Niahledziačy na zakliki mižnarodnaj supolnaści prajaŭlać strymanaść, dziejańni ŭładaŭ Biełarusi, u tym liku «previentyŭnyja aryšty napiaredadni i vialikaja kolkaść aryštaŭ i zatrymańniaŭ mirnych demanstrantaŭ 25 sakavika, byli nieabačlivymi i niedarečnymi». Pra heta zajaviła delehacyja Brusiela na sustrečach u Minsku ŭ ramkach pasiadžeńnia Kaardynacyjnaj hrupy ES-Biełaruś 3-4 krasavika, paviedamlaje pres-słužba pradstaŭnictva Jeŭrasajuza, piša Tut.by.
Pavodle acenki delehacyi ES, jakuju ŭznačalvaŭ Tomas Majer-Chartynh, vykanaŭčy dyrektar pa pytańniach Jeŭropy i Centralnaj Azii ŭ Jeŭrapiejskaj słužbie źniešnich dziejańniaŭ (JESZD), biełaruskija ŭłady abmiežavali svabodu vykazvańniaŭ i schodaŭ nasupierak «zajaŭlenaj Biełaruśsiu palitycy demakratyzacyi i jaje mižnarodnym abaviazacielstvam».
Čynoŭniki ź ES na sustrečach u Minsku adznačali, što «kankretnyja i niezvarotnyja kroki z boku Biełarusi da zabieśpiačeńnia univiersalnych fundamientalnych svabod, u tym liku svabody vykazvańnia, schodaŭ i ŚMI, a taksama viaršenstva prava i praŭ čałavieka, u tym liku admiena śmiarotnaha pakarańnia, zastanucca klučavymi pry farmavańni budučaj palityki ES u dačynieńni da Biełarusi i adnosin ES z hetaj krainaj».
Na sustrečach zakranałasia i tema budaŭnictva BiełAES. «Jeŭrapiejski bok padkreśliŭ nieabchodnaść poŭnaj prazrystaści i supracoŭnictva pa pytańniach jadziernaj biaśpieki», — zajavili ŭ pradstaŭnictvie ES.
U delehacyju ES taksama ŭvajšli pradstaŭniki JESZD i hienieralnych dyrektarataŭ Jeŭrapiejskaj kamisii, adkaznych za pytańni Jeŭrapiejskaj palityki susiedstva, handlu, enierhietyki, a taksama ŭnutranych spraŭ. Biełaruskaja delehacyja pracavała pad kiraŭnictvam namieśnika kiraŭnika MZS Aleh Kraŭčanka, i ŭklučała ŭ siabie pradstaŭnikoŭ inšych halinovych ministerstvaŭ.
Delehacyju ES taksama prymali kiraŭnik MZS Uładzimir Makiej i pieršy namieśnik kiraŭnika Administracyi prezidenta Maksim Ryžankoŭ.
U sustrečach taksama brali ŭdzieł biełaruskija ekśpierty i niaŭradavyja arhanizacyi. Jak i ŭ minuły raz, na pasiadžeńni ŭ listapadzie 2016 hoda, pravy čałavieka pa paradku dnia byli pastaŭlenyja ŭ asobnuju siesiju, zakrytuju dla hramadzianskaj supolnaści. U hety raz siarod biełaruskich ekśpiertaŭ upieršyniu byli i praŭładnyja palitołahi.
Akramia praŭ čałavieka, kaardynacyjnaja hrupa abmierkavała pytańni mabilnaści, kantaktaŭ pamiž ludźmi, handlu, enierhietyki, mytnaj dziejnaści, transpartu, navakolnaha asiarodździa, navukovych daśledavańniaŭ, adukacyi, sanitarnych i fitasanitarnych standartaŭ, sielskaj haspadarki i sacyjalnaj abarony. Baki abmianialisia pohladami na padziei ŭ rehijonie.
Dypłamaty ź ES praviali asobnyja sustrečy ź biełaruskimi pravaabaroncami, pradstaŭnikami hramadzianskaj supolnaści i apazicyi.
«Jeŭrapiejski sajuz znoŭ paćvierdziŭ svaju prychilnaść mecie zabieśpiačeńnia stabilnaj, demakratyčnaj i kvitniejučaj Biełarusi na karyść jaje naroda i budzie i nadalej pracavać razam z usimi zacikaŭlenymi bakami dla jaje dasiahnieńnia».
Kaardynacyjnaja hrupa — farmat dyjałohu pamiž Minskam i Brusielem, jaki byŭ zapuščany hod tamu na chvali narmalizacyi biełaruska-jeŭrapiejskich adnosin. Sustrečy hrupy prachodziać kožnyja paŭhoda. Sioleta pasiadžeńnie prachodzić na fonie niezadavolenaści ES razhonam akcyi pratestu 25 sakavika ŭ Minsku i chvalaj administracyjnych aryštaŭ da i paśla jaje.
Kamientary