Vajna za pachavańnie — paśla skarhi nastaŭnicy apazicyju buduć sudzić za subotnik na mohiłkach?
9 maja aktyvisty Abjadnanaj hramadzianskaj partyi praviali subotnik na miemaryjale ŭ Drazdach. Heta aburyła dyrektarku minskaj škoły.
«Piedahoh SŠ №104 Natalla Mikałajeŭna źviarnułasia ŭ rajonnuju administracyju nie dla taho, kab paskardzicca na brudny padjezd ci pabituju darožku ŭ parku. Jaje, jak i jaje kalehaŭ, aburyli publikacyi na asobnych internet-partałach ab subotniku siabroŭ niekatorych palityčnych partyj, jaki prajšoŭ 9 maja ŭ miescy masavych pachavańniaŭ vajennapałonnych i mirnych hramadzian kancłahiera «Drazdy», — paviedamlajuć «Minsk-Naviny».
Aburyła piedahoha akcyja AHP, jakuju partyja pravodzić štohod. I sioleta pravacentrysty prybralisia na miemaryjale i ŭstalavali ŭkazalnik.
Ale ž piedahoh — chutčej za ŭsio, aburałasia dyrektarka škoły, Natalla Sidarenka — aburyłasia zajavaj aktyvistaŭ pra zakinutaść pomnika.
«Tolki ciapierašniaj viasnoj my praviali tam piać subotnikaŭ, u jakich udzielničali jak piedahohi, tak i vučni. U školnym muziei pastajanna dziejničaje ekspazicyja, pryśviečanaja Drazdam, kožny hod pravodzim na terytoryi miemaryjała vachty pamiaci, pryjomy ŭ pijaniery, mitynhi, ŭskładajem vianki la pamiatnaha znaka. Zajmajemsia hetym nie dla taho, kab chtości nas pachvaliŭ, a tamu što šanujem pamiać achviar vajny, pachavanych u Drazdach. Tamu svaju pracu asabliva i nie afišujem. My vučym našych školnikaŭ, što pra dobryja spravy nie kryčać. I voś ujavicie naša abureńnie, kali my pračytali ŭ internecie ab tym, što pradstaŭniki apazicyi naviali paradak na pachavańni «Drazdy», da jakoha, nibyta, nikomu, akramia ich, niama spravy!» — zajaviła Natalla Mikałajeŭna.
Jana kaža, što «pračytać takoje było vielmi kryŭdna jak nastaŭnikam, tak i dzieciam, jakija pracujuć na miemaryjale nie adzin raz za hod».
«Jany pryjšli i praviali tam subotnik! Dy što tam užo było prybirać paśla taho, jak my stolki razoŭ pravodzili tam svaje pracoŭnyja akcyi, dy i administracyja rajona pracavała tam padčas respublikanskaha subotnika?! — aburajecca dyrektarka. — Apazicyja prosta śpiekuluje na našaj historyi, na achviarach vajny…»
Cikava, što čynoŭnictva žvava adreahavała na słovy piedahoha.
Kiraŭnik administracyi Centralnaha rajona Ihar Buzoŭski pahadziŭsia z punktam hledžańnia zajaŭnicy i paabiacaŭ, što rajonnyja ŭłady zrobiać usio mahčymaje, kab padobnyja paklopy bolš nie paŭtaralisia. Jon nie vyklučaje, što pytańnie ab niedakładnaj infarmacyi, jakaja prahučała na asobnych internet-resursach, moža być razhledžana ŭ sudovym paradku.
Sama Natalla Sidarenka admoviłasia ad kamientaroŭ «Našaj Nivie».
U svaju čarhu ŭ AHP adkazvajuć — da suda hatovyja.
«Ja hatovy iści ŭ sud i navat spadziajusia, što praces adbudziecca. Mnie jość što skazać Buzoŭskamu, bo jon nie vałodaje temaj i choča prosta nas prynizić, — adkazaŭ «Našaj Nivie» adzin z arhanizataraŭ subotnika Mikałaj Kazłoŭ, lidar minskaj arhanizacyi AHP. — Što tyčycca školnikaŭ, to ja bačyŭ, što jany prybirajuć, jany vialikija małajcy.
Ale sprava nie ŭ hetym. Razmova nie pra kamień, a niepasredna pra pachavańnie, dzie lažać dziesiać tysiač čałaviek. Jano znachodzicca ŭ poli, na čałaviečych pareštkach raście ziernie. Nichto hetym pytańniem nie zajmajecca. Tolki na ŭskrajku staić toj kamień.
Dyk jość kamu sprava ci nie da taho pachavańnia?»
Kamientary