑j hadzinie nočy my zrazumieli, što sierviery prosta vyčyščanyja». Jarasłaŭ Ivaniuk raskazaŭ padrabiaznaści pra ataku na anłajn-biblijateku «Kamunikat»1111
Kamientary